Jacob Make Ready Fo Meet Esau
321Jacob go hele on again. Had angel messenja guys from God wen see um ova dea. 2Wen Jacob see dem, he tell, “Dis place, az God's place, an dey God's angel army guys fo shua.” Dass how come he give dat place da name Mahanaim, cuz sound kinda like “Two Camping Place,” dea language.
Jacob Send Messenja Guys By Esau
3Den Jacob send messenja guys fo go by his brudda Esau, Edom side, Se`ir land, befo Jacob get dea. 4Jacob tell um dis: “I like you tell my boss Esau, ‘Aloha from Jacob yoa slave. Jacob like tell you dis: “I wen live Laban house till now. 5An now, I get plenny cows, donkeys, sheeps, an goats, plus slave guys an wahines dat work fo me. I send dese messenja guys to you, cuz you my boss, an I like tell you I stay coming an you make us feel good.”-’-”
6Da messenja guys go ova dea. Den dey come back by Jacob. Dey tell um, “We wen go by yoa brudda Esau. He stay coming by you now, an he get four hundred odda guys stay come wit him.” 7Jacob, he plenny scared. Bodda him plenny. Az how come he tell half da peopo dat wit him, fo camp out one side, an he tell da odda half fo camp out da odda side, an same ting wit da sheeps an goats, da cows an da camels. 8He make lidat cuz he tinking, “If Esau come da one side an bus um up, maybe da guys dat stay da odda side can run away.”
9An Jacob tell God, “Eh God! You da God fo my granfadda Abraham, an fo my fadda Isaac. You Yahweh, da One wen tell me: ‘Go back yoa own land wea yoa ohana stay, an I goin make good tings happen fo you.’ 10Me, I not one importan guy. But you stay stick wit me cuz I yoa guy, an I know I can trus you erytime fo hang in dea wit me, yoa slave guy, jalike you wen tell me befo time. Cuz wen I go da firs time an I go cross dis Jordan Riva, I no mo notting. Da ony ting I had was one walking stick. Now, I get plenny nuff peopo fo fill up two camp.
11“Now I stay aks fo yoa kokua, fo get me outa trouble from my brudda Esau. Cuz I stay scared a him, you know. No good he come hea an bus me up, me an da wahines an dea kids, erybody. 12You wen make promise to me awready, ‘Fo shua, I goin do plenny good kine stuff fo you. I goin make da peopo dat goin come from you come so plenny, dat no can count, jalike da sand on top da beach.’-”
13Jacob dem stay dea dat nite. Da nex day, Jacob pick stuff from wat he get wit him, fo make one present fo show respeck fo his brudda Esau. 14He pick 200 goats, girl kine, an 20 goats, boy kine. Den he pick 200 sheeps, girl kine, an 20 sheeps, boy kine. 15He pick 30 camels, wahine kine dat giving milk to dea bebes, an dea bebe camels, plus 40 cows an 10 young bulls, an 20 donkeys, girl kine, an 20 donkeys, boy kine. 16He tell his worka guys, “Ery one a you guys, take one bunch animals an go wit dem. But from one bunch animals to da nex bunch, wait short time fo go, so dey all no go same time. Bumbye I go too.”
17He tell da worka guy dat going firs, how he gotta make. He tell um, “My brudda Esau goin see you, an he goin aks you, ‘Eh! Who yoa boss guy? Wea you going? Dis animals you taking, who da owna?’ 18Den you tell my brudda dis: ‘All dis animals, az from Jacob, yoa slave guy. He stay send um fo present fo show respeck fo my boss Esau. Jacob, he goin stay come bumbye.’-”
19Jacob tell da numba two worka guy fo do same ting, an same ting fo da numba three guy an all da odda guys dat going wit da animals. He tell all dem, fo tell Esau same ting wen dey see um. 20He tell um fo say dis too: “Yoa slave guy Jacob, he stay come afta us guys.” Cuz Jacob tinking, “I goin send present befo I get dea, den maybe dat make um, he not so plenny huhu wit me wen I see um. Maybe he let me go.” 21So all da animals fo make present wen go ahead, but Jacob dem, dey stay da place dey wen camp out dat nite.
Jacob Meet God
22Nite time, Jacob get up, an take his two real wifes, an da odda two wifes, an his eleven kids. He tell um all fo go cross da Jabbok Stream togedda, one place you can go cross. 23Afta all dem go da odda side da stream, Jacob tell his worka guys fo take all his stuffs da odda side. 24He da ony guy dat stay dea, all by himsef.
Had one guy dea dat wen come an wrestle wit Jacob all nite till start fo come litto bit light. 25Wen da guy see dat he no goin win, he hit Jacob, da place wea da leg go inside da hip bone, an he pull da leg bone outa da hip bone.
26Da guy tell Jacob, “Let me go! Get litto bit light awready.”
Jacob tell da guy, “No way I goin let you go. You gotta give me one blessing firs, fo make good tings happen fo me. Den I let you go.”
27Da odda guy tell, “Wat yoa name?”
Jacob tell, “Jacob.”
28Da odda guy tell, “From now, yoa name no goin be Jacob. Yoa name Israel now, cuz you make fight wit God an wit peopo, an you win.” (“Israel,” dat mean “make fight wit God,” dea language.)
29But den Jacob aks da guy, “Please, tell me wat yoa name.”
But da guy tell, “Why you like know? No good you aks me dat!” Right den an dea, da guy wen give Jacob one blessing fo make good tings happen fo him.
30Jacob give dat place da name Peni`el, dat mean, “God's face.” Cuz he tell, “I wen see God! I wen look his face, an I alive still yet!” 31Jacob hele on. Wen he go by Peni`el, da sun come up. But Jacob no can walk good cuz a da hip. 32(Dass how come da Israel ohana peopo, nowdays, wen dey eat meat, dey no eat da part wea da leg bone go inside da hip bone, cuz dass da place wea da guy wen hit dea ancesta Jacob dat nite.)