Lata, Yahweh wen take care Sarah, jalike he wen make promise fo do. He do good ting fo her.
Sarah wen get hapai. Az jalike da God Yahweh wen tell Abraham befo time, dat he goin give um one boy. She born da boy fo Abraham wen he real old awready.
Abraham, he give da name Isaac to da new bebe, da boy dat Sarah wen born fo him. (Dat name mean “Laugh.”)
An wen Isaac eight day old, Abraham cut skin, jalike God tell um he suppose to do.
Da time wen Isaac born, Abraham hundred year old awready.
“God make me so I feel good inside an laugh now,
Erybody dat find out bout dis goin feel good an laugh jalike me!
Cuz you know, befo time nobody tink I can get bebe.
‘Eh! Sarah get yoa bebe fo nurse!’
8Da boy Isaac wen come mo big, an his mudda pau nurse him. Abraham wen make big bebe lu`au fo Isaac, da time his mudda pau nurse him.
Dat time, Sarah wen see Ishmael, da boy dat Hagar da wahine from Egypt wen born fo Abraham. Da two boys, dey stay playing togedda.
Sarah tell Abraham, “You gotta throw out dat slave wahine an her boy! No way dat slave wahine's boy goin get some a yoa stuffs afta you mahke! My boy Isaac, he goin get um all!”
Wen bodda Abraham plenny, da ting Sarah wen say. Cuz Ishmael his own boy too.
But God tell Abraham, “No need stay sore inside cuz a da boy an yoa slave wahine. Wateva Sarah tell you fo do, lissen to wat she tell. Cuz bumbye, wen dey talk bout da peopo dat come from you, dey mean da peopo dat goin come from Isaac, not from Ishmael.
An you know, fo da slave wahine's boy, I goin make one peopo come from him too, cuz he come from you.”
Abraham get up early da nex morning, an go get food an one goat skin all sew up fo carry watta. He give um to Hagar, an help her put da food an da watta on top her back an da boy's back. Den, he make her an da boy go way from dea.
Hagar an da boy go da boonies, Beer-Sheba side, an dey go hea an dea but dey neva know wea dey going.
Wen da watta pau inside da goat skin, she leave da boy unda da shade a one a da bushes dea.
Den Hagar go mo down, like hundred yard. She sit down ova dea da odda side, cuz she tinking, “I no can handle fo see my boy die!” An she bus out crying.
Same time, da boy pray to God, an God lissen to him. One angel messenja guy from God call to Hagar from da air. He tell her, “Hui! Hagar! Wass up wit you? No scared! Cuz da boy wen pray ova dea, an God, he lissen awready.
Stand up! Go by Ishmael an put yoa arms aroun him! You gotta take good care him so notting bad happen. Cuz da peopo dat goin come from him, I goin make dem come one important peopo!”
An den, God let Hagar see dat get one puka wit watta inside. She go dea an put da goat skin down inside da puka an fill um up. Den she pull um up an give da boy fo drink.
From dat time, an wen Ishmael come big, God help him plenny. Lata, he go live inside da boonies, an he come good fo use da bow an arrow fo hunt.
Da time Ishmael stay live inside da boonies Paran side, his mudda go Egypt side, an she bring back one wahine from dea fo come Ishmael wife.
Had one time, King Abimelek an his main army guy Pikol come talk wit Abraham. Abimelek tell Abraham, “Eryting you do, God stay wit you an he help you.
So now, I like you make one strong promise fo me an swea to God right hea an now. Promise dat you no goin bulai me o trick me, an same ting fo all my ohana peopo an erybody dat goin come from me bumbye. Promise dat wateva you do wit me an wit da land wea you making house, you goin stick wit me an stay my friend, jalike eryting I wen do wit you, I wen stick wit you an stay yoa friend.”
Abraham tell, “I promise an I swea to God.”
But lata, Abraham gotta go talk wit Abimelek, cuz had guys dat work fo Abimelek who wen take ova one puka fo watta dat Abraham guys wen dig befo time.
Abimelek, he tell, “Eh, I donno wat guy wen do dis. An you neva say notting befo time, an I neva hear notting till today.”
Abraham take sheeps, goats, an cows an give um to Abimelek, an da two guys make deal fo share da watta.
Same time, Abraham wen put seven bebe sheeps, girl kine, one side.
Abimelek aks um, “Eh, da seven bebe sheeps, girl kine, dat you wen put ova dea, how come?”
Abraham tell um, “I like you take dis seven sheeps from me, fo make proof fo me in front erybody dat you know was me dat wen tell my guys fo dig da puka, so bumbye no goin get mo problem fo us use da watta.”
So da two guys wen make strong promise to each odda. Dass how come dey call dat place Beer-Sheba, dat mean “Da Seven Sheep Puka,” an same time, “Da Puka Wit Da Promise.”
Afta dey make da Beer-Sheba promise, Abimelek an his main army guy Pikol, dey go home. (Dass da same land wea da Filisha peopo live nowdays, you know.)
Abraham, he wen go plant one ironwood tree ova dea Beer-Sheba side. Dat place, he wen tell Yahweh, “Eh! You, da God Dat Stay Foeva! I like you help me, cuz I know wat kine God you!”
An Abraham wen live long time, ova dea inside da land wea da Filisha peopo live nowdays.