Joseph Bruddas Go Back Egypt Side
431But dat time, was hard, cuz neva have notting fo eat, Canaan side. 2Lata, all da wheat dey wen bring back from Egypt, dey eat um all awready. So dea fadda Jacob wen tell his boys, “Go back dea one mo time. Buy litto bit food fo us.”
3But Judah tell um, “Da main guy ova dea tell us guys serious kine, ‘Ony one way you guys goin see me one mo time. Yoa odda brudda gotta be wit you guys.’ 4So, if stay okay wit you, fo let oua brudda go wit us guys, den we goin go Egypt an buy food fo you. 5But if you no like let um go, us no can go. Cuz da Egypt guy wen tell us awready, ‘Ony one way you guys goin see me one moa time. Yoa odda brudda gotta be wit you guys.’-”
6Jacob tell, “How come you guys wen make all dis ting come bad fo me? How come you guys wen tell da Egypt guy dat you get one nodda brudda?”
7Dey tell um, “Da guy, he was aksing plenny question bout us guys an bout our ohana. He wen tell, ‘Yoa fadda, he still alive, o wat? You guys get odda brudda guy?’ Us guys, we wen tell um wateva he wen aks. Eh! you tink us guys know dat bumbye da guy goin tell us, ‘You gotta bring yoa odda brudda ova hea!’?”
Jacob Let Da Odda Bruddas Take Benjamin Egypt Side
8Den Judah tell his fadda Israel, “Kay den. Send da boy Benjamin wit me. Den we can go, so we goin stay alive an no mahke -- us guys, an you, an our kids. 9Me, I da guy dat goin be responsible fo him. I goin take da blame if someting happen. If I no bring um back by you an show you dat he stay okay, den I goin be shame in front you till I mahke, cuz I goin know dass one bad ting I wen do to you. 10Cuz you know, if us no had wait so long time bout dis, us wen go Egypt side an come back hea two times awready.”
11Den dea fadda Israel tell um, “Kay den. If az how gotta be, den az how goin be. So do dis: go get da bestes kine stuffs dat come from dis land. Take um wit you inside yoa bags, fo make present fo da main man -- litto bit sap from da kine bush dass good fo medicine, an litto bit honey, an da kine sap you get outa da tragacanth root, an sap dat smell nice from da ladanum bush, an pistachio nut, an almond nut. 12Take two times da money you guys going need. Plus, dat money dat dey wen give back inside yoa bags, take all dat back to da guy. Might be somebody wen make mistake lidat. 13An yoa brudda guy, take him too. Go back by da Egypt guy. 14Da God Dat Get All Da Powa, I like he make dat Egypt guy tink good bout you guys an give you guys chance, an let yoa odda brudda go wit you guys, an Benjamin too. Me, if I gotta lose my boy, den I gotta lose um, an dass it!”
Joseph Brudda Guys Go Back Egypt Wit Benjamin
15Den da guys wen take da present, an two times da money, an Benjamin. Dey wen go Egypt side, an dey go stand in front Joseph. 16Joseph, he see Benjamin dea wit dem. He tell da guy dat take care his house kine stuff fo him, “Eh! Take dese guys ova dea my house. Kill one a da cows, an cook um nice. Noon time, I like dese guys eat wit me.” 17Da guy do jalike Joseph wen tell um. He take da brudda guys Joseph house.
Da Brudda Guys Eat Wit Joseph
18Da brudda guys, dey come scared cuz da guy take um Joseph house. Dey tinking, “Eh! How come dey taking us ova dea? Cuz a dat money dat somebody wen put back inside our bags da firs time us come hea, az why! Fo shua, dey goin jump us guys ova dea, an bus us up, an make us dea prisonas, fo make us come dea slaves, us guys an our donkeys too.”
Joseph Make Lu`au
19Befo da brudda guys go inside da gate, dey go nea da guy dat take care Joseph house kine stuff fo him, an dey talk wit him. 20Dey tell um, “Eh, mista, can tell you one someting? Befo time, us guys wen come hea fo buy food. 21But afta us guys go way from hea, da place we wen stay dat nite, we open up oua bags, an you know wat? Ery guy, all da money he wen pay, stay dea inside da guy's bag! Now, we bringing back dat money. 22Plus, we wen bring da odda money dat we suppose to pay fo da food dis time. Us donno who wen put dat money inside our bags.”
23Da guy dat work fo Joseph, he tell um, “Eh! No worry, eryting okay! No scared! Gotta be yoa God, yoa fadda guy's God, dat wen put money inside yoa bags. Cuz da money you guys wen pay dat time, all dat wen come to me, you know.”
Den da guy bring Simeon outside by da odda bruddas. 24He take um all inside Joseph house, an he give um watta fo wash dea feet, an he give um stuff fo da donkeys eat. 25Dem, dey make ready da present fo Joseph wen he come home noon time, cuz dey wen hear dat dey suppose to eat lunch his house.
26Den Joseph come home. Dey bring inside da house da present dey get fo him. Den dey go down in front him on top da groun fo show respeck. 27Joseph aks um if dey stay okay. He tell um, “You guys fadda, da ol guy you wen tell me bout, he okay? He still stay alive, o wat?”
28Dey tell um, “He stay okay, our fadda guy, cuz get you fo boss. He still stay alive.” An dey wen go down on top da groun one mo time fo show um respeck.
Joseph See Benjamin
29Den Joseph look aroun, an he see his brudda Benjamin, da one dat get da same mudda jalike him. He aks da odda brudda guys, “Dis guy hea, dis you guys younga brudda? Da one you guys wen tell me bout him?” He tell Benjamin, “My boy, I like God do plenny good tings fo you!”
30Afta he say dat, Joseph get outa dea quick. He feel real funny kine inside, cuz he get so much aloha fo his brudda dat he look fo one place wea he can cry. So he go inside one nodda room an cry dea. 31Den Joseph wash face an go back by da brudda guys, an now he cool an can handle. He tell da worka guys, “Bring da food awready.”
32Dey give Joseph his food one place, an da brudda guys one nodda place, an da Egypt guys dat was eating wit Joseph one nodda place. Cuz da Egypt guys no can eat togedda wit da Hebrew guys, dass kapu an jalike pilau fo da Egypt guys. 33Da brudda guys, wen dey show um dea place fo sit down, dey put da oldes brudda in da spesho place, an den da nex brudda, an da nex, till da younges brudda. Wen da bruddas see dat, dea jaws wen drop. Ery one a dem tell da guy nex to him, “Eh! Wassup?” 34Joseph tell da worka guys for take da brudda guys dea share food from his own table. But fo Benjamin, he tell um fo take plenny extra food fo him, five times mo den fo da odda brudda guys. An dey all drink togedda wit Joseph, till dey all drunk.