Moses Born
21Dat time, had one guy from da Levi ohana dat wen go marry one wahine from da Levi ohana. 2Da wahine, she come hapai an wen born one boy. She see dat da bebe good looking, so she hide um fo three months. 3But den she no can hide um no moa. She get one basket, made from da tall papyrus plants dat grow inside da riva nex to da land. She put sticky kine black stuff all ova da basket so da watta no can come inside. She put da bebe inside da basket. Den she put um inside da Nile Riva wea get plenny reed plants inside da watta. 4Moses older sista go mo down, fo watch wat goin happen wit da bebe.
5Da Pharaoh guy daughta wen go da Nile Riva fo bafe. Her an da girls dat work fo her, dey walk nea da riva. Da king daughta, she spock da basket ova dea wea get plenny reed plants inside da watta! She tell one slave girl fo go get um. 6Da king daughta open da basket. She see da bebe inside, an eh! was one bebe boy, an he crying. She know she no like notting hurt da bebe, an she tell, “Eh! Gotta be, dis one a da Israel bebes!”
7Da older sista, she go by da Pharaoh guy daughta. She tell, “Eh, you like I go find one Israel wahine dat get milk? She can feed da bebe fo you, you know.”
8Da Pharaoh guy daughta tell her, “Go!” So da girl run home an tell da bebe own mudda fo go.
9Da Pharaoh guy daughta, she tell da mudda, “Eh! You, take dis bebe yoa house. Give um yoa milk fo me. I pay you.” So da mudda wen take her own bebe her place, an feed um.
10Lata, da kid come big. Da mudda take um back by da Pharaoh guy daughta. Da Pharaoh guy daughta hanai da kid, so he come her boy. She give um da name Moses, cuz she tell, “I wen pull um outa da watta,” cuz in da Hebrew language, “Moses” sound kinda like “pull um out.”
Moses Kill One Egypt Guy
11One time afta Moses come one big man Egypt side, he go visit his ohana peopo, da Israel peopo. He see how hard da Egypt peopo make um work. Wen Moses stay dea, he spock one Egypt guy bussing up one a da Israel slave guys from Moses own peopo. 12Moses, he turn an look aroun, an he see dat no mo nobody dea. So he wack da Egypt guy an kill um, an hide da body inside da sand.
Moses Run Away Midian Side
(Jesus Guys 7:27-29, 35)
13Da nex day, Moses go see his ohana peopo again. He spock two Israel guys, dey making argue. Moses tell da guy dat making da trouble, “Eh! How come you bussing um up, hah? Az yoa same ohana kine guy!”
14Da guy tell Moses, “Eh! Who you tink you?! Who wen make you da leada o da judge, fo tell us guys wat fo do?! Now you goin kill me, same ting jalike you wen kill dat Egypt guy, hah?”
Moses, he come scared, cuz he tinking, “So! Erybody know awready!” 15An fo shua, wen da Pharaoh guy find out, he tell da police fo go kill Moses. Moses, he run away from da Pharaoh guy, all da way Midian side.
Moses Live Midian Side
Wen Moses get dea, he sit down by one puka wea da watta come outa da groun. 16Had one guy dat was pries fo da Midian peopo. He get seven daughtas. Ery day, da daughtas go by da puka wea da watta come out. Dey pull up watta outa da puka an fill up da trough fo give watta to dea fadda guy sheeps an goats. 17Get odda sheep farma guys ova dea dat erytime go da same place an make da girls go way an no give dea sheeps watta. But dat time, Moses stand up an help da girls pull up da watta. He give watta to da sheeps an goats.
18Da girls, dey go back by dea fadda guy, his name Reuel. He tell, “Eh! Quick, you guys come back today! How come?”
19Dey tell um, “Had one Egypt guy wen get us guys outa trouble from da sheep farma guys. Den, he pull up watta fo us guys an give um to da sheeps an goats fo drink.”
20Da pries guy tell his daughtas, “So! Wea da guy now? How come you jus wen leave um ova dea? Go! Tell um fo come hea fo eat!”
21Dass how Moses wen start fo live wit da pries guy. Lata, Reuel wen give his daughta Zipporah to Moses fo marry. 22Dey wen get one bebe boy. Moses give um da name Gershom, cuz he tell, “I come from one nodda place, an now I living inside one diffren land,” cuz “Gershom” sound kinda like “guy from one nodda place,” dea language.
23Afta long time, da king guy fo Egypt wen mahke. But da Israel peopo, dey stay moaning still yet cuz dey slaves. Dey yell to God, “Help!” An God, he wen hear wat dey saying. 24God hear how dey moaning, an he no foget da promise he wen make to Abraham an Isaac an Jacob. 25God wen see da Israel peopo, an he know wat he gotta do fo dem.