Yahweh Go By Abraham
181One nodda time, Abraham wen stay by da big trees, Mamre place. Abraham's God, Yahweh, wen let Abraham see um again. Dis wat wen happen:
Noon time, Abraham was sitting inside da tent door.
2Abraham look outside. Right den an dea, he see three guys standing nea da tent. Wen he see um, he run outside from da tent fo tell um “Aloha!” Den he [wen] go down wit his face on top da groun in front dem, fo show dem respeck. 3He tell da leada guy, “Eh mista, I jalike yoa slave guy. If you like, please stay hea litto bit. Let me give you someting fo eat befo you hele on. 4I goin tell one a da worka guys go get litto bit watta fo wash you guys feets, an you guys can lay down an rest litto bit unda da tree. 5An let me go get litto bit bread. Make you guys feel mo strong, you know. Lata, you can hele on. Cuz you wen come by me, an I jalike you guys slave.”
Dey tell um, “Kay den. Go do jalike you say.”
6Den Abraham wen run back inside da tent an tell Sarah, “Quick! Get da spesho wheat flour, one big pan full, an make nuff bread fo dese guys!” 7He run from dea ova by wea da cows stay. He pick one young cow wit good meat, an tell one young guy dat work fo him fo go kill da cow quick an fix da meat nice. 8He get soft cheese an milk, an da meat from da young cow dey wen kill, an put da food in front da three guys. All da time dey eating, Abraham stand ova dea unda da tree fo make shua dey get plenny.
God Tell Sarah She Goin Get Bebe Boy
(Rome 9:9; 1 Peter 3:6)
9Da guys aks Abraham, “Wea yoa wife Sarah stay?”
Abraham tell, “Ova dea, inside da tent.”
10Den one a dem tell, “Same time, one year from now, I goin come back by you, an garans yoa wife goin get bebe boy!”
Sarah, she stay lissening from inside da tent door, behin Abraham. He was standing in front da tent. 11(Gotta rememba, dey real old, Abraham an Sarah, an Sarah from long time she wen pau her time fo get bebe awready.) 12So Sarah wen laugh inside, cuz she tinking, “Now I all dry up, an my husband, he old too! Dis mean, fo real I goin get bebe an feel good inside, o wat?”
13Den Yahweh tell Abraham, “Eh! How come Sarah stay laugh? She tinking, ‘Fo real, I goin get bebe, me, no matta I real old?’ 14Eh! You tink get stuff dat so hard, Yahweh no can do um, o wat? I goin come back by you nex year, dis same time, an Sarah goin get one boy.”
15Sarah, she scared, so she tell, “I neva laugh!”
But Yahweh tell her, “Not! You wen laugh!”
God Tell Abraham He Goin Wipe Out Sodom Town
(Jesus Guys 3:25; Galatia 3:8)
16Da three guys wen stand up an make ready fo go. Dey wen look down da valley wea Sodom town stay. Abraham, he go wit dem litto bit fo show aloha. 17Yahweh, he tink, “Da ting I goin do now -- I like let um stay secret so Abraham no goin know, o I goin tell him? 18Cuz da peopo dat goin come from Abraham, dey goin come one importan peopo bumbye, wit plenny peopo. All da diffren peopos all ova da world, bumbye wen dey tink bout Abraham, dey goin say, ‘Eh! We like God do good tings fo us guys, jalike he doing fo Abraham!’
19“He da guy I wen pick fo come tight wit me. Dass how I know he goin tell his kids, an da peopo dat work fo him, an da peopo dat goin come from dem, dat dey all gotta live da way I tell um. Den dey can do da right ting erytime an stick wit my rules. Dass how I goin make come fo Abraham da tings dat I wen tell him goin come. So. I goin tell um dis!”
20Den Yahweh tell Abraham, “Abraham! Ova an ova, get peopo aks me fo help dem, cuz da Sodom an Gomorrah peopo so bad. Real heavy kine, da bad kine stuff dey doing! Gotta make um stop! 21I gotta go down dea, fo make shua az fo real da ting da peopo aksing me fo help um wit. If not so bad, I goin find out dat too.”
Abraham Beg God Fo No Wipe Out Da Sodom Peopo
22Da two odda guys, dey hele on from dea fo go Sodom side. But Abraham, he stay standing dea still yet in front Yahweh. 23Abraham talk to Yahweh jalike you talk to one judge: “Eh Boss, can aks you one ting? You goin wipe out da peopo dat stay doing da right ting, togedda wit da peopo dat stay doing bad kine stuff, same time, o wat? 24Suppose get fifty peopo inside da town dat stay do da right ting. You still yet goin wipe out all da peopo from dat place? Mo betta you let um all go, yeah? Cuz get da fifty good peopo inside dea too, you know. 25No can be, dat you goin wipe um all out, da way you wen say! If you kill da peopo dat do da right ting, same time you kill da bad peopo, den dat mean you tink dey not diffren, da peopo dat do da right ting an da bad peopo! No can be! You da Judge fo all da people inside da world. So den, you gotta make diffren kine to da good peopo an to da bad peopo!”
26Yahweh tell, “If get fifty peopo inside Sodom town dat stay do da right ting, I goin let go all da peopo from dat place, cuz a dem.”
Abraham Aks God Some Moa
27Den Abraham tell him, “Look, I like talk some moa to you if you let me. I know you da Boss, an me, I ony one dirt, I notting. 28Suppose no mo da fifty peopo dat do da right ting. Suppose ony get forty-five? You goin wipe out da whole town, jus cuz need five peopo moa?”
Yahweh tell um, “If I find forty-five peopo dea dat stay do da right ting, I no goin wipe out da town.”
29Den Abraham talk mo to Yahweh. He tell, “An if get forty ova dea?”
Yahweh tell, “Den I no do notting, cuz a da forty good peopo.”
30Den Abraham tell Yahweh, “Eh! No come huhu wit me, no matta you da Boss. But I ony goin aks you dis: suppose you can find thirty peopo ova dea dat do da right ting?”
Yahweh tell um, “If I find thirty peopo dea, I no do notting.”
31Abraham tell, “I like try one mo time, cuz you da Boss. Suppose get ony twenty ova dea?”
Yahweh tell, “Fo da twenty peopo, I no wipe um out, cuz a dem.”
32Den Abraham tell, “Boss, dis da las time I goin talk, so, no come huhu, yeah? Suppose ony get ten ova dea?”
Yahweh tell, “Fo da ten good peopo, I no wipe out da oddas.”
33Afta Yahweh pau talk wit Abraham, he hele on Sodom town. Abraham, he go back his place.