Abram An Lot
131-2Abram, he one rich guy, wit plenny cows an sheeps, an silva and gold kine money too. Dat time, wen he wen go outa Egypt, he go da Negev side, him an his wife an Lot an all dea stuffs.
3Afta Abram come Negev side, he go ery day litto bit moa up country. Den he come by da place wea get Bethel one side an `Ai da odda side, da same place wea Abram wen put his tent befo time, 4an wea he wen make da altar fo sacrifice, an tell his God, Yahweh, “Eh! I like you stay help me, cuz I know wat kine God you.”
5Da nephew Lot, he stick wit Abram, all da diffren place he go. Lot get plenny sheeps an cows an tents jalike Abram. 6But dem two guys, dey get so plenny animals, if dey wen stick togedda, no mo nuff land fo dem an dea animals. 7Da guys dat take care da cows fo Abram an da guys dat take care da cows fo Lot wen start fo make argue. An had da Canaan peopo an da Periz peopo inside dat land, same time too.
Lot Pick Da Valley, Abram Stay Up Country
8Den Abram, he tell Lot, “You know wat? No need me an you make argue. Us guys ohana, az why. An no need da guys dat take care my cows an da guys dat take care yoa cows make argue. 9I tell you wat we do. Get plenny land all around hea. No need me an you stick togedda all da time. If you like go left side, I go right side. If you like go right side, I go left side. No matta.”
10Lot, he wen check out all da land nea da Jordan Riva. He see dat get plenny watta ditch dat side. Ova dea nea Zo`ar, look jalike da place wit trees dat Yahweh wen plant befo time, an jalike da Egypt land. (Az was befo Yahweh wen wipe out Sodom town an Gomorrah town.) 11So, Lot wen pick da valley both sides da Jordan Riva. Him an his peopo, dey wen go move house ova dea, da east side. Dass how da two ohana guys wen split up. 12Abram, he stay up country Canaan side. Lot, he go stay nea da valley towns. He put up his tents nea Sodom. 13But da Sodom peopo, dey was bad peopo. Dey erytime do bad kine stuff dat Yahweh say dey betta not do.
God Make Da Same Promise One Mo Time
(Galatia 3:16)
14Afta Lot dem wen go way from Abram, Yahweh tell Abram: “Eh! Go check out all da land you can see from dis place, ery side. 15Cuz all da land dat you see, I goin give um to you an to da peopo dat goin come from you bumbye. Goin be dea land foeva. 16Da peopo dat goin come from you, I goin give you so plenny, dat dey goin be all ova da place, jalike da dirt stay all ova da groun. You tink can count how plenny dirts get on top da groun? Nah! Same ting, goin get so plenny peopo dat goin come from you, no can count um. 17So, go now. Go holoholo all ova da land. Look how far an how wide da land! I goin give da whole ting to you, az why.”
18Dass why Abram wen go move his tents. He go live Hebron side, nea da big trees wea Mamre live. Ova dea he make one nodda altar fo make sacrifice fo Yahweh.