Rachel Give Her Slave Girl To Jacob
301All dat time, Rachel see dat she no can born kids fo Jacob. Stay blow her mind, cuz her sista get kids an her no mo. So Rachel tell Jacob, “Eh! Give me kids! If I no mo kids, fo shua I goin come so plenny shame dat I goin mahke!”
2Jacob come huhu wit Rachel. He tell: “Wot! You tink I da one doing dis, o wat? God, he da one dat no let you get bebe, not me!”
3Rachel tell, “Kay den. Da slave wahine Bilhah dat work fo me, go sleep wit her. Den she goin born kids fo hanai dem to me. Az how I goin start anodda ohana dass mines, from her.” 4Dass how come Rachel wen give Bilhah to Jacob fo come jalike one nodda wife. Jacob sleep wit her, 5an Bilhah come hapai an born one boy fo Jacob.
6Den Rachel tell: “God make dis come right fo me awready, cuz he da judge. He wen lissen wat I aks um fo do. an he give me one boy.” Dass why Rachel call da bebe Dan, cuz sound kinda like “make um right,” dea language.
7Den da slave wahine Bilhah dat work fo Rachel come hapai one mo time. She born one nodda boy fo Jacob. 8Rachel tell, “I wen struggle plenny wit my sista awready, an now I stay win.” She call dat bebe Naftali, cuz sound kinda like “struggle,” dea language.
Da Odda Slave Girl Get Kids Fo Leah
9Leah, she see dat now she pau get bebe. So she take da slave wahine Zilpah dat work fo her, an give her to Jacob fo come jalike one nodda wife fo him too. 10Den Zilpah, da one dat work fo Leah, she born one boy fo Jacob. 11Leah tell, “Eh, good ting happen fo me!” Dass how come she call da boy Gad, cuz sound kinda like “good ting happen,” dea language.
12Lata, da wahine Zilpah born one nodda boy fo Jacob. 13Dat time Leah tell, “Now I stay feel good inside!” She tinking, “Now, da odda wahines goin see I stay feel good inside!” Dass how come she wen call dat boy Asher, cuz sound kinda like “feel good inside,” dea language.
14One time, dey cutting da wheat, an Reuben find some love apple root plants inside da boonies, dat peopo tink help da wahines fo get kids. Reuben bring um by his mudda Leah. Rachel, she tell Leah, “Please, give me some a da love apple root dat yoa boy wen find.”
15Leah tell, “Wot! No big deal fo you take away my husband! An den now, you like take some a da love apple root too, dat my boy wen bring!”
Rachel tell Leah, “Kay den. You give me some a dat love apple root dat yoa boy wen bring, an tonite, I let Jacob sleep wit you.”
16Sun down time, Jacob stay coming home from da place wea dey cutting da wheat. Leah go meet him. She tell him, “I da one you sleep wit tonite. My boy wen get love apple root, an I give some to Rachel fo pay fo you sleep wit me!” So dat nite, Jacob sleep wit Leah.
Leah Get Her Las Kids
17God lissen to wat Leah wen aks um fo do. She come hapai, an she born her numba five boy fo Jacob. 18Den Leah tell, “God, he pay me good kine, cuz I wen give da slave wahine dat work fo me to my husband.” Dass how come Leah give da boy da name Issachar, cuz sound kinda like “pay good kine,” dea language.
19Den, Leah come hapai one mo time an born her boy numba six fo Jacob. 20Leah tell, “God give me nice kine present. An now, my husban goin make me da wife he get plenny respeck fo, cuz I give him six boys awready.” Dass how come Leah give da boy da name Zebulon, cuz sound kinda like “plenny respeck,” dea language. 21Lata, Leah come hapai an born one girl fo Jacob. Leah give her da name Dinah.
God Give Rachel Kids
22Den God wen tink bout Rachel. God lissen, an make her so she can get bebe too. 23Rachel come hapai an born one boy. She tell, “God take away my shame awready, from all da time I no can have kids.” 24Rachel give da boy da name Joseph, cuz she say, “I like Yahweh give me one nodda boy too,” an da name “Joseph” sound kinda like “give some mo,” dea language.
Jacob Like Go Home
25Afta Rachel born Joseph, Jacob tell Laban, “I like you let me go back home now, my own land. 26Let me take my wifes an my kids, an go. I wen work hard fo you awready fo get dem, an you know all da work I wen do fo you pay back fo dem awready.”
27But Laban tell um, “I no like you go, but I like tell you one mo ting, cuz I yoa friend. I know I stay rich awready, an Yahweh do plenny good kine stuff fo me, cuz a you. 28Jus tell me how much I owe you if you work mo fo me, an I goin pay you.”
29Jacob tell, “You know how many years I wen work fo you, an see how good yoa cows an sheeps an goats stay cuz I take good care a dem. 30Befo I come hea, you ony had litto bit, you know, but now you get plenny. Ery place I go, Yahweh make eryting come out good fo you. But, wat bout me? Az time awready, I gotta do someting fo my own ohana peopo now.”
Jacob Pick Da Sheeps An Goats Dat Laban No Like
31Laban tell, “Kay den. How much you like me pay you?”
Jacob tell um, “You no gotta pay me notting. Ony do dis one ting fo me, an I goin take care yoa sheeps an goats jalike befo time. 32Today, let me walk thru all yoa sheeps an goats, an pull out ery young sheep an young goat dat get litto spot o big spot on dem, plus, all da brown color sheeps, boy kine an girl kine. Give dem to me, an az how you goin pay me. 33An bumbye, you know an can tell dat I make strait wit you. Cuz wen you go look da animals I wen get, if get one goat ova dea dat no mo spots on top, o if get one sheep dat not brown color, den you know dat I wen steal dat one from you.”
34Laban tell, “Kay den. Goin be jalike you tell me.” 35Dat same day, Laban guys wen go get all da boy kine goats dat get twist kine tail o stripe on top, an all da girl kine goats dat get spots on top wit litto bit white, an all da brown color sheeps. He tell his boys fo take um all away from dea. 36Laban dem wen take all dat kine sheeps an goats far way, jalike three days away from wea Jacob stay. Wen dey doing dat, same time, Jacob taking care all da odda sheeps an goats fo him.
Jacob Come Rich From Da Sheeps An Goats
37But Jacob go cut shoots from da poplar tree, an da almond tree, an da plane tree. He hemo da bark litto bit from on top da shoots so da white wood undaneat da bark look jalike stripes. 38Den Jacob put da sticks wit da white stripes standing up inside da trough fo watta, right in front da place wea da girl kine sheeps an goats come fo drink watta. Dey stay in heat wen dey go dea fo drink. 39An cuz dey in heat dea in front da sticks wit da white stripes, da bebe sheeps an goats born wit twist kine tail, an wit stripes an spots all ova. 40Da boy kine sheeps, Jacob keep dem one side. But da girl kine, he let um go breed ony wit Laban sheeps dat get stripes an brown color. Dass how he wen set um up so all da bebe sheeps come out his kine sheeps. But he make his own boy kine sheeps stay one side an neva let dem go wit da odda sheeps dat Laban get.
41Jacob wen do one nodda ting: erytime da strong girl kine animal come in heat, Jacob put da sticks wit da stripes inside da watta trough wea da animals can see um good, so dey breed ova dea in front da sticks. 42But wen da animals dat in heat not strong, den Jacob no put da sticks dea. Dat way, Laban get all da not strong animals, an Jacob get all da strong animals. 43Dass how Jacob come real rich, wit plenny sheeps an goats, an plenny camels an donkeys, an plenny slave guys an wahines dat work fo him.