Da Altar Fo Burn Incense On Top
301“Make one altar outa koa wood fo burn incense on top. 2Make um square, 18 inch by 18 inch, an 3 feet high, wit tings jalike horns coming out from it. 3Put pure gold all ova on top da altar - da top, da sides, da tings jalike horns, eryting. Put gold molding aroun um. 4Make gold rings fo da alta, an put um unda da molding, two on one side an two on da odda side. Da rings, fo hold da poles fo carry da altar. 5Make da poles outa koa wood, an put gold all ova dem.
6“Put da altar in front da thick curtain dat hide da Box Fo Rememba My Deal, dat one dat get da cova ova da deal dat stay inside. Dat Box, da place wea I come togedda wit you, an da place wea I goin hemo da shame fo all da bad tings da peopo do, so dey can get um right wit me. 7Aaron gota burn da kine incense dat smell real good, on top da altar. Ery day, morning time, wen he take care da olive oil lamps, he goin do dat, 8an ery day wen da sun go down an Aaron put up da olive oil lamps on top da stand, same ting. Goin be one incense kine sacrifice dat dey make in front me, Yahweh, foeva. 9Gotta be one pries from yoa peopo dat burn da right kine incense on top dat altar. No put on top dat altar any kine incense, o use um fo da kine sacrifice you gotta kill an den you burn um up. No use um fo sacrifice wheat on top. No use um fo pour wine on top fo make sacrifice. 10Ery year, from now to foeva, make one spesho day. Dat day, Aaron goin make da sacrifice fo hemo da shame fo da bad kine stuff da peopo do. Den he goin put da blood from dat sacrifice on top da four tings jalike horns dat stick out from da incense altar. Dat blood, make da altar okay fo use fo me. Dat altar goin stay spesho fo me, Yahweh, foeva.”
Wat God Say Dey Gotta Do
Da Money Fo Hemo Da Shame
11Den Yahweh tell Moses: 12“Wen you make all da peopo sign up fo find out how much Israel peopo get ery place, ery guy gotta pay me, Yahweh, fo let um go. Den da real bad kine sick no goin hit da peopo wen dey sign up. 13Da guys wen dey go ova to da side wea awready wen count da peopo, dey gotta give one half shekel silva fo me, Yahweh. (Dass da kine shekel da pries guys use, 5 shekel weigh jalike one silva ounce.) 14All da guys dat 20 year ol o moa, dey all gotta sign up, an dey all gotta pay fo give um to me, Yahweh Inside Da Sky. 15Da rich guys no goin pay mo den one half shekel silva, an da guys dat no mo notting, still yet dey gotta pay da whole half shekel wen dey give um to me, cuz dass fo me hemo da shame fo ery one a you guys. 16Take da money dat da Israel peopo pay fo me hemo dea shame, an use um fo da work dat da pries guys do inside da Tent Wea I Come Togedda Wit You Guys. Wen dey pay dat money, da Israel peopo no goin foget dat dey wen pay um in front me, Yahweh, so den I hemo dea shame.”
Da Watta Tank
17Den Yahweh tell Moses: 18“Make one big watta tub outa bronze metal, fo put da watta inside dat da pries guys goin use fo wash. Make one bronze stand fo hold um up. Set um up inside da middo, wit da Tent Wea I Goin Come Togedda Wit You Guys one side, an da big altar da odda side. Put watta inside da tub. 19Aaron an his boys goin wash dea hands an dea feets wit da watta from da tub. 20Erytime dey go inside da Tent, dey gotta wash wit watta, so bumbye dey no mahke. Same ting, erytime dey go nea da big altar fo do dea job, fo burn up da sacrifices dey make wit fire fo me, Yahweh, 21dey gotta wash dea hands an feets, so dey no mahke. Dis goin be da Rule fo Aaron an da pries guys dat goin come from him bumbye foeva.”
Da Spesho Oil Fo Da Prieses
22Den Yahweh tell Moses: 23“Go get da bestest kine sap fo make perfume. Weigh da sap da way da pries guys weigh um:
Myrrh perfume, sticky kine, 12 an a half poun,
Cinnamon, 6 an a quarta poun,
Cane dat smell nice, 6 an a quarta poun,
24Cassia, 12 an a half poun,
Olive oil, 4 quart.
25Mix da diffren tings da way da perfume guys make um. Dass fo make da oil dass spesho fo me, fo put on top da prieses an da tings da prieses use, fo show dat I wen pick da prieses an dey spesho fo me, Yahweh. 26Den put da olive oil on top
da Tent Wea I Come Togedda Wit You Guys,
da Box Fo Rememba Da Deal,
27da table an all da tings you use wit um,
da lamp stand an all da tings dat go wit um,
da small altar fo da incense,
28da big altar fo burn up da sacrifices an all da tings you use wit um, an
da watta tub an da stand. 29Dass how you goin make all dose tings spesho fo me. Afta, anyting dat touch dose tings bumbye, dat ting goin come spesho fo me too. 30Put da spesho oil on top Aaron an his boys, fo make dem come spesho fo me. Dey goin be da pries guys fo me.
31“Tell da Israel peopo: ‘Dis kine oil, goin be spesho fo me foeva, fo show who da ones I wen pick. 32No can use um fo rub on top one guy's body. No can make odda oil wit da same stuffs inside, o da same measures. Dat kine oil, spesho fo me, an gotta be spesho fo you guys too. 33Anybody go make da same kine oil outa da same kine stuffs, o anybody go put um on top some guy dat not one pries, gotta cut dem off from da Israel peopo an no let um stay wit you guys!”
Da Incense
34Den Yahweh tell Moses: “Take da nice smell spices fo make da incense -- yellow gum resin, da kine sea shell dat smell nice wen you burn um, galbanum sap. Put um togedda wit da pure sap from da frankincense bush. How much you put one kine, az how much you put ery odda kine, same same. 35Make um, same way peopo make perfume. Da incense gotta get salt inside too, an be hundred percent pure, an be spesho fo me. 36Grind up some fo make um come powder, an put some in front da Box Fo Rememba Da Deal, inside da Tent Wea I Come Togedda Wit You Guys. You guys know, dat stuff real spesho fo me. 37Wen you guys make dis kine incense, no make um fo yoa own self, cuz dis kine stay spesho fo me, Yahweh. 38Anybody go make da same kine incense, jus so dey can smell um, gotta cut dem off from da Israel peopo an no let um stay wit you guys!”