Gotta Do Da Right Ting
231“No go tell odda people tings you hear if you know az not true. Wen get somebody dat do bad ting, no go make deal wit da guy dat do bad ting so you go bulai da judge fo him. 2Even if get plenny peopo say da same ting, no go togedda wit dem fo help um do someting bad. Wen you go in front da judge, no go follow da oddas jus fo make um come good fo yoa friends. 3Same ting, if one guy dat no mo notting come in front da judge, no go make diffren kine to him, jus cuz da guy no mo notting.
4“If get one guy dat stay agains you, an you find da guy cow o donkey inside da boonies, you gotta go take um back to da owna no matta da guy stay agains you. 5If you see one donkey dat stay carry heavy stuff, fall down an no can stand up, an da owna guy one guy dat stay hate you, still yet you no can jus leave da donkey dea. You gotta work wit da owna guy fo help da donkey stand up.
6“Wen get peopo by you dat no mo notting an get hard time, an dey gotta go in front da judge, no go do notting fo mess um up. 7But if get one guy dat neva do notting bad, make shua you no bulai bout da guy in front da judge an say dat he wen do someting bad. No go do notting agains da peopo dat stay do wass right, den gotta mahke. Cuz I God, an I no goin let you go if you go do bad ting.
8“No take dirty money notting, cuz dat kine money make da guy dat suppose to know wass right, jalike he blind an no can see notting, an make da judge tink, dat da peopo dat do da right ting, dey da bad guys.
9“Wen get peopo from odda place dat live by you guys, no go do notting fo make presha fo dem. Eh, rememba! you guys know how dey stay feel awready, cuz you guys was from odda place dat time you guys wen live inside da Egypt land.
Da Res Year An Da Res Day
10“Yoa land, six years you guys can plant an cut da food dea. 11But da year number seven, you guys gotta let da land stay res. Jus let um go an leave um. Dat year, da peopo dat no mo notting can eat wateva come up inside da field, an da wild animals can eat wateva grow dea. Same ting fo yoa grape farms an yoa olive farms.
12Ery week you guys work six days. Da numba seven day, you guys gotta stop. Dass so yoa cows an yoa donkeys can res too, an yoa worka guys an da peopo from odda place dat stay wit you guys can res too.
13Take care bout eryting I telling you guys. No even talk bout da odda gods. No even say dea name notting.
Da Three Spesho Religious Times
(Rules 16:16)
14Ery year, three times you goin take yoa sacrifices to one spesho place, fo make one spesho religious time fo me.
15Spring time, make da Bread Dat No Mo Yeast time. Seven days, no can eat bread dat get yeast inside, jalike I wen tell you guys fo do befo time. Do um da same month ery year dat you guys wen get outa Egypt. Nobody can come in front me if dey no mo someting fo give me.
16Lata, wen da tings you wen plant inside yoa field come up, bring me da firs tings you cut, fo make da spesho Cut Food time.
Afta dat, wen you guys pau cut da food, an da year pau, make da spesho Pau Cut Food time, afta you bring in eryting you wen plant inside yoa fields.
17Three time ery year, all da mens gotta come togedda in front me, Yahweh da Boss.
Da Rules Fo Da Sacrifice
18“Wen you make sacrifice fo me, no put blood wit da kine bread dat get yeast inside. An wen you kill one animal fo da spesho religious times, no let da fat part stay till da nex day. 19“Wen you guys cut da firs tings dat come up on top you guys land, bring da bestes stuffs by me, Yahweh, yoa God.
“No use da milk from da mudda goat fo cook da meat from da bebe goat.
Yahweh Goin Send One Angel Guy Wit Dem
(1 Peter 2:9)
20“Dis wat I doing: I stay send one angel messenja guy fo go in front a you, fo make shua notting bad happen to you. He goin make shua you goin reach da place I wen make ready fo you. 21Take care wen you wit him, an lissen to wat he tell. No go agains him wit bad feeling. Cuz if you guys go against wat he tell, he no goin take dat, cuz he get his powa from me. 22But if you lissen real good to wat he tell, an do eryting I goin tell you fo do, den I goin go agains da peopo dat go agains you, an I goin go fight da peopo dat goin fight you.
23“Cuz my angel guy, he goin go in front an take you da place wea da Amor peopo, da Het peopo, da Periz peopo, da Canaan peopo, da Hiv peopo, an da Jebus peopo live. Wen you get dea, I goin wipe out dose peopos. 24You betta not go down in front dea gods fo pray to dem, an you betta not let dose peopo make you do stuff fo dea gods, da way dey make. You gotta broke um up dea idol gods, an smash da big stones dat dey set up fo dem pray in front. 25You goin work fo me, Yahweh, yoa God. Den I goin make yoa food an yoa watta be good kine. I goin make shua you guys no come sick. 26Da wahines inside yoa land, dey no goin lose dea kids befo dey born o afta. Dey all goin get kids. I goin let you guys live long time.
27“Before you get to da Canaan land, I goin make da peopo inside dea come scared a me. All da places you goin go, all da peopo no goin know wat fo do, an dey all stay scared. Da peopo dat stay agains you, I goin make um turn aroun an run away. 28I goin make da peopo jalike dey lose fight befo you get dea. Da Hiv peopo an da Canaan peopo an da Het peopo, dey all goin stay outa yoa way. 29But I no goin make um all go way da same year, cuz no good da land stay lidat, an no mo peopo an get plenny wild animals fo hurt you. 30I goin make da peopo go way litto by litto. Dat way, afta you get plenny kids, den you can take ova da land.
31“I goin set you up wit all da land from da Red Sea to da Mediterranean Sea, an from da boonies to da Eufrates Riva. I goin turn ova da peopo dat stay live inside dat land to you, an you goin make um all go way. 32No make deal wit da peopo dea, o no make deal wit dea gods. 33No let dem stay yoa land. Cuz no good bumbye dey make you do how I say you not suppose to do. If you go do stuff fo dea gods, dat goin be jalike one trap fo catch you.”