Da Ten Commandments
201Den God say all dis:
Numba One
2“Dis me, Yahweh, yoa God, talking. Was me wen get you guys outa da Egypt land, wea you guys was slaves. 3You no go take odda gods fo you, cuz me, I da ony God fo you.
Numba Two
4“No go make idol kine gods fo yoaself dat look like anyting from up dea inside da sky, o from down hea on top da earth, o from inside da watta dat stay undaneat da groun. 5No go down in front da odda gods fo show um love an respeck, an no work fo dem. Cuz I yoa God Yahweh! An I one jealous God, if you go down in front da odda gods! Wen peopo do bad tings dat need punish, I go afta dem an I punish da ones dat hate me. An if dea kids do same ting, I punish dem too, an same ting wit dea grankids, an even dea great-grankids. 6But wen peopo show me love an aloha an do wat I tell um fo do, I stay stick wit dem, an dea kids, an dea grankids fo tousand generation!
Numba Three
7“No go use my name an ack like dat give you da right fo do any kine stuff. Cuz I Yahweh, an anybody use my name fo go do any kine stuff, no way I goin let dem go an no punish um.
Numba Four
(Matthew 5:21, 27, 43, 15:4, 19:18-19; Mark 7:10, 10:19; Luke 18:20; Jesus Guys 4:24, 14:15, Rome 7:7, 13:9; Efesus 6:2-3; James 2:11; Jesus Show 10:6, 14:7)
8“No foget da Res Day. Make shua dat day stay spesho fo me. 9You work six days an do eryting you gotta do. 10But da Numba Seven Day, dass da Res Day. Stay spesho fo me, yoa God Yahweh. Dat day, no do work notting -- you, yoa boy, yoa girl, yoa slave guy, yoa slave wahine, yoa animals, da visita guy from odda place dat stay yoa town, erybody! 11Me, Yahweh, I work six days fo make da sky an da earth an da ocean, an all da tings dat get inside dem. But da Numba Seven Day, I res. Dass why I say da Res Day good, an I make um spesho fo me.
Numba Five
12“Show respeck fo yoa fadda an yoa mudda. If you do dat, den you goin live long time on top da land dat me, yoa God Yahweh, stay give you.
Numba Six
13“No go murda nobody.
Numba Seven
14“No go fool around behind yoa wife o husban back.
Numba Eight
15“No go steal notting.
Numba Nine
16“Wen you gotta say someting in front da judge fo make proof wat one nodda guy wen do, no bulai.
Numba Ten
17“No go tink, ‘I like take da odda guy stuffs, an I goin take um!’ Dat mean, no go afta his wife, o his slave guy, o his slave wahine, o his cow, o his donkey, o wateva kine ting da odda guy get.”
Da Peopo No Can Handle Fo God Talk To Dem
18All da peopo hear da thunda an see da lightning. Dey all hear da sheep horn trumpet an see da smoke all ova da mountain. Da peopo, dey stay scared an shaking. Dey go stand back long way from da mountain. 19Dey tell Moses, “Mo betta you da one talk to us, not God. We goin lissen. But mo betta God no talk to us, cuz bumbye us goin mahke!”
20Moses tell da peopo, “No scared! You guys know why God come hea? He stay hea, fo make presha fo you guys, so you goin learn someting! An he like you guys no foget how you feel wen you stay scared a him, cuz if you scared, bumbye you no goin go do someting bad.” 21Da peopo stay long way from dea. But Moses, he go strait ova dea, nea da dark cloud wea God stay.
Da Rules Fo Da Altar
22Den Yahweh tell Moses fo tell da Israel peopo dis: “You guys see awready, dat I talk to you guys from outa da sky. 23Dass why you guys betta not make idol kine gods fo yoaself outa silva o gold, fo pray to dem jalike you pray to me. 24Dis how you gotta do fo me: Pile up dirt fo make one altar fo me. On top da altar, kill sheeps an goats an cows fo make sacrifice -- da kine wea you burn up da whole animal afta you kill um, an da kine you make fo show dat you an me stay tight togedda. Den ery place I goin tell you guys fo come, fo tink bout who me an talk bout me, I goin come by you dea an do good tings fo you. 25If you guys like pile up rocks fo make one altar fo me, no cut da rocks, cuz if you use one tool fo cut da rocks, den no goin be spesho fo me. 26No make big alta fo me wit steps fo go up, cuz no good you let somebody see yoa privates unda yoa robe wen you go up dea.”