Da Cup Inside Da Bag
441Wen da bruddas ready fo go home, Joseph tell da guy dat take care his house, “Go fill da guys bags wit food, all dat can go inside da bag. Fo ery guy bag, put da money back inside too dat dey wen pay. 2An you know da spesho silva cup fo wine dass mines? Go put um inside da younga brudda bag, same time you put da money fo da food inside his bag too.” Da worka guy go do jalike Joseph tell um.
Da Egypt Guy Go Afta Da Bruddas
3Early morning time, wen get light, Joseph's guys wen help da brudda guys put da bags on top da donkeys an go. 4Afta da brudda guys go litto bit outside da town, Joseph tell da guy dat take care his house, “Now! Go afta dem guys! Chase um, an stop um, an wen you catch um up, tell um dis: ‘Eh! My boss wen make good to you guys, but you guys, you do bad ting fo pay um back! 5I talking bout da special cup fo wine dat my boss use fo drink. An fo shua, he can use um fo find out from da gods wat goin happen. No good, da ting you guys stay do!’-”
6Joseph guy wen go catch up da brudda guys. He tell um wat he suppose to tell. 7Dey tell him, “No way, boss! How come you talking lidat? Us guys, jalike we yoa slave guys. Us not da kine peopo dat do da kine stuff you talking bout. 8Look! Us guys wen bring back da extra money from da Canaan land. We wen find um inside oua bags firs time. How you figga we goin steal silva o gold from inside yoa boss house now? 9Go check out all us guys bags hea, cuz we jalike yoa slave guys. If you find da spesho cup inside anybody's stuffs, you can kill da guy, an all us odda guys, we goin come yoa slave guys.”
10Joseph's guy tell um, “Kay den, jalike you guys say. If I find da cup wit one a you guys, dat guy goin come one slave fo me. But I no goin poin finga you odda guys.”
11So dey go take down da bags from on top da donkeys real quick an put um on top da groun, an ery guy open his own bag. 12Joseph guy wen check out all da bags. He start from da oldes brudda firs, an den da next. Da las one he wen check out, was dea younga brudda Benjamin. An he find da spesho silva cup right dea inside da bag! 13Da brudda guys, bodda dem plenny dat dey wen rip dea own clotheses. Dey put da bags back on top dea donkeys an go back inside da town.
Joseph Aks Da Bruddas How Come Dey Wen Rip [Um] Off
14Joseph, he still dea inside his house. Judah an da odda brudda guys, dey go inside, an right away dey go down on top da groun in front Joseph fo show um respeck. 15Joseph tell um, “Wot! Wass dis ting you guys wen go do? You guys donno dat me, I da kine guy dat know how fo find out from da gods wat happening!”
16Judah talk: “Eh boss! Wat we can say to you? No mo notting us can say, fo shua! How we goin make proof to you dat we neva do notting bad? No can! God, he wen find out da bad ting us guys wen go do awready. So, wat? Us guys wen come back fo be yoa slaves now, an you da boss fo all us guys, even da guy dey wen find wit da spesho cup!”
17Joseph tell um: “No! I not da kine guy fo make all you guys come slaves! Ony da guy dat dey wen find wit da spesho cup, dat guy goin come one slave fo me! You guys can go back by yoa fadda guy, an no need worry, eryting goin be okay.”
Judah Go Aks Joseph Fo Let Benjamin Go
18Den Judah, he go nea Joseph an tell um, “Eh, you my boss, an I yoa slave guy! So please, if I say someting you no like, I da one dass wrong. Try let me say someting. No come huhu wit me, cuz you an Pharaoh, you get da same kine powa! 19Eh boss, befo time, you wen aks us dat stay yoa slave guys, ‘You guys, you get fadda? you get brudda?’ 20Us guys wen tell you, ‘Yeah, we get fadda, he alive, an he old. An us get one mo younga brudda guy, dat wen born wen our fadda guy old awready. One nodda brudda, his real brudda mahke awready, so him da ony one dat stay from his mudda. Dass how come his fadda get plenny love an aloha fo him.’ 21Befo time, you wen tell us guys dat work fo you, ‘Bring yoa younga brudda guy hea by me Egypt side, so I can see him.’ 22You da boss fo us, but us guys wen tell you dat time, ‘Da young guy no can leave his fadda. Cuz if he go leave him, da fadda guy goin mahke.’ 23But you wen tell us guys dat yoa slave guys, ‘If yoa younga brudda guy no come hea wit you guys, you guys no goin see me again!’ 24So us guys wen go back by oua fadda, dass yoa slave guy too. We wen tell him wat you wen say, cuz you da boss fo us guys too.
25“Den lata, our fadda guy wen tell us, ‘Go back again. Buy litto bit mo food fo all us guys.’ 26We tell um, ‘No way us guys can go back dea. Ony if oua younga brudda guy stay come wit us, den we can go dea. Ony one way we goin see da main Egypt guy - if oua younga brudda stay come wit us!’
27“Den oua fadda, dass yoa slave guy, he tell us, ‘You guys know dat my wife wen born two boys fo me. 28One a dem no stay no moa wit me, maybe da wild animals wen rip um up. Long time now I neva see um. 29An now, you guys like take away dis odda boy from me too?! Fo shua, if someting bad happen to him an he mahke too, dat goin be real bad, an you guys goin make me come so plenny sore inside, dat I goin go wit all my grey hair to da place wea da mahke peopo stay.’
30“So, I no can go home to my fadda dass yoa slave guy, an da boy no stay wit us. My fadda an da boy, dey stay so tight wit each odda dat my fadda goin stay alive ony if da boy stay alive too. 31If he see dat da boy not wit us, he goin mahke, an us guys dat yoa slave guys goin be da guys dat goin make oua fadda so plenny trouble an come sore inside lidat, an he goin go wit all his grey hair to da Mahke Peopo Place. 32Me, I yoa slave guy, but I wen make promise to my fadda, dat I myself da guy goin take care fo bring back da boy. I wen tell um, ‘If I no bring him back to you, den I goin get shame foeva from do bad ting.’ 33So now I like aks you: please, let me stay hea an be da slave fo you an you da boss, but not da boy. Let him go back wit his odda bruddas. 34No way I can go back by my fadda guy, if da boy no stay wit me! Eh, no make me see da bad ting dat goin happen to my fadda den!”