Da Rape
341Jacob had one daughta, her name Dinah. Leah wen born her fo Jacob. One time Dinah go holoholo fo make visit wit some a da wahines dat live dea. 2Da main guy, dat land, was Shekem, Hamor boy from da Hiv peopo. He spock Dinah, an he take her an rape her. 3Den, Shekem wen start fo feel plenny love fo Dinah, Jacob daughta. So he make nice to her. 4Shekem tell his fadda Hamor, “I like you get me dis girl, fo come my wife.”
Da Fadda Like Make Deal
5Jacob find out dat Shekem wen make pilau kine to his daughta Dinah. But his boys stay inside da boonies wit da cows, dat time. So Jacob neva say notting till afta da boys come home. 6-7Shekem fadda guy Hamor wen go outa da town fo talk wit Jacob. He get dea, same time Jacob boys come back from inside da boonies, cuz dey wen find out. Bodda dem plenny, an dey plenny huhu, cuz Shekem ack stink wit da Israel ohana wen he make lidat wit dea sista. Dat not da kine ting suppose to do.
8Hamor talk wit Jacob an his boys. He tell dem, “My boy Shekem, he get plenny love inside his heart fo yoa daughta an he like marry her. Please, give her to him fo come his wife. 9We make deal so you guys can marry our daughtas, an us can marry yoa daughtas, yeah? 10You guys can live inside dis land wit us, any place you like live, any place you like go. You guys can make house hea, dis land.”
11Den Shekem talk to Dinah fadda an brudda guys too. He tell um: “I like you guys make good to me. I pay wateva you guys tell me. 12No matta how plenny stuffs you guys aks me so I can marry da girl, I give you dat, an I give you guys presents too. I like pay wateva you guys tell me. Just give me da girl fo come my wife!”
Da Plan
13Wen Jacob boys answer Shekem an his fadda guy Hamor, dey ony bulai-ing dem. Dey talk lidat cuz a wat Shekem wen do to dea sista Dinah. 14Jacob boys tell Shekem guys dis: “Us guys, we no can give our sista to one guy dat neva cut skin. Cuz fo our ohana, shame she marry one guy who neva cut skin. 15Ony one way we make deal wit you guys. If you guys come jalike us guys, an ery guy from yoa ohana cut skin, den okay. 16Den you guys can marry our daughtas, an us guys goin marry yoa daughtas, an us can live hea, an all goin come jalike one ohana. 17But if you guys no like lissen fo go cut skin, den us guys goin take her an go way.”
18Hamor an his boy Shekem, right away dey figga, az good deal, dat. 19Da young guy Shekem, he no wait. Right away he do how dey tell um, cuz he like Jacob daughta plenny, an he da main guy fo all da Hamor ohana. 20So Hamor an his boy Shekem, dey go da place by da town gate wea da importan peopo hang out, an dey talk to da odda guys from dea town dat stay dea. Dey tell, 21“Dis peopo, dey our friend. Dey no goin make fight wit us guys, you know. Good dey stay live dis land, an go any place dey like, cuz ova hea get plenny land fo dem. Good we can take dea daughtas fo come our wifes, an we give dem our daughtas too. 22But fo make deal wit dem fo live wit us guys an come jalike one ohana, all us guys gotta cut skin jalike dem. 23An if we do dis, dea cows an dea stuffs an all dea animals, all dat goin be fo us guys! Fo dem make house wit us guys, ony get da one ting we gotta say we goin do, jalike dey tell us.”
24So all da guys from da town dat stay old nuff fo dea army lissen to Hamor an his boy Shekem. Dey all cut skin.
Jacob Boys Bus Up Da Shekem Peopo
25Numba three day afta da Shekem guys cut skin, dey still sore. Simeon an Levi, Jacob boys an Dinah brudda guys, dey take dea swords an go inside da town, an nobody know dey coming. Dey kill all da guys. 26Hamor an his boy Shekem, dey kill dem too wit swords. Den Simeon an Levi take Dinah outa Shekem house an go back dea place.
27Jacob odda boys, dey go da town wea da mahke bodies stay, an steal eryting from da mahke guys houses, all ova da town, cuz az wea dea sista wen get rape. 28Jacob boys take all da sheeps an goats an cows an donkeys, eryting dat get inside da town an outside da town. 29Dey take all da money an da stuffs, an all da kids an da old peopo, an da mahke guys wifes, eryting inside dea houses. Jalike one army, dey take da wahines an da kids, an dey steal eryting from inside dea house.
30Lata, Jacob tell Simeon an Levi, “You guys! Cuz a you, erybody goin make jalike I kapu! Now, da peopo dat live inside dis land, da Canaan peopo an da Periz peopo, dey goin make to me like I one stink kine guy. I no mo plenny guys wit me, you know. So if dey come togedda fo fight me, dey goin bus me up fo real kine an wipe me out, me an my ohana.
31But da boys tell Jacob, “Wot! You tink az okay fo dem make to our sista jalike she one wahine dat fool aroun fo money, o wat? No way!”