Adam An Eve Get Kids
41Den Adam sleep togedda wit his wife Eve, an she born one boy. She give um da name Cain. She say, “Yahweh wen help me. Dass how come I get dis boy.” 2Lata, she born one nodda boy, dass Abel, Cain brudda. Wen dey come big, Abel wen come one sheep an goat farma, and Cain wen come one dirt farma.
Cain an Abel Make Present Fo God
3Had one time, Cain wen cut some a da tings dat grow from da land wen was ready, an he wen take um fo make one present fo show respeck fo da God Yahweh. 4Same ting Abel, he wen take some a da firs bebe sheeps dat wen born from his sheeps. He wen kill da bebe sheeps and cut out da bestes part a da meat, fo make dat his present fo show respeck fo Yahweh. Yahweh like wat Abel give him. 5But Yahweh like Abel mo den Cain, an he neva care fo da present Cain wen give him. So Cain come plenny huhu, an look mad.
Yahweh Tell Cain His Sacrifice Not Right
6Yahweh tell Cain,
“Eh! How come you stay huhu lidat?
How come you make mad face?
7If you do good kine stuff,
Den you can stay good inside.
But if not right how you make,
Den jalike da bad kine stuff
Stay waiting right dea
Fo take ova you,
Jalike one wild animal
Stay wait by da door fo kill you.
But you gotta take charge
An no let da bad kine stuff take ova you!”
Cain Kill His Own Brudda Abel
8Lata, Cain tell his brudda Abel, “Eh! We go ova dea country side!” Wen dey dea, Cain wen go kill his own brudda Abel.
9Afta dat, Yahweh wen aks Cain, “Wea yoa brudda Abel? Wea he stay?”
Cain tell um, “I donno. You tink I da guy suppose to take care my brudda an watch wea he go, o wat?”
10Yahweh say, “Auwe! Wat you wen do to him, hah? You wen kill yoa brudda, and now, his blood stay ova dea on top da groun, jalike he stay calling to me fo help. 11So! I wen make kahuna da land awready so no can grow stuff. But you, I goin make you so you no can even work da groun no moa! Dat groun, jalike da mout open fo soak up da blood from yoa brudda wen you wen kill him. 12Cuz you goin try fo work da groun, but da groun no goin give you back notting. You no goin get place fo live. From now, you gotta jus go one place inside dis world to anodda!”
God Wen Make Cain Go Way
13Cain tell Yahweh, “Da way you stay punish me, mo plenny den I can handle! 14So den, today you goin trow me out from da land an no let me work da groun no moa, an no let me stay by you, yeah?! I gotta jus go hide! Goin be lidis: I gotta jus go one place inside dis world to anodda, an anybody dat meet me, bumbye dey like kill me!”
15Yahweh tell Cain, “No way! Dey no goin kill you! Cuz I promise, anybody goin kill you, I goin kill seven a dea guys fo pay um back.” Den Yahweh wen put one spesho mark on top Cain's body fo show he kapu, so if anybody meet Cain, dey know dey not suppose to kill um. 16Den Cain go way from da place wea da God Yahweh stay. He go da land dey call "Da Homeless Land" fo live ova dea, from Eden to da east.
Da Peopo Dat Come From Cain
17Den Cain come togedda wit his wife, an she wen get bebe. She wen born one boy, an she give um da name Enok. Lata, Cain wen start fo build one town wit walls, an he give da town da same name Enok, jalike his boy. 18Irad come from Enok, an Mehuya`el come from Irad, an Metusha`el come from Mehuya`el, an Lamek come from Metusha`el.
Lamek
19Lamek, he wen marry two wahines, dea names Adah an Zillah. 20Adah, she wen born one bebe, Jabal. All da guys dat live inside tents an take care cows an sheeps lidat, dey jalike Jabal dea ancesta guy. 21He get one brudda name Jubal. All da guys dat play da small kine harp an da flute, dey jalike Jubal dea ancesta guy. 22Da odda wife Zillah, she wen get one bebe too, name Tubal-cain. He da guy wen make all kine tool from bronze an iron. Tubal-cain get one sista, Na`amah.
23One time, Lamek talk big to his two wifes:
“Eh, Adah an Zillah! Listen!
You guys my wifes, so lissen wat I telling you!
Had one guy dat go bus me up.
I wen kill um.
No matta ony one boy
If dey hurt me, I kill um!
24Yahweh wen tell, anybody dat kill Cain,
Yahweh goin kill seven a dea guys fo pay back, yeah?
Kay den, anybody go kill me, Lamek,
God goin kill seventy-seven a dem!”
Adam Get One Nodda Boy
25Adam, he wen come togedda wit his wife one mo time. She wen born one boy, an she give um da name Seth, dat sound kinda like “give,” dea language, cuz she tell, “God wen give me one mo boy, fo take da place afta Abel, da one Cain wen kill.” 26Afta dat, had one nodda boy dat wen born fo Seth. Seth give um da name Enosh. Dat was da time wen da peopo firs start fo aks Yahweh fo help um cuz dey know wat kine God him.