Da Adam Genealogy
(Matthew 19:4; Mark 10:6)
51Dis da genealogy, da peopo dat wen come from Adam. Da time God wen make da peopo, he make um fo be like him, jalike one copy. 2God make da peopo fo be guys an wahines. He give dem da powa so dey can do eryting he make dem fo do. Da day God wen make dem, he give um da name “Adam,” dat mean, “Peopo,” dea language. 3Adam, afta he live 130 year, he get one boy dat jalike Adam, jalike da boy one picha dat look same same. Dass da one, Adam give um da name Seth. 4An afta Seth wen born, Adam still live 800 year moa, an he get odda kids too, boys an girls. 5Adam wen live 930 year, den he mahke.
Seth, Enosh, Kenan, Mahalel
6Seth, afta he live 105 year, he get one boy Enosh. 7An afta Enosh wen born, Seth still live 807 year, an he get odda kids too, boys an girls. 8Seth wen live 912 year, den he mahke.
9Enosh, afta he live 90 year, he get one boy Kenan. 10An afta Kenan wen born, Enosh still live 815 year, an he get odda kids too, boys an girls. 11Enosh wen live 905 year, den he mahke.
12Kenan, afta he live 70 year, he get one boy Mahalalel. 13An afta Mahalalel wen born, Kenan still live 840 year, an he get odda kids too, boys an girls. 14Kenan wen live 910 year, den he mahke.
15Mahalalel, afta he live 65 year, he get one boy Jared. 16An afta Jared wen born, Mahalalel still live 830 year, an he get odda kids too, boys an girls. 17Mahalalel wen live 895 year, den he mahke.
Jared an Enok
(Hebrews 11:5)
18Jared, afta he live 162 year, he get one boy Enok. 19An afta Enok wen born, Jared still live 800 year, an he get odda kids too, boys an girls. 20Jared wen live 962 year, den he mahke.
21Enok, afta he live 65 year, he get one boy Metuselah. 22An afta Metuselah wen born, Enok wen stay tight wit God wateva he doing, fo 300 year, an he get odda kids too, boys an girls. 23Enoch wen live 365 year. 24He stay tight wit God wateva he doing, an den, Enok disappea, cuz God take um away.
Metuselah, Lamek, Noah
25Metuselah, afta he live 187 year, he get one boy Lamek. 26An afta Lamek wen born, Metuselah still live 782 year, an he get odda kids too, boys an girls. 27Metuselah wen live 969 year, den he mahke.
28Lamek, afta he live 182 year, he get one boy. 29He give da boy da name Noah, an he tell, “Dis boy, he goin take away da sore from inside our heart. Dass how we stay now, cuz we gotta work so hard wit our hands fo get stuff outa da groun, cuz da God Yahweh wen make da land so no can grow stuff.” (Dat name “Noah,” you know, sound kinda like how da Hebrew peopo say “take away da sore.”) 30An afta Noah wen born, Lamek still live 595 year, an he get odda kids too, boys an girls. 31Lamek wen live 777 year, den he mahke.
32Noah, afta he live 500 year, he get three boys, Shem, Ham, an Jafet.