God Check Out Abraham
(Matthew 3:17, 17:5; Mark 1:11, 9:7; Luke 3:22, 9:35; 2 Peter 1:17)
221Long time afta, God wen go check out Abraham. He tell um, “Eh Abraham!”
Abraham tell, “Yeah, wat you like?”
2God tell um, “Go get yoa boy Isaac, da ony one you get, da one you get plenny love an aloha fo him. Take um an go Moriah side. Wen you get dea, I goin show you one a da hills ova dea. Take yoa boy on top dat hill, an kill um dea, fo make da kine sacrifice wea you burn up da whole ting.”
3Da nex morning, Abraham get up early an put saddle on top his donkey. Den he chop wood fo burn da sacrifice, an put um on top da donkey. Den he start fo go da place God wen tell um, him an his boy Isaac an two young worka guys. 4Day numba three, Abraham look, an he can see da place, far still yet. 5Abraham tell his worka guys, “Kay den. You guys, stay wait hea wit da donkey. Me an my boy, we going ova dea. Dass da place we goin go down in front God fo show him love an respeck. Den, we come back by you guys.”
6Befo dey go, Abraham take down from da donkey da wood fo burn da sacrifice. He put um on top his boy Isaac back fo carry um. Abraham wen carry one pot wit hot charcoal inside, an da knife in da odda hand. Abraham an Isaac wen go on top da mountain togedda. 7Afta dey go litto bit, Isaac, he aks: “Eh Dad!”
Abraham answa him, “Yeah, my boy?”
Isaac aks um, “Eh look! Get da stuff fo make da fire, an get da wood fo burn. But wea da sheep fo make da sacrifice?”
8Abraham tell um, “My boy, God da One goin give da sheep fo da sacrifice.” Den dey go some moa togedda.
(James 2:21)
9Den dey come da place God wen tell Abraham. Abraham pile up rocks ova dea fo burn da sacrifice on top. He put da wood on top da alta. Den he go tie up his boy Isaac an put him on top da alta, on top da wood. 10Den Abraham pick up da knife, fo kill his own boy. 11Right den one angel messenja guy from Yahweh yell to him from da air, “Hui! Abraham!”
Abraham tell um, “Yeah! I stay lissen.”
12Yahweh tell um, “Put down da knife, no hurt da boy! No do notting to um. You was ready fo kill um cuz az wat I tell you fo do! But now, I know fo shua dat you get plenny respeck fo me, yoa God. Cuz you neva even hold back from me da ony boy you get, az why.” 13Right den an dea, Abraham look up. He see one big sheep, boy kine, dat get da horn stuck inside da bushes an no can get out. Abraham go pull da sheep outa da bushes, an take him to da altar. He kill um fo make da sacrifice, an burn up da whole body. Da sheep take place fo da boy.
14Afta, Abraham give dat place da name Yahweh Yir`eh. Dat mean, “Yahweh Give Wat I Need.” Nowdays peopo say still yet: “On top da mountain wea Yahweh stay, God awready give us wat we need.”
(Jesus Guys 3:25; Galatia 3:8; Hebrews 6:13-14, 11:12)
15Da messenja guy from da sky, dat was Yahweh! He talk to Abraham from da air one mo time. 16He tell, “Eh! I Yahweh, an I like make one strong promise to you. No mo odda guy mo big den me, you know. Dass why I no goin make one promise an say dat some odda guy goin make shua I really goin do um. Me, I make dis promise an I da one dat make shua I really goin do wat I say.
“So, dis da promise I make: Cuz you wen do dis ting, an you neva hold back yoa own boy, da ony one you get, 17I goin make eryting come good fo you, fo real kine. Da peopo dat goin come from you bumbye, I goin make dem come choke plenny peopo, jalike get plenny stars inside da sky an plenny sand on top da beach. An dey goin take ova da towns wea da peopo dat stay agains dem live. 18All da diffren peopos all ova da world, bumbye wen dey tink bout da peopos dat come from you, dey goin say, ‘God do good tings fo us, cuz a da Abraham ohana!’ Dey goin say dat, cuz today, you wen do wat I tell you fo do.”
19Den Abraham an Isaac wen go back by da worka guys, an dey all go home togedda Beer-Sheba side. Dass da place Abraham wen live, dat time.
Abraham Nephew Guys
20Lata, somebody wen tell Abraham, “Eh! You know yoa brudda Nahor? Him an his wife Milkah, dey get kids now! 21Uz, he da numba one. Afta him get his brudda Buz. Den get Kemu`el, dat get one boy Aram awready. 22An Nahor get odda kids Kesed, Hazo, Pildash, Yidlaf, an Betu`el.” 23(Betu`el, he Rebecca fadda.) Dass eight boys dat Milkah wen born fo Nahor, an Abraham dea uncle. 24Nahor wen marry one nodda wife, her name Reumah. She get kids too: Tebah, Gaham, Tahash, an Ma`akah.