Joseph Work Fo Potifar
391Now, come back to da guy Joseph. Had one Egypt guy Potifar, one a da head guys dat work fo da king, Egypt side. He stay in charge a da army guys dat kill da prisonas dat gotta mahke. Afta da Ishmael guys take Joseph ova dea, dey sell um to Potifar. 2Dass how come Joseph stay Potifar house, da Egypt guy, cuz Potifar wen buy him.
Yahweh, he stick wit Joseph an help um come one good worka fo Potifar. 3Da owna guy, Potifar, he see dat, an know dat Yahweh stay make Joseph so eryting he do come good. 4Az why Potifar like Joseph plenny. He make Joseph his own right hand guy. He make um in charge a eryting inside da house dea, an eryting he get. 5From da time da Egypt guy wen make Joseph in charge, Joseph God Yahweh wen make eryting come out real good, inside da house an inside da fields, an eryting Potifar own, cuz a Joseph. 6Potifar neva even make Joseph show him da receipts. Da ony ting Potifar even tink bout was wat kine food he like eat nex time.
Potifar Wife an Joseph
Joseph, he was one good looking guy. 7So afta Joseph do all dat kine stuff, an cuz he good looking, Potifar wife wen like him. She tell um, “Come! We go bed togedda.”
8But Joseph, he no like. He tell Potifar wife, “No way! Tink bout my boss. Wit me hea, da boss no even make me show him da receipts fo da house. He let me take ova eryting dat he own. 9Inside dis house, no mo nobody mo important den me. Ony one ting he hold back from me -- dass you, cuz you his wife! An you tink I goin do dat to him?! No way I goin go agains God an do dis real bad ting you talking bout!” 10Ery day, she talk to Joseph lidat, fo try make um go bed wit her o hang out wit her. But Joseph no lissen, an try fo no go nea her.
Potifar Wife Make Trouble Fo Joseph
11But had one time, Joseph go inside Potifar house fo work. Da odda worka guys, dey no stay dea, dat time. 12Potifar wife go grab his shirt an tell, “We go bed togedda now!” But Joseph, he run away outside da house. But his shirt come off, an Potifar wife still get um in her hand.
13Da wahine see dat Joseph run away outside from inside dea, but she get da shirt wit her. 14So she wen yell fo help real loud an da odda worka guys all come. She tell um, “Eh look! Dat Hebrew bugga Joseph, my husban wen bring um hea by us fo make us shame! Da guy wen like rape me, but I wen yell plenny fo help. 15An wen he hear me yelling, he run away outside da house, an he leave his shirt by me!”
Joseph Go Prison
16Da wahine wen keep Joseph's shirt. She wait till her husband come home. 17Den she tell um, “Eh! You know dat Hebrew slave guy, da one you wen go bring inside oua house? Da bugga wen come by me, fo make me shame! 18But I wen yell fo help, he run away outside da house, an he leave his shirt by me!”
19Potifar, wen he hear da tings his wife tell um bout wat his slave guy wen do, he come real huhu fo shua. 20He take Joseph an trow um inside da jail wea da guys dat da king say gotta go. An dass da place Joseph stay, inside da jail.
God Take Care Joseph Inside Da Prison
21Yahweh, he wen [stick / stay tight] wit Joseph inside dea too, an take care him. Yahweh even wen make da guy in charge a da jail so he like Joseph plenny. 22Da guy wen make Joseph in charge a all da odda prisona guys dat stay dea. Cuz a Joseph, eryting wen come out good inside da jail. 23Afta dat, da guy in charge a da jail neva worry bout notting dat he suppose to do, cuz Joseph take care eryting an Yahweh stay wit Joseph. An eryting Joseph do, Yahweh make um come out good.