Joseph Brudda Guys Go Egypt Fo Buy Wheat
421Jacob find out dat get wheat fo buy, Egypt side. He tell his boys, “Wassa matta you guys? You ony stay looking each odda! 2You know wat? I stay hear, get wheat fo buy, Egypt side. Go ova dea. Buy food fo all us, so we can stay alive an no mahke.”
3So ten a Joseph olda brudda guys wen go Egypt side fo buy wheat. 4But da odda brudda Benjamin, Jacob neva let him go wit da oddas, cuz he tinking, “Maybe someting bad goin happen to him.” 5Dass how da Israel boys wen go Egypt side fo buy food, jalike plenny odda peopo, cuz no mo notting fo eat Canaan side, dat time.
Joseph See His Brudda Guys, But Dey Donno Who Him
6Dat time, Joseph was da guy in charge a all da land, Egypt side. Was him dat stay sell da food to all da peopo inside dat land. Joseph brudda guys go by him, an dey go down in front him, and put dea face on top da groun fo show um respeck. 7Joseph see his brudda guys, an he know who dem right away. But he neva let dem know who him. He talk rough, an tell um, “Eh! Wea you guys come from?”
Dey tell, “Us come from Canaan side, fo buy food.”
8Joseph, he know who dem, but dey donno who him. 9An Joseph rememba da tings he wen dream bout dem, befo time. He tell um, “Nah! You guys, you ony spies! You come hea fo check out wat part a our land we no can guard!”
10But da brudda guys tell Joseph, “No! We wen come hea ony fo buy food. But, not how you tink! You da boss, an us guys, jalike we yoa slave guys. 11All us guys get da same fadda. We honest guys, an not spies! We jalike yoa slave guys!”
Joseph Give His Brudda Guys Hard Time
12Joseph tell um, “Not even! You guys ony come hea fo check out wat part a our land we no can guard!”
13Dey tell Joseph, “Us twelve bruddas, yoa slave guys, dat come from da same fadda, Canaan side. Ony now, da younga brudda, he stay ova dea wit our fadda. An da odda brudda, he no mo awready.”
14Joseph tell um, “Same ting, jalike I stay tell you guys awready, you guys spies! 15Dis how I goin check you guys out, fo find out if you telling da trut, o not. Ony one way you guys goin get outa hea, an da Pharaoh guy goin back me up wen I say dis: You guys younga brudda gotta come hea, den you can go. 16One a you guys go fo bring yoa brudda ova hea. Da odda guys goin stay hea inside da jail. Dass how I goin check out if you guys telling da trut o not! An if you guys not telling da trut, da Pharaoh guy goin back me up, dat you guys spies!” 17So, Joseph wen keep da brudda guys inside da jail, three days.
Joseph Let His Brudda Guys Go Home
18Afta da three days, Joseph tell da brudda guys, “You know, I one guy dat get plenny respeck fo God. Az how come I telling you guys wat you gotta do so you no goin mahke. 19If you guys honest peopo, one a yoa brudda guys gotta stay inside da jail wea I wen put all you guys. You odda guys, go. Take da food you wen buy fo yoa ohana guys dat stay hungry. 20But still yet, you gotta bring back yoa younga brudda hea by me. Dass how you guys goin make proof dat you stay tell da trut. Dass wat you guys gotta do fo no mahke.”
Da Brudda Guys Tell, Dey Wen Do Bad Ting To Joseph
An dass how dey wen make. 21Da brudda guys talk to each odda wit dea own language. Dey tell, “Az right, you know! Us getting punish cuz all da bad ting we wen do to our brudda guy Joseph. Dat time, we wen see dat he was scared an plenny sore inside, an he beg us fo show pity to him, but we neva lissen! Az how come us guys stay sore inside now.”
22Den Reuben talk. He tell um, “No foget, I wen tell you guys dat time, ‘No do notting fo hurt da boy!’ But you guys neva like lissen. An now, wat?! Jalike us guys gotta pay fo his blood!”
23Da ten brudda guys, dey neva know dat Joseph undastan eryting dey stay talking. Cuz Joseph, he ony use da Egypt kine language fo talk to dem, but get one interpreta guy dat use da Hebrew language fo tell da brudda guys wat Joseph say. 24Den Joseph go way from dem an cry plenny. Afta he feel betta, he come back inside an talk wit dem. Joseph pick one a da brudda guys, Simeon, an he tell his guys fo tie up Simeon in front da odda brudda guys.
Da Brudda Guys Go Back Canaan Side
25Joseph do one nodda ting too: he tell his worka guys fo go get wheat an fill up ery gunny bag da bruddas wen bring, an same time he tell um fo take da money dat ery guy wen pay, an put um inside dat guy bag. Joseph tell his guys fo give da brudda guys food fo eat fo da trip too. Da worka guys do all dat fo dem. 26Den da brudda guys put da wheat dey wen buy on top dea donkeys, an go home from dea.
27Dat nite, wen dey stop, one a da brudda guys open his bag fo give his donkey someting fo eat. He find da money, right dea inside da top a da bag. 28He tell his brudda guys, “Wo! Dey give me back da money I wen pay! Look, right hea inside my bag!”
Da odda bruddas, dey come all scared, an dey tell each odda, “Wassup? Wat God stay do to us?”
Da Brudda Guys Tell Jacob Wat Wen Happen Egypt Side
29Wen da brudda guys come by dea fadda Jacob, Canaan side, dey tell him eryting dat wen happen to dem. Dey tell, 30“Get dis guy ova dea, he da boss fo da land. He talk mean to us, an he make to us jalike we spies dat stay checking out da land ova dea. 31But us guys tell um, ‘Not how you tink! We honest guys! Us not spies! 32Us guys had twelve brudda guys dat all get da same fadda. But get one brudda dat mahke awready, an da younga brudda guy, he stay wit oua fadda right now, Canaan side.’
33“Den da guy dat stay in charge a da land ova dea, he tell us, ‘Kay den. Dis how I goin find out if you guys honest o you not. Leave one a yoa brudda guys hea by me, an take da food fo yoa ohana guys dat stay hungry, an go home. 34But bring yoa younga brudda guy back hea by me. Dass how I goin find out if you honest guys, o spies. If you okay, den I give you guys back da odda brudda guy dat I keeping ova hea, and you guys can go any place you like inside oua land.’-”
35Afta dey tell dea fadda dat, dey take da wheat outa dea bags, an you know wat? Inside ery bag, get da small package money dat ery guy wen pay! Wen dey see da money, dey come real scared. Even dea fadda, he scared too. 36Dea fadda Jacob tell um, “You guys! You take my boys away from me! Joseph, he mahke awready. Simeon, gone awready. An now, you like take away Benjamin too! Eryting stay go agains me!”
37Reuben tell his fadda, “I goin take care Benjamin fo you, an I goin bring him back by you fo shua. If I no bring um back, you can kill my two boys!”
38But Jacob tell um, “No way. My boy no goin go wit you guys. His brudda, mahke awready. He da ony one dat stay still yet from Rachel. If someting bad happen to him ova dea, fo shua you guys goin make me come real plenny sore inside, an you goin make my gray hair go down da Mahke Peopo Place!”