Da King Give Land To Da Jacob Israel Ohana
Den Joseph go by Pharaoh an tell um, “My fadda an my brudda guys, wit dea small animals an big animals an eryting dey get, dey stay come hea awready from da Canaan land. Now, dey stay Goshen side.”
Joseph take five bruddas from all his brudda guys an take um fo meet da Pharaoh guy.
Pharaoh aks Joseph brudda guys, “Wat you guys do?”
Dey tell Pharaoh, “Us guys, we yoa slave guys. We take care animals, jalike our ancesta guys do befo time.
Us guys come dis side fo live, cuz ova dea Canaan side, da grass dry up, an no mo fo da animals eat. Us yoa slave guys now, so please, let us guys stay Goshen side.”
Pharaoh tell Joseph, “Az good, yoa fadda an yoa brudda guys wen come by you awready.
All da Egypt land stay in front you, Joseph. Go put yoa fadda an yoa brudda guys inside da bestes part. Okay fo dem stay Goshen side. An I like some a dem dat really know how fo take care da animals, fo take care my animals too.”
Joseph Bring His Fadda By Pharaoh
7Den, Joseph bring his fadda Jacob fo meet da Pharaoh guy. Jacob tell Pharaoh, “I like God do good tings fo you!”
Pharaoh wen aks Jacob, “How old you stay now?”
Jacob tell Pharaoh, “Hundred thirty years, I stay inside dis world. Not plenny, da years I get, an all come fo notting. But my fadda an granfadda guys, dey wen get plenny mo years den me, wen dey stay hea inside dis world.”
Den Jacob tell Pharaoh, “Kay den, sir, I going now. I like God do good tings fo you!” An he wen go out from da place wea da Pharaoh guy stay.
Joseph wen do jalike da Pharaoh guy wen tell um fo do. He give his fadda an his brudda guys land inside da bestes part a Egypt, nea to da place dey call Rameses town.
Joseph even take care his fadda an his brudda guys, an all da ohana peopo dat come from his fadda. He give um food ova an ova so dey no mahke.
No Mo Food, All Ova Egypt
All ova da land, no mo food, dat time. Was hard, cuz no mo notting can grow. Inside Egypt land, an inside Canaan land, same ting, no mo food an ery year mo worse, az why hard.
All da money dat get inside Egypt land an inside Canaan land, come to Joseph cuz da peopo pay him fo da food dat he sell. Joseph take all da money inside da Pharaoh guy's palace.
An lata, all da money pau awready inside da Egypt land an da Canaan land. All da Egypt peopo go by Joseph an tell um, “Eh! Please, give us mo food! No need us guys mahke right hea in front you, jus cuz us no mo money.”
Joseph tell um, “Kay den. If no mo money, bring yoa animals ova hea, an you guys goin pay me wit da animals, an I goin sell you guys food.”
So da peopo bring dea animals by Joseph, an he give um food an dey give him dea horses an sheeps an cows an donkeys. Dat year, he wen take all dea animals an he help um out wit food.
Da nex year, da peopo come by Joseph one mo time. Dey tell um, “Eh, boss, no way us guys goin bulai you. You know awready, dat all us no mo money an you get all da animals. Da ony ting us guys can do now, boss, is fo make deal fo come yoa slaves, an let you take ova da land we get fo farm.
No good us guys mahke in front you, an our land come poho. So, buy us guys an our land, an pay us wit food fo eat! Den, us come slave guys fo da Pharaoh guy, an our land come his land. Jus give us guys seeds fo plant! Den we can stay alive an no mahke, an da land no come poho!”
Dass how Joseph take ova all da farms inside da Egypt land fo da Pharaoh guy. All da Egypt peopo wen go sell dea field. Cuz dea food pau, an was hard fo dem. Az how Pharaoh come da owna fo all da land.
From one side Egypt to da odda side, Joseph make da whole Egypt peopo move house to da big towns.
Ony da pries guys fo da Egypt gods, Joseph neva take ova dea land, cuz from long time Pharaoh give da pries guys dea food. Dey eat da stuffs da Pharaoh guy give um. Dass how come dey no need sell dea land.
Den Joseph tell all da peopo, “So, now I wen buy all you guys fo Pharaoh, an all you guys farms too. I goin give you guys seeds now, fo you guys plant um inside da groun.
Den, erytime you guys cut da food, you gotta pay twenny percent fo Pharaoh. Da odda eighty percent, dass fo you guys. Use um fo seeds fo da fields, an fo food fo you guys, an yoa ohana peopo, an yoa kids!”
Da peopo tell Joseph, “Da tings you wen do fo us guys, az how come us guys alive still yet! We like you stay make good to us guys! So, we slaves now, fo da Pharaoh guy, but we stay alive!”
Den Joseph wen make one rule fo da land inside Egypt, an da Egypt peopo use dat rule still yet: Da Pharaoh guy get twenny percent. Ony da pries guys fo da Egypt gods, Pharaoh neva take dea land.
Dass da story, how Israel (dass Jacob) wen move house Egypt side. He wen make house Goshen side, an his ohana wen get da right fo stay dea too. Da peopo wen get plenny kids, az how dey come plenny peopo.
Jacob wen live Egypt side seventeen year. He wen mahke wen he was 147 year old.
Wen was time fo Israel mahke, he wen send somebody fo tell his boy Joseph, “Come!” He tell Joseph, “Please, I like you do one ting fo me. Put yoa hand unda my thigh fo show you stay stick wit me an I can trus you fo do wat I say. Den make promise to me dat fo shua you goin do one ting fo me: please, no bury me ova hea Egypt side.
I goin go sleep wea my mahke ancesta guys stay. You gotta take my body outa Egypt, an bury me inside da same place wea my ancesta guys stay.”
Joseph tell his fadda, “I goin do jalike you say.”
Jacob tell Joseph, “Swear to God dat you goin do dat fo me.”
Joseph tell um, “I swear to God.”
Den Israel put his head down ova his bed, an tell God he like give um love an respeck.