Da Israel Peopo Take Da Deal Wit Yahweh
241Den God tell Moses, “Come up hea on top da mountain, by me, Yahweh. Bring Aaron an his boys Nadab an Abihu. Bring seventy a da older leadas fo da Israel peopo. Wen you guys still long way from da top, start fo go down in front me. 2Den Moses, you da ony guy dat goin come all da way to me, Yahweh. Da leada guys, dey no can go nea dea. Da odda peopo, dey no can even come on top da mountain litto bit wit da leada guys.”
3Moses go by da peopo. He tell um all da tings Yahweh wen tell him, an all da Rules. All da peopo say to him togedda, “Eryting Yahweh say we gotta do, we goin do um!” 4Den Moses write down all da tings Yahweh wen tell.
(Hebrews 9:20)
Nex morning early, Moses tell da peopo fo help build one altar down from da mountain. He tell um fo set up twelve big stone aroun da altar, one big stone fo ery one a da Israel ohanas. 5Den he pick some young guys from da Israel peopo, an send um fo go kill some animals an put da bodies on top da altar an burn um up fo make sacrifice. So dey take boy kine cows an make da kine sacrifice dat show dat eryting okay wit dem an Yahweh. 6Moses wen half half da blood from da cows. He put half inside tubs. Da odda half he wen throw on top da side a da altar. 7Den he take wat he wen write down bout da deal dat God make fo dem, an he read um real loud so all da peopo can hear. Da peopo tell, “Eryting Yahweh stay say, us guys hear, an we goin do um!”
8Den Moses take da blood from inside da tubs an sprinkle um on top da peopo. He say, “Dis blood, fo make real da deal dat Yahweh wen make wit you guys, bout all dese tings dat he tell!”
Moses An Da Leada Guys See God
9So den Moses go up da mountain. Aaron, Nadab, an Abihu, an da seventy older leadas fo da Israel peopo, dey go too. 10Up dea, dey wen see da God fo da Israel peopo! Da place he standing, get someting dat look like one brick floor undaneat, wit da blue kine jewelry stone dey call sapphire, blue an bright jalike da clear sky. 11But no matta da leada guys fo da Israel peopo see God dea, God neva do notting fo hurt dem. Dey even wen eat an drink togedda in front him!
Moses Go Talk Wit God
12Den Yahweh tell Moses, “Come up da mountain by me. Wait dea. I goin write da Rules an all da tings dat da peopo gotta do. I goin write um on top flat stone an give um to you, fo teach to da peopo.”
13Moses an his helpa guy Joshua start fo go up God's mountain. 14Befo dey go, Moses tell da leada guys, “You guys stay hea. Wait fo me an Joshua come back by you guys. Get Aaron an Hur wit you guys fo stay in charge, so anybody dat need fo talk to one judge can go by dem.”
15Wen Moses go up da mountain, had one cloud cova da mountain. 16-17Yahweh wen stay on top Mount Sinai, awesome to da max. Fo six day, da cloud cova da mountain. Da Israel peopo, dey no can see da awesome Yahweh up dea. Da ony ting dey can see is one fire on top a da mountain dat look jalike stay burning eryting. Da numba seven day, Yahweh wen talk to Moses from inside da cloud. 18Den Moses go inside da cloud. He go all da way up to da top a da mountain. He stay dea forty days, day time an nite time.