Jacob Move House Bethel Side
351Had one time, God tell Jacob, “Go move house Bethel side. Live ova dea. Make one altar dea, fo pray to me. I da same God dat wen let you see me inside one dream, da time you wen run away from yoa brudda Esau.”
2Jacob tell his ohana peopo an all da odda peopo dat was wit him, “All da idol gods you get from odda place, throw um out! Throw way all da kine stuff dat make you so you no can pray to God. Change yoa clotheses. 3We going Bethel side now. I goin make one altar ova dea fo God. He da God dat lissen to me, dat time I get plenny trouble. Ery place I stay go, dat God stay wit me.” 4So da peopo give Jacob all da idol gods from odda place dat dey get wit dem in dea house, an da rings from dea ear. Jacob bury all dat stuff unda da big tree dat stay nea to Shekem. 5Wen Jacob dem start fo go way from Shekem, God make da peopo inside all da odda towns aroun dea come real scared, so dey no go afta da Jacob ohana peopo fo kill um.
Jacob Pray To God Bethel Side
6Dass how wen happen, da time Jacob an all da peopo wit him go Luz, da place dey call Bethel nowdays, inside da Canaan land. 7Jacob make one altar dea. He call da altar place El-Bethel, dat mean “Da God Dat Stay Bethel Side,” dea language. Cuz dat, da same place dat God let Jacob see um, da time Jacob wen run away from his brudda.
8Dat time, Deborah mahke. Her da wahine dat take care Rebecca from small bebe time. Dey bury her unda da big tree nea to Bethel. Dey give dat tree da name Allon-Bakut, dat mean “Da Oak Tree Wea Peopo Cry,” dea language.
God Give Jacob New Name
9God let Jacob see him one mo time, wen Jacob coming back from da Paddan Aram land. God give Jacob da powa fo come out good. 10God tell Jacob,
“You, yoa name Jacob,
But from now, yoa name no goin be Jacob.
Yoa name Israel now.”
Dass how God give um da name Israel, dat mean jalike “Fight Wit God,” dea language.
11God tell Jacob dis too,
“Me, I da God Dat Get All Da Powa.
I like you come plenny peopo in da world.
One peopo, an plenny odda peopos,
Dey all goin come from you.
Even goin get king guys dat going come from yoa ohana too.
12Da land dat I wen give to Abraham an Isaac
I give you dat same land.
Da peopo dat going come from you bumbye,
I give dem dat land too.”
13Den, God go way from da place wea he stay talk wit Jacob. 14Jacob put up one big rock jalike one pos, dat place wea God wen talk wit him. Den he pour wine on top, an olive oil, fo make sacrifice fo God on top da rock. 15Da place wea God talk wit Jacob, Jacob give um da name Bethel, dat mean, “God's House,” dea language.
Rachel Mahke
16Afta dat, Jacob dem go way from Bethel. Dat time, Rachel hapai. Wen dey stay coming nea to Efratah town, Rachel stay ready fo born her bebe, but hard, an she no can. 17Wen hurt plenny fo born da bebe. Da wahine dat stay help Rachel tell her, “Eh, no scared! You get one nodda boy.” 18Rachel stay litto mo mahke. But jus befo she mahke, she give da bebe da name Ben-oni, dat mean “Da Boy Dat Make Me Cry Jalike Funeral Time,” dea language. But Jacob, da fadda, he give um da name Benjamin, dat mean “Da Boy Dat Spesho Fo Me,” dea language.
19Dass wat happen wen Rachel mahke. Dey bury Rachel nea da road dat go by Efratah town, dass Betlehem. 20Jacob put up one big rock jalike one pos on top da grave. Still yet, get dat Pos Fo Da Place Dey Bury Rachel.
Jacob Kids
21Lata, Israel move house one mo time. He put up tent da odda side Migdal-Eder. 22Da time Israel stay dat side, Reuben wen go sleep wit Bilhah, dat was his own fadda odda wife. Israel, he find out.
So, Jacob had twelve boys. 23Leah was da mudda fo Jacob's numba one boy Reuben, den Simeon, an Levi, an Judah, an Issachar, an Zebulun. 24Rachel was da mudda fo Joseph an Benjamin. 25Bilhah, da slave wahine dat wen work fo Rachel, was da mudda fo Dan an Naftali. 26Zilpah, da slave wahine dat wen work fo Leah, was da mudda fo Gad an Asher. Dass Jacob boys, dat wen born Paddan-Aram side fo him.
Isaac Mahke
27Jacob come home by his fadda guy Isaac, Mamre side, nea Kiriat-Arba town, da one dey call Hebron nowdays. Dass da same place wea Abraham an Isaac live befo time, but dey not from dat place. 28Isaac, he live 180 year. 29Den Isaac mahke afta dat, an go da place wea his ancesta peopo stay. Isaac boys, Esau an Jacob, dey bury Isaac.