God Tell Abram, “Come Be My Guy!”
(Jesus Guys 7:3; 3:25; Galatia 3:8)
121Befo time, Yahweh wen tell Abram, “Eh! Go way from yoa own country an yoa own ohana. Go way from yoa fadda house. I goin show you one nodda country. Dass why I like you fo move house.
2Da peopo dat goin come from you,
Bumbye I goin make dem come one big, importan ohana.
I goin make good tings come to you.
I goin make you one big name guy,
An you goin make good tings come fo odda peopo.
3Da peopo dat tell, ‘Eh Abram, I like God fo do good tings fo you!’
Bumbye I goin do good tings fo dem.
Da peopo dat tell, ‘Eh Abram, I like God fo do bad tings to you!’
Bumbye I goin make bad tings come fo dem.
All da ohanas all ova da world,
Bumbye wen dey tink bout you, dey goin say,
‘Eh! We like God do good tings fo us guys,
Jalike he doing fo Abram!’-”
4So, dass how come Abram go way from Haran, jalike his God Yahweh wen tell um fo do. Dat time, Abram was 75 year old. Lot, da nephew, he go too. 5Abram wen take his wife Sarai, an his nephew Lot, an all da big stack stuffs dey wen get Haran side, an all da peopo dat wen work fo dem dea too. Dey start fo go Canaan side, an bumbye, dey get dea.
Abram Go Canaan Side
6Den Abram dem start fo go from one side Canaan land to da odda side. Dey come one place, Shekem town. Get one real big tree dea at Moreh, an dey stay dea. Da Canaan peopo dat live ova dea awready stay go Moreh, fo find out wat dea gods like dem fo do. 7Wen dey stay dea, Yahweh wen let Abram see him. He tell um: “Dis land ova hea, I goin give um to da peopo dat goin come from you bumbye.” Az how come Abram wen pile up rocks ova dea fo make one altar an make sacrifice, cuz Yahweh wen let Abram see him, dat place.
8From dea, Abram dem go mo down inside da Canaan land. Dey go up country, da east side from Bethel town. Dass da place dey put up dea tents: da west side get Bethel, an east side get `Ai. Same ting jalike da odda place, Abram pile up rocks fo make one altar an make sacrifice dea too, an he tell Yahweh, “Eh! I like you help me, cuz I know wat kine God you.” 9Lata on, Abram dem go way from dea an move da tents, litto bit mo south erytime.
Abram An Sarai Bulai Da Egypt Peopo
10Dat time, da peopo inside da Canaan land, neva have notting fo eat. So Abram, he go move house Egypt side short time, cuz hard time fo dem. 11Jus befo dey go inside da Egypt land, Abram tell his wife Sarai, “Eh! You know wat? You, you one good looking wahine! An I know dis: 12Da Egypt guys, dey goin look you, an dey goin say, ‘Dat wahine, she dis guy wife,’ an dey goin go kill me an let you stay alive. 13Mo betta you tell peopo dat you my sista, so den dey goin make nice to me if dey like you, an dey goin let me stay alive cuz a you.”
She tell um, “Kay den.”
Da Pharaoh Guy Like Marry Sarai, But No Can
(Galatia 3:16)
14Wen Abram dem get ova dea Egypt side, da Egypt peopo wen see dat Sarai one real good looking wahine. 15Da govmen guys dat work fo da Pharaoh (dass wat da Egypt peopo call dea king guy), dey wen spock her, an dey go tell da Pharaoh guy all kine good stuff bout her. Dey take Sarai inside da palace fo come one a da Pharaoh guy wifes. 16Da Pharaoh guy, he wen make nice to Abram cuz he tink Abram Sarai brudda. Dass why he give Abram plenny sheeps, cows, donkeys, camels, an slave guys an wahines.
17But den, Yahweh, he wen make da Pharaoh guy an all da odda palace peopo come real sick, wit diffren hard kine sick, cuz he wen take Abram wife Sarai fo come his wife. 18Den da Pharaoh guy wen tell Abram fo come by him. He tell um, “Eh! How come you wen do dis to me? How come you neva tell me she yoa wife? 19How come you wen tell, ‘She my sista,’ aah? Az why I make her my wife. So den! Hea yoa wife! Take her now, an get outa hea!” 20Da Pharaoh guy wen tell his guys wat fo do wit Abram. Dey wen take um all way outside Egypt. Abram wen go home from dea wit his wife an all his stuffs.