Make Da Pries Guys Spesho Fo God
291“Fo make Aaron an his boys spesho fo me, so dey come da pries guys fo me, dis how you gotta do um:
Take one young boy kine cow, an two boy kine sheeps dat no mo notting wrong wit dem, 2an from flour dat no mo yeast inside, make roun breads, an anodda kine bread dat no mo yeast inside wit olive oil on top, an make cracka dat no mo yeast inside an get olive oil on top. Make um all wit da bestes kine wheat flour. 3Put all da bread kine stuff inside one basket, an bring um in front me, God. Bring da boy kine cow an da two boy kine sheeps dea too.
Da Pries Kine Clotheses
4“Den bring Aaron an his boys ova dea in front da Tent Fo Come Togedda Wit Me, in front da door. Wash dem wit watta. 5Take da spesho religious kine clotheses, an put um on Aaron wit da shirt fo undaneat da robe, den da robe dat go wit da ves, an da ves, an da ches piece. Da fancy kine band dass da bottom part a da ves, tie um aroun Aaron waist. 6Put da pries kine hat on top his head, wit da gold piece dat say he spesho fo me. 7Da spesho olive oil fo show dat Aaron da guy I wen pick, pour um on top his head.
8“Den bring Aaron boys put on dem da pries kine shirts 9an put da hats on top dea head. Den tie da sashes on top Aaron an his boys too. Dey da ohana dat goin get da right fo be da pries guys foeva.
Da Sacrifices Fo Da Pries Guys
Da Cow Sacrifice Fo Da Bad Kine Tings Da Pries Guys Wen Do
“Dis, az how you goin make da sacrifices fo make Aaron an his boys come da pries guys fo real kine. 10Bring da boy kine cow up in front da Tent Wea You Come Togedda Wit Me. Den Aaron an his boys goin put dea hands on top da cow head, fo show dat wen dey kill da cow, dass fo dem. 11Kill da cow in front me, Yahweh, right dea wea you go inside da Tent Wea You Come Togedda Wit Me. 12Take some a da blood from da cow, an put um on top da four tings jalike horns dat stick outa da altar, wit yoa finga. Da res a da blood, pour um aroun da bottom a da altar. 13Take all da fat dat cova da guts, da hard ting dat stick out from da liver, an da two kidneys wit da fat dat go aroun dem, an burn um on top da altar fo make smoke. 14All da odda meat from dat cow, an da skin, an eryting from inside da guts, take um outside da camp. Burn um all up ova dea, cuz dass da sacrifice fo da bad tings da pries guys wen do.
Da Kine Sacrifice Dey Burn Up
15“Nex, take one a da boy kine sheeps. An Aaron an his boys goin put dea hands on top da sheep head fo show dat wen dey kill da sheep, dass fo dem. 16Kill da sheep, an sprinkle da blood all aroun da altar. 17Cut up da sheep, an wash da inside parts an da legs. Put um on top da altar, togedda wit da cut up pieces an da head. 18Kay den, burn up da whole sheep on top da altar. Dass da kine sacrifice you burn up wit fire fo me, Yahweh, an da smell goin make me feel good inside.
Da Sacrifice Fo Make Aaron An His Boys Da Prieses
19“Now, take da odda boy kine sheep. Aaron an his boys goin put dea hands on top dat sheep head too fo show dat wen dey kill da sheep, dass fo dem. 20Kill da sheep, an take some a da blood, an put um on da bottom a Aaron an his boys right ear, an on top da thumb a dea right hand, an on top da big toe a dea right feet. Den sprinkle da res a da blood all aroun da altar. 21An take some a da blood on top da altar, an some a da olive oil you wen pour on top Aaron fo show dat God wen pick him. Sprinkle um on top Aaron an da spesho religious kine clotheses he wearing, an on top his boys an dea spesho clotheses. Den Aaron an his boys goin come da pries guys fo me, Yahweh.
Da Sacrifice Dat Dey Lift Up In Front God
22“Cut da fat pieces from da sheep -- da fat tail, da fat dat cova da inside parts, da ting dat stick out from da liver, an da two kidneys wit da fat aroun dem. Take da right back leg too, cuz dis sheep da one you use fo make dis guys da prieses. 23Den, from da basket full a breads dat no mo yeast inside dat you wen put in front me, Yahweh, take one round bread, an one small wheat bread dat you make wit olive oil, an one cracka. Put dat on top da fat an da meat from da sheep. 24Tell Aaron an his boys fo put out dea hands in front dem. Put all da stuff on top dea hands, so dey can lif um up an move um dis side an dat side all togedda. Dass one lif up kine sacrifice dey goin make in front Yahweh. 25Den take all dat from dea hands, an burn up da whole ting on top da altar. Dass da kine sacrifice you burn up wit fire fo me, Yahweh, an da smell goin make me feel good inside.
Da Meat Fo Da Pries Guys
26“You, Moses, afta you take da ches meat from da sheep you wen kill fo make Aaron da pries, lif um up in front me, Yahweh, fo one sacrifice fo me. An dass fo you eat. 27Da ches meat dat da prieses lif up in front me, Yahweh, an da hind quarter meat dat dey lif up fo give um to me, jalike da meat dat Aaron an his boys da pries guys wen lif up from dat sheep you wen kill, da time you make Aaron-dem come da prieses. All dat meat you goin make spesho fo me, God. 28Dat kine meat goin be dea food. Da Israel peopo goin give um to Aaron an all da odda pries guys dat goin come from him, foeva. Cuz dat meat, jalike one present fo God. Dass why dis goin be da kine present da Israel peopo goin give to me, from da sacrifices dey goin make fo me cuz I stay make eryting okay fo dem.
Da Pries Kine Clotheses
29“Da spesho religious kine clotheses, Aaron goin give um to da nex guy dat goin come from him, fo da time wen dey put da olive oil on top dat guy an make da sacrifices fo come prieses bumbye. 30Wen Aaron mahke an one a his boys come da main pries guy, fo go inside da Tent Wea I Come Togedda Wit You Guys fo do da pries kine stuff inside da Place Dat Stay Spesho Fo Me, dat guy goin wear da spesho clotheses, seven days.
Da Food Fo Da Pries Guys
31“Da boy kine sheep you wen kill fo make Aaron dem da prieses, take da res a da meat an cook um inside one place dat stay spesho fo me. 32Aaron an his boys goin eat dat sheep meat, an da breads dat stay inside da basket, by da place fo go inside da Tent Wea I Goin Come Togedda Wit You Guys. 33Ony da pries guys, da ones dey wen make da sacrifice fo da time dey make um come prieses, fo hemo da shame fo da bad kine stuff dey wen do, dey da ony ones dat can eat dat meat. Da regula peopo, dey no can eat dat meat, cuz az spesho fo me, God. 34If get some mo meat o bread from da sacrifice fo make um da prieses, dat stay till da nex day, gotta burn all dat. No can eat um, cuz az spesho fo me.
Da Seven Day Spesho Religious Time
35“So, like I wen tell you fo do fo Aaron an his boys fo make um come prieses, you gotta do dat, seven days. 36Ery day you gotta kill one boy kine cow, fo make da bad tings da peopo wen do come right. Ery day you gotta make sacrifice fo make da altar come okay fo use. Den you gotta pour olive oil on top da altar, fo make um spesho fo me. 37Seven days, you gotta do all dat fo hemo da shame fo da bad kine stuff da peopo wen do, an fo make da altar spesho fo me. Afta da seven days, goin be so spesho fo me, dat anyting dat even touch da altar, goin come spesho fo me too.
Da Sacrifices Fo Ery Day
38“From now, dis wat you guys goin sacrifice ery day fo me: two bebe sheeps one year ol. 39You goin kill one bebe sheep morning time, an da odda one right afta da sun go down but still get light. 40Morning time, take two poun fancy kine wheat flour wit one quart a da bestest kine olive oil fo burn, an one quart wine fo pour on top da bebe sheep wen you burn um up fo sacrifice. 41Afta da sun go down, wen you kill da odda bebe sheep fo sacrifice, you do da same ting, jalike morning time. Dass da kine sacrifice you burn up wit fire fo me Yahweh, an da smell make me feel good inside. 42Dass da regula sacrifice you goin make ery day foeva, by da place you go inside da Tent Wea I Come Togedda Wit You Guys, in front me, Yahweh.
Dass da place wea I goin meet wit you, Moses, an talk to you, 43an I goin meet da Israel peopo dea too. An cuz I da awesome God, dat place goin be real spesho fo me. 44Dat Tent, an da altar, an Aaron an his boys, I goin make dem all spesho fo do da pries kine work fo me. 45I goin make house wit da Israel peopo, an I goin be da God fo dem. 46Dey goin know dat me, Yahweh, I dea God, an dat I da one dat wen get um outa Egypt land so dat I can live wit dem. Dass me, Yahweh, dea God, dass talking.