Jacob An His Ohana Peopo Go Egypt Side
461So Israel (dass Jacob, you know), wit all his peopo an all his animals an all his stuffs, move house Egypt side. Wen he come Beer-Sheba (dat mean, Seven Puka Fo Watta), he kill some animals fo make sacrifice fo show love an respeck fo God, da same God dat Isaac, dat was Israel fadda, wen pray to befo time. 2Nite time, Jacob was still up, an he wen see someting jalike one dream, dat God was talking to him. God tell, “Hui Jacob! Jacob!”
Jacob tell um, “Yeah? Wat! Dis me!”
3God tell um, “Dis me, God, da same God yoa fadda wen pray to befo time. No scared go Egypt side. Wen you stay dea, I goin make da peopo dat goin come from you, come real rich an importan kine peopo. 4I going wit you Egypt side. An I goin bring you back hea too fo shua. Wen you mahke, Joseph da one goin stay wit you an take care yoa body wen you pau.”
5Den Israel go way from Beer-Sheba, Da Place Wit Da Seven Puka Fo Watta. Israel boys put dea fadda guy an all dea kids an dea wifes, inside da wagons dat Pharaoh wen send fo help um move house. 6Dey take wit dem all dea sheeps an dea cows an all da rich stuffs dey get inside da Canaan land. Dass how wen happen wen Jacob an all da peopo dat come from him go Egypt side. 7His boys an dea kids, an his girls an dea kids -- all da peopo dat come from Jacob, he take um all Egypt side wit him.
Da Jacob Ohana Genealogy
(Jesus Guys 7:14)
8Now, all da Israel ohana peopo from dat time, dass Jacob an da peopo dat wen come from him dat wen go Egypt side wit him, dis dea names.
Reuben, he Jacob's numba one boy. 9Reuben, his boys, dey Enoch, an Palu, an Hezron, an Karmi. 10Simeon, his boys, dey Jemuel, an Jamin, an Ohad, an Jachin, an Zohar, an Saul (his mudda one wahine from Canaan). 11Levi, his boys, Gershon, an Kohath, an Merari. 12Judah, his boys, dey Er, an Onan, an Shelah, an Perez, an Zerah. Er an Onan, dey mahke awready befo Judah leave da Canaan land. Perez, he get two boys awready dat time, Hezron an Hamul. 13Issachar, his boys, dey Tola, an Puvah, an Iob, an Shimron. 14Zebulun, his boys, dey Sered, an Elon, an Jahleel. 15Dese six boys, dey da ones dat Leah wen born fo Jacob, Padan-Aram side. She wen born one girl too, Dinah. Dass 33 peopo, guys an wahines.
16Gad, his boys, dey Zifion, an Haggi, an Shuni, an Ezbon, an Eri, an Arodi, an Areli. 17Asher, his boys, Imnah, an Ishvah, an Ishvi, an Beriah, plus dea sista Serah. Beriah, his boys Heber an Malkiel. 18Gad an Asher, dey da boys dat Zilpah wen born fo Jacob. She da slave wahine dat Laban wen give to his daughta Leah. Dass 16 peopo.
19Da boys dat Jacob wife Rachel wen born, dey Joseph an Benjamin. 20Wen Joseph was inside da Egypt land, he wen get Asnat fo wife. Her fadda, Poti-Fera, was pries fo da god dey call On. Asnat wen born Manasseh an Efraim fo Joseph. 21Benjamin, his boys, Bela, an Bekher, an Ashbel, an Gera, an Naaman, an Ehi, an Rosh, an Muppim, an Hupim, an Ard. 22All dese peopo, dey da ones Rachel wen born fo Jacob, 14 peopo.
23Dan, his boy, Hushim. 24Naftali, his boys, Jahzeel, Guni, Jezer, an Shillem. 25Dey all da ones dat Bilhah wen born fo Jacob. She da slave wahine dat Laban wen give to his daughta Rachel. Dass 7 peopo.
26All da Jacob peopo dat wen go Egypt, if you no count da wifes a his boys, dass 66 peopo. 27Inside Egypt, get Joseph two boys dat wen born dea. So az 70 peopo da Jacob ohana peopo get, Egypt side.
28Judah was da one Israel wen send befo dem fo meet Joseph, so Joseph can show dem how fo go Goshen. Dass how da peopo wen go Goshen side. 29Joseph tell his guys fo tie da horses to his fancy horse wagon. Den he go Goshen fo meet his fadda Israel. Joseph look Israel, an hug um plenny, an cry long time. 30Israel tell Joseph, “Now, okay fo me mahke, cuz I see yoa face wit my own eyes awready, an you alive still yet.”
31Den Joseph tell his brudda guys an all his fadda ohana peopo, “Kay den. I going by da Pharaoh guy, dass da king, an tell um wat wen happen hea. I goin tell, ‘My brudda guys, an all my fadda ohana peopo, dey was inside da Canaan land, an now dey all come hea by me. 32Dese guys, dey take care small animals. From long time, dey breed cows. Dey wen bring wit dem all dea small animals an cows, an all dea stuffs.’ 33Now, I like tell you guys dis: da Pharaoh guy, da king, he goin tell you guys come by him, an he goin aks you guys, ‘Wat you guys do?’ 34Den you guys goin tell um dis: ‘You da boss an us guys yoa slaves. From small kid time till now, us guys breed cows, same ting jalike our ancesta guys.’ I telling you guys wat fo say, so dat he let you guys stay Goshen side. Da Egypt peopo, dey tink all da sheep farma guys pilau, az why.”