Da Babylon Army Guys Make Trouble
Dat time, had one king guy name King Kedorla`omer from Elam town dat wen take ova plenny odda towns all ova da place. Fo twelve year, him an three odda king guys from da big towns aroun Babylon wen stay go togedda fo give hard time to da peopo dat live aroun da valley wea Lot stay live. Dea names,
Dem four king guys an dea army guys, ery year dey make presha fo da peopo aroun Sodom. Da peopo dat side get five king guys fo dea big towns. Dea names,
(Bela, dass da place dey call Zo`ar too, you know.)
All dat time, da king guys from Babylon side make da king guys from Sodom side pay um plenny money, ery year. But afta dey pay fo twelve year, year numba 13, da five king guys from Sodom an Gomorrah side no pay notting. Dey go get all dea army guys togedda fo get ready wen da Kedorla`omer guys come back da nex time fo make war. Dey put togedda one big army inside da Siddim Valley, wea get da Big Salt Lake inside.
So, da nex year, numba 14, Kedorla`omer an da three king guys dat stay tight wit him, dey all wen go ova dea wit dea army guys fo make war wit da Sodom guys dat no like pay notting to dem. Befo Kedorla`omer guys get dea, dey all go Ashterot-Karnaim side an make war wit da Refa peopo. Den dey go Ham side an make war wit da Zuz peopo. Den dey go Shaveh-Kiriathaim side an make war wit da Em peopo.
Den dey go up country to da Seir mountains an make war wit da Hor peopo. Dey chase da Hor peopo all da way to El Paran nex to da boonies wea no mo nobody.
Den da king guys from aroun Babylon, dey start fo go back home. Dey come En Mishpat, da place dey call Kadesh, an dea dey make war wit da Amalek peopo an take ova all dea land. Same ting fo da Amor peopo dat stay Hazazon Tamar side.
Da Babylon Army Guys Grab Lot
Wen da Sodom guys find out dat da Babylon guys coming afta dem, da king guys from Sodom an Gomorrah an Admah, an da king fo da Zebo peopo, an da king guy fo Bela, dass Zo`ar too, dey take dea army guys outa da towns an line um up fo fight inside da Siddim Valley.
Dey all stay waiting ova dea fo King Kedorla`omer from Elam, an King Tida`al da king fo some odda peopos, an King Amrafel from Babylon, an King Ariok from Ellasar, an all dea army guys. Had four king guys an dea army guys coming, an five king guys an dea army guys waiting ova dea fo fight dem.
All ova inside da Siddim Valley, had plenny puka wea da tar come outa da groun. Afta da army guys start fo fight, da ones from Sodom an Gomorrah an dea king guys, dey all go run away from da Babylon army guys. Had some a da Sodom an Gomorrah guys dat fall down inside da pukas wea da tar come out, an dey mahke dea. Da odda guys run away mauka side.
Den da four king guys from Babylon an dea army guys wen go take all da stuffs dat get inside Sodom an Gomorrah, an all dea food, an dey go.
Lot, Abram nephew guy, who dat time stay Sodom side, dey wen take him an all his stuffs too.
Abram Get Lot Outa Trouble
Had one a da Sodom army guys dat wen run away from da place dey fighting. He go by Abram da Hebrew guy an tell wat happen. Dat time, Abram live nea da big trees wea Mamre, da Amor guy, live. Mamre, he get two bruddas, Eshcol an Aner. Da three Amor guys an Abram, dey get deal fo help each odda erytime.
Abram wen find out dat da Babylon army guys wen grab his nephew Lot an make um prisona. Had 318 odda guys dea dat work fo Abram cuz dey wen born inside his ohana, an Abram wen teach um awready how fo fight good. He tell um all fo go out wit him, an dey chase da Babylon king guys an dea army guys, all da way to da place we call Dan.
Night time, Abram wen tell his guys fo split up fo go afta da Babylon guys, so dey can hit um from ery side same time. Abram guys wen go bus up da Babylon guys real good, an chase um all da way Hobah side (dass da odda side Damascus town, you know).
Abram, he wen bring back his nephew Lot an all his stuffs, an da wahines, an da odda peopo, an all da odda tings dat da Babylon guys wen rip off from da odda peopo.
Afta Abram chase King Kedorla`omer an da odda king guys Hobah side, he go home. Wen Abram stay go, da king fo Salem town wen come out talk wit him, Shaveh Valley, da place we call da King's Valley. Da king fo Sodom town, he go dea too.
King Melkizedek, dat was da king fo Salem town, he was one pries fo da God Dass Mo Importan Den All Da Odda Gods. He bring bread an wine fo Abram.
Melkizedek tell God,
“You, da God Dass Mo Importan Den All Da Odda Gods!
Cuz you da One dat wen make da sky an da world.
He erytime do good tings.
Den Abram wen take all da stuffs he bring back an make ten pile, an he give one whole pile to Melkizedek, ten percent.
Abraham Give Back Eryting To Da King Fo Sodom
21But da king guy fo Sodom, he tell Abram, “Eh, jus let da peopo go wit me. Keep all da stuffs fo yoaself!” (He like peopo tink dat he da one dat make Abram come rich, az why he talk lidat.)
But Abram tell da king guy fo Sodom, “No way! Right hea an now, I put up my hand fo make promise to Yahweh, da God Dass Mo Importan Den All Da Odda Gods, da One dat wen make da sky an da world.
I tell God dis: I no goin take even one ting from yoa stuffs. Not even one piece thread o one strap fo one slippa. I no like bumbye you go tell, ‘Eh, no was God -- was me! dat wen make Abram come one rich guy.’
Notting for me, ony da food dat my young guys wen eat awready, an da share fo da odda guys dat wen go wit me -- dass Aner an Eshcol an Mamre. Let dem take dea share.”