God Tell How Fo Make Da Passova Sacrifice
121Ova dea inside da Egypt land, Yahweh tell Moses an Aaron wat fo do: 2“From now, dis month, goin be da numba one month inside da year fo all you guys.
3“Go bring togedda all da Israel peopo, an tell um dis: Day numba ten, dis month, ery ohana gotta pick one bebe sheep o goat fo make sacrifice. Fo ery house, gotta get one bebe sheep o goat. 4If da house no mo nuff peopo fo eat all one bebe sheep, let um share wit da neighba guys. Da husban guys can figga how many peopo get from da one house an da odda house, an den dey can pay fo da part dea own peopo goin eat.
5“No mo someting wrong o funny kine wit da kine animal you guys go get. Gotta be boy kine, one year ol. Okay fo pick um from da sheeps o from da goats. 6Afta you pick um, you gotta take good care till day numba fourteen, dis month. Dat day, from da time da sun go down, befo come real dark, all da Israel peopo gotta kill da bebe sheeps an goats dey wen pick.
7“Den dey gotta take some a da blood, an put litto bit on top da wood outside da house on da two sides a da door, an da wood dat stay ova da door, inside da same house wea dey goin eat da meat.
8“Dat same nite, dey gotta roas da meat ova da fire, den eat um wit bread dat no mo yeast, an wit vejables dat taste bitta. 9No eat da raw meat, no boil um wit watta. Gotta roas um ova da fire -- even da head, da legs, da inside parts, eryting. 10No leave notting fo da morning time. If still get meat morning time, burn um up inside da fire.
11“Dis how you goin be wen you eat da meat: you gotta be ready fo go, an wear da kine clotheses you need, wit yoa slippas on top yoa feets, an hold yoa walking stick inside yoa hand. You gotta eat up da meat an be ready fo get outa dea quick. From now, goin call dat da Pass Ova Kine Sacrifice fo Yahweh.
12“Dis wat I mean: Dat nite, I goin pass ova da Egypt land, from one side to da odda side. Ery numba one boy dat live inside da land, I goin kill um. Da peopo an da animals, same ting. Dass how I goin show proof to da Egypt peopo dat all da gods dey pray to, notting, cuz me, I Yahweh!
13Da blood dat you guys put on top da houses wea you live, dat goin be jalike one sign fo show dat you guys live inside dea. Wen I see da blood, I goin pass ova you guys. Dat mean, wen I hit peopo all ova da Egypt land, no mo notting goin touch you guys an wipe you out.
Da Passova
14“Da day I do dat, goin come one spesho day ery year, fo you guys rememba how I pass ova you guys an no wipe you out. From dat day, ery year, you guys goin make spesho trip fo do religious kine stuff fo me, Yahweh. You guys, an yoa kids, an dea kids, goin do dat foeva. Az goin be one rule bout how you guys goin make fo me foeva, da Passova Time. 15From now, ery year you guys goin eat bread dat no mo yeast fo seven day. So, da numba one day, you guys goin clean out all da yeast dat get inside yoa house. Cuz from day numba one to day numba seven, anybody dat eat stuff wit yeast inside dat time, dey no mo da right fo stay wit da Israel peopo afta dat.
16“Day numba one, goin be fo all da peopo come togedda, spesho kine fo me, Yahweh. Same ting, day numba seven. Da two spesho days, you no do work notting. Da ony ting you can do dat time, you can make da food dat erybody goin eat. 17You goin make dat Bread Dat No Mo Yeast Time one spesho religious time, cuz was dat same day I wen take all you guys outa da Egypt land, jalike you one army. Dass why dis rule going be, dat you guys goin make dat time spesho fo me -- you guys, an yoa kids, an dea kids, foeva. 18Da month numba one, from wen da day numba fourteen start sundown time, till da day numba twenny-one start sundown time, da ony bread you guys eat, goin be bread dat no mo yeast inside. 19Fo dese seven days, betta not get yeast notting inside yoa houses. Cuz anybody eat stuff dat get yeast inside dat time, dey no mo da right fo come togedda wit da Israel peopo. No matta dey from dat place o dey from odda place, same ting. 20Dat time, you guys no goin eat notting dat get yeast inside. Ery place you guys live, you goin eat bread dat no mo yeast.”
Da Israel Peopo Get Ready
21Moses tell all da older leada guys fo da Israel peopo fo come by him. He tell um, “Go now! Tell ery ohana fo go pick da bebe sheeps o goats dat dey goin kill fo make da sacrifice fo da Passova. 22Wen you kill da sacrifice, put da blood inside one bowl. Tie togedda some oregano plants fo make jalike one brush, an use um fo put some a da blood from da bowl ova yoa door, an on top da wood on da right side an da left side a da door. But afta dat, nobody go outside da door till morning time!
23“Den, wen Yahweh go all ova Egypt fo kill dea numba one boy an dea numba one man an animal, he goin see da blood ova da door an on top da two side wood. Den Yahweh goin pass ova dat door. He no goin let da Killa Angel Guy go inside fo wipe out da peopo inside da house.
24“From now, you guys an all da peopo dat goin come from you guys, dis yoa kuleana: you all gotta keep da rule fo dis day foeva. 25Bumbye, you guys going inside da land dat Yahweh goin give you guys, jalike he make promise befo time. Wen you stay ova dea, dass how you guys goin show Yahweh yoa love an respeck.
26“Bumbye, yoa kids goin aks you guys, ‘Eh, wat mean dis spesho religious kine stuff us guys stay do?’ 27You guys goin tell um, ‘Dis da Passova Sacrifice. We stay make um fo show we stay tight wit Yahweh. He da one wen pass ova all da houses wea oua Israel peopo live befo time, Egypt side. Yahweh wen hit da Egypt peopo an kill um, but he no touch us guys, ova dea inside our houses.’-”
Wen da peopo hea wat Moses tell um, dey go down on top da groun fo show love an respeck fo Yahweh. 28So da Israel peopo go home an do eryting dat Yahweh wen tell Moses an Aaron dat da peopo gotta do.
Yahweh Kill Da Numba One Boys, Egypt Land
29Da middo a da nite, Yahweh wen start fo kill all da numba one boys all ova da Egypt land. Da Pharaoh guy dat sit down on top da throne, his numba one boy wen mahke too. Da guy dat da army guys wen catch, dat stay inside one big hole in da groun inside da prison, da numba one boy wen mahke, same ting. Da animals, same ting, da numba one boy kine animals all mahke. 30Da Pharaoh guy, he get up nite time, same ting wit all his palace peopo an all da odda Egypt peopo. Had peopo yelling an crying fo help plenny all ova Egypt, cuz no mo even one house wea no mo nobody dat wen mahke.
31Nite time, da Pharaoh guy tell Moses an Aaron fo come. He tell um, “Up! Go way from my peopo, you an all da Israel peopo! Go do religious kine stuff fo Yahweh, jalike you guys wen aks me! 32Yoa sheeps an goats an yoa cows, take dem too, jalike you guys wen aks, an get outa hea! But befo you go, aks God fo make eryting come out good fo me, jalike he doing fo you guys!”
Da Israel Peopo Go Outa Egypt
33Da Egypt peopo, dey all making presha fo da Israel peopo fo go way quick from dea land, cuz da Egypt guys tinking, “Bumbye all us guys, mahke!” 34So da Israel peopo take da dough fo dea bread no matta da yeast neva have time fo do notting yet. Dey wrap clotheses aroun da pans dey use fo bake da bread, an dey carry um on top dea shoulda. 35Da Israel peopo do how Moses wen tell um befo time. Dey aks da Egypt peopo fo give um dea jewelry made wit silva an gold, an clotheses. 36Yahweh, he make da Egypt peopo tink real good bout da Israel peopo, so da Egypt peopo give da Israel peopo eryting dey aks fo. Dass how da Israel peopo wen clean out da Egypt peopo.
37Da Israel peopo, dey go outa Ramses town an dey go Sukkot town. Had bout 600,000 mens dat was walking feet, plus wahines an kids an ol peopo. 38Had plenny guys from da odda peopos dat go wit dem too, an plenny sheeps an plenny cows. 39Da dough fo make bread dat dey carry wit dem outa Egypt, dey bake da bread wit no mo yeast inside. Dey no mo time fo put da yeast inside, cuz da Egypt peopo wen throw um out an dey no can wait dea fo da bread come ready. Dey no mo time fo get odda stuffs ready fo eat too.
40Da time dat da Israel peopo wen live Egypt side, was 430 year. 41Wen da 430 year pau, az was da time dat all da peopo go outa da Egypt land, jalike dey one army fo Yahweh. 42Dat Passova nite was da time Yahweh stay watching all nite, so he can get da peopo outa da Egypt land. An still yet, ery year, dat same nite, stay spesho fo Yahweh. So now, dat nite ery year, all da peopo dat come from Israel an dea kids go stay watching foeva.
Da Rules Fo Da Passova
(John 19:36)
43Yahweh tell Moses an Aaron, “Dis da Rule fo da Passova sacrifice. Da peopo from odda land, dey no can eat da sacrifice meat. Ony da Israel peopo, dey can eat da meat. 44If get one slave guy dat somebody buy, an if you cut skin da slave guy, den az okay fo him eat da meat from da sacrifice. 45But da peopo from odda land an da guys dat ony work fo pay, dey no can eat da sacrifice meat. 46Gotta eat um inside da same house wea you kill da animal. No take da meat outside, an no broke even one bone. 47All da Israel peopo togedda gotta make da sacrifice, same time.
48If get guys from odda place dat stay live dea wit you guys, an dey like eat da Passova kine sacrifice fo Yahweh, dem an all da mens wit dem gotta cut skin firs. Den goin be okay fo dem eat da Passova sacrifice fo Yahweh, cuz goin be jalike dey wen born from da Israel peopo. But anybody dat neva cut skin, no can eat da sacrifice meat. 49Get da same rule fo da guys dat born from da Israel peopo, an fo da guys from odda place dat live by you guys.”
50So, dass wat all da Israel peopo do, jalike Yahweh wen tell Moses an Aaron. 51Dat same day, Yahweh take da Israel peopo outa da Egypt land, jalike dey one army.