Da Peopo Give Stuff Fo Make Da Tent
251Yahweh tell Moses dis: 2“Go tell da Israel peopo fo bring me someting dey like give an bring um to me. You guys take wat dey give. 3Dis da kine presents you guys goin let dem give you: gold, an silva, an bronze. 4Wool string, blue an purple an dark red. Egypt kine linen cloth. Hair from da goats fo make cloth. 5Red leather from sheeps dat gotta dye um. Skins from dolphins. Koa kine wood. 6Olive oil fo da lamps. Stuff dat smell nice fo mix wit da olive oil fo put on top da prieses head fo show God wen pick dem, an fo make da incense smell nice. 7Blue lapis lazuli stones an odda stones fo put togedda fo make jewelry, fo da ves da main pries guy wear, an fo his ches piece in front. 8Den I like da peopo make me one spesho place fo live, so I can stay wit dem. 9I goin show you da plan fo my Tent an fo all da stuff inside da Tent, den you guys goin make um all jalike I stay show you.
Da Box Fo Rememba God's Deal
10“Tell um fo make one box outa koa wood, three feet nine inch long, two feet three inch wide, two feet three inch high. 11All ova da outside a da box, an all ova da inside, tell um fo put hundred percent pure gold. Den put pure gold molding aroun da top. 12Melt gold metal fo make four rings. Put um on top da four feet, two rings one side an two rings da odda side. 13Make two poles outa koa wood an cova dem wit gold. 14Put da poles inside da rings on top da two sides a da box, so can carry um. 15Da poles gotta stay inside da rings, no take um out. 16Den put inside da box, da ting I goin give you fo make shua you no foget da Deal I making wit you.
Da Place Fo Hemo Da Shame Fo Da Bad Tings Peopo Do, Fo Bring Um On Da Same Side Wit God
17“Make one cova fo da box outa pure gold, three feet nine inch long an two feet three inch wide. Dass da place I goin hemo da shame fo all da bad tings da peopo do, fo bring um on da same side wit me. 18Make two statues dat look like awesome angel watcha guys wit wings. Make um outa gold dat you work wit da hammer from da back side. One a dem go on top one side a da cova, an da odda go on top da odda side a da cova. 19Da two angel watcha kine statues on da two sides, an da cova, put um all togedda fo come one piece. 20Da statues dat look like awesome angel watcha guys wit wings, make dem jalike dey looking at each odda, ova da cova from da two sides. Make da statues wit da wings spread up ova da cova fo hide da cova. Cuz dass da place wea I goin hemo da shame fo all da bad tings da peopo do, fo bring um on da same side wit me. 21Den take da flat stones I goin give you fo make you rememba da Deal I making wit you guys, an put um inside da Box. Den put da cova on top da Box. Dass da place wea I goin hemo da shame fo all da bad tings da peopo do, fo bring um on da same side wit me. 22Az da place wea I goin meet wit you guys. I goin talk wit you from da spesho place wea I goin hemo da shame fo da bad tings da peopo do, right dea in da middo a da two statues dat look like da awesome angel watcha guys, dat stand ova da Box Fo Rememba My Deal. From dat place, I goin tell you eryting da Israel peopo gotta do.
Da Table Fo Da Breads Dat Dey Put In Front God
23“Make one table from koa wood, three feet long, one an a half feet wide, an two feet three inch high. 24Put pure gold all ova da table, an put gold molding all aroun da top. 25Put three inch edge all aroun da top so notting can fall off da table, wit gold molding all aroun da edge. 26Make four gold ring fo da table, an put da rings on top da four cornas wea da four table legs stay. 27Da rings go nea da edge dat stay aroun da top, fo take da poles fo carry da table. 28Make da poles outa koa wood fo carry da table, an put gold all ova dem. 29Make da dishes an pans an cups an bowls outa pure gold fo go wit da table, fo pour da kine wine offerings you pour out. 30Put da twelve spesho breads on top da table, da ones dat show I stay wit yoa twelve ohanas. Ery day you gotta put new kine breads in front me, fo eva.
(Hebrews 8:5)
31“Make one stan fo put da lamps on top, wit gold. Put all da pieces togedda fo make um come one piece pure gold, an use hammer fo shape um. Make da bottom wit da main piece dat go strait up, an da side pieces too, wit cup dat look like da bud a one flowa. 32From da middo part, six tings goin stick out jalike tree branch. Three branch goin come out one side, an three branch on da odda side. 33Three small cup on top, dat look jalike da almond flowa, wit da bud part an da flowa, stay on one branch, three on da odda one, an same fo da res a da odda branch too. 34Da main piece in da middo a da lamp stan, dat one get four small cup on top, jalike da almond flowa, wit da bud part an da flowa. 35Da three place wea da two side branch come outa da lamp stan, put one almond flowa bud part in da middo a da two branch, an anodda one on da nex two branch, an same same fo da las two branch. 36Da main piece, an da side pieces, an da almond flowas, all gotta be one piece pure gold, an you shape um wit da hammer. 37Den make seven olive oil lamp fo go on top da lamp stan. Set um up so da light come in front um. 38Da pans fo carry da fire an da covas fo pio da light, make dem outa pure gold too. 39Fo make da lamp stan an all da odda tings, use 75 pound pure gold.
40“Make shua you make eryting jalike da plan I stay show you hea on top dis mountain!”