Abraham An King Abimelek
201Abraham move house from da place he stay an go sout to da Negev land. He put up his tents in da middo Kadesh town an Shur town. Afta dat, he go Gerar town fo live short time. 2Wen he dea, Abraham tell bout his wife Sarah, “Dis my sista.” So Abimelek, da king guy fo Gerar, he go take Sarah fo come his wife.
3But one nite, God wen go by Abimelek an make um dream. Inside da dream God tell um, “You know wat you doing? You mahke awready, cuz you wen take dat wahine Sarah, an she get husband awready.”
4But Abimelek, he neva even go nea her yet. He tell God, “Eh, you da Boss! So, you goin kill me an my peopo too, o wat? Cuz we neva do notting wrong. 5Abraham da one wen tell me, ‘Dis my sista’! An da wahine tell me da same ting, ‘Dass my brudda’. Da ting I wen do, no can poin finga me, cuz inside me, I no tink I stay do notting bad cuz a dem. An I neva do notting!”
6Inside da dream, God tell Abimelek, “I know, no can poin finga you fo dat, cuz inside, you neva like do notting bad. Dass why I neva let you go do notting bad agains me. Az why I neva let you touch her. 7Wat you gotta do, you gotta give da wahine back to her husband. He one talka guy fo me, you know. Den he goin pray fo you, an you can stay alive. But if you no like give her back, you goin mahke fo shua, you an all yoa peopo.”
8Da nex morning, Abimelek get up early an tell all da guys dat work fo him fo come by him. He tell um eryting dat wen happen. Dey wen come real scared.
9Den Abimelek tell Abraham fo come. He tell Abraham, “Wass up? No good, dis ting you do to us! I neva do notting bad to you! But you wen make to me so I wen go do one real bad ting, an now God goin punish me an all my peopo. 10So! Wat kine guy you wen tink me, hah? dat make you make lidat to me.”
11Abraham tell, “I ony was tinking lidis: No mo nobody dis place dat get respeck fo God. Fo shua dey goin kill me so dey can take away my wife. 12Plus, she my sista fo real kine, you know. Us get da same fadda, but diffren mudda. Den, she wen come my wife. 13Dass why, wen God wen make me go way from da place wea my fadda guy stay, I tell her, ‘Eh! Me an you, we gotta stick togedda, you know. Get one ting I like you do fo help me. Ery place we go, tell da peopo dat I yoa brudda guy.’-”
14Cuz a dat, Abimelek, he bring togedda plenny sheeps an cows an slave peopo, guys an wahines. He give um to Abraham, an he give Abraham's wife Sarah back to him. 15Abimelek tell Abraham, “Look. I get plenny land dis side. You can live any odda place you like.”
16Den Abimelek tell Sarah, “In front erybody, I giving yoa brudda guy tousand piece silva. I do dat so erybody know you neva do notting wrong, an from now eryting okay fo all you guys an me.”
17-18All da time Sarah stay Abimelek house, Yahweh neva let da wahines dea come hapai, cuz a Sarah. Den Abraham pray to God fo Abimelek peopo. So afta Abraham aks God, God make Abimelek an his wife come good so she can get kids, an same ting fo all da slave wahines inside Abimelek house.