Da Gold Cow Idol God
(Jesus Guys 7:40; 1 Corint 10:7)
321Wen da Israel peopo see Moses stay on top Mount Sinai long time, dey tinking, “How come dis guy Moses no come down from ova dea?!” So dey all come togedda in front Aaron, an tell um, “Make one idol god fo show us guys wea fo go. Cuz dat guy Moses, da one dat wen get us outa da Egypt land, we donno wat happen to him!”
2Aaron tell um, “Kay den. Take off da gold earrings dat you guys wifes an boys and daughtas get, an bring um ova hea by me.” 3So all da peopo take off dea gold earrings an take um by Aaron. 4Aaron take da earrings. He melt da gold, an wit one tool, he make one idol god dat look jalike one bebe boy kine cow.
Da peopo tell, “Eh, all you Israel peopo! Dis, yoa idol god! Dis, az one a da gods wen bring you guys outa da Egypt land!”
5Wen Aaron see how dey like dis, he build one altar in front da idol god. He tell erybody, “Tomorrow, we make one spesho religious kine ting fo Yahweh!” 6So da nex day, early morning time, da peopo make sacrifices fo da idol god an burn da sacrifices, an dey bring odda kine sacrifices to da idol god fo show dat eryting okay wit him an dem. Den dey sit down an party an drink plenny. Den dey start fo go fool aroun.
God Send Moses Back
7Den Yahweh tell Moses, “Go back down da mountain quick! Yoa peopo, da one you wen bring outa da Egypt land, dey stay mess up an doing all pilau kine stuff awready. 8I wen tell um da right way fo do, but right away dey stay turn aroun an go da wrong way awready. Dey wen melt gold fo make one idol god dat look jalike one bebe boy kine cow. Dey go down in front da idol god an make sacrifices fo um. Dey telling, ‘All you Israel peopo! Dis idol god fo shua, az one a da gods dat wen bring you guys outa da Egypt land!’ Az wat dey tell.”
God No Take Wat Da Israel Peopo Doing
9Yahweh tell Moses: “I know dis peopo. Get plenny hard head. 10So now, Moses, you leave me alone, cuz I no like wat dey stay doing. I goin wipe dem out. Den, I goin make you da ancesta fo one importan peopo.”
11But Moses, he beg Yahweh his God fo no do dat. He say, “You, you Yahweh. How come you stay huhu wit yoa own peopo? You wen get dem outa da Egypt land, an you wen use plenny powa an make strong fo do dat. 12If you go wipe um out, da Egypt peopo goin say, ‘Dat god fo da Israel peopo, fo shua he wen like make bad to his peopo. Cuz wen he take um outa oua Egypt land, was ony fo go kill um inside da mountains an wipe um out, so den dey no stay inside da world.’
“Cool head! No stay mad. Change yoa mind an no do bad tings to yoa peopo. 13Tink bout Abraham an Isaac an Israel, da guys dat wen work fo you befo time. You wen make strong promise by yoaself dat you really goin do wat you say you goin do fo dem. You wen tell dem, ‘I goin make da peopo dat goin come from you come so plenny, dey goin be jalike da zillion stars inside da sky. Da peopo dat goin come from you, I goin give um da whole land dat I was talking about, fo come dea land foeva.’-” 14So Yahweh change his mind bout da bad tings he wen plan fo do to his peopo, da Israel peopo, an he no do um.
Moses Go Down Da Mountain
15Den Moses turn aroun an go down from da mountain. He get da two flat stone in his hands wea God wen write da Deal front side an back side. 16Da flat stones, God da one dat wen make da shape, an he da one dat wen cut da alphabets on top da stones.
17Moses come da place wea Joshua stay waiting fo him. Joshua hear da peopo making plenny noise. He tell Moses, “Eh! Soun jalike get fight inside da camp!”
18But Moses tell,
“Dass not da kine song fo wen you win da war,
An az not da kine song fo wen you lose da war.
Wat I hear, jalike some guys get party!”
Moses Punish Da Peopo
19Wen Moses come nea da camp, he see da idol kine god dat look jalike one bebe boy kine cow, wit da peopo dancing in front. Moses come real huhu. He wen throw down da flat stone he stay carry, an broke um up, right dea down by da mountain. 20An den Moses take da idol god dey wen make, dat look jalike one bebe boy kine cow, an he burn um up. Den he pound up da gold an make um jalike powda. He mix um wit watta an make da Israel peopo drink da watta wit da powda inside.
(Jesus Guys 7:40)
21Moses tell Aaron, “So, wat? Wat dese peopo wen do to you, fo make you do dis real bad ting to dem?”
22Aaron tell, “Moses, you da boss. No get mad bout dis. You know dis peopo, dey like do bad kine stuff. 23Dey tell, ‘Aaron! Make gods fo us guys, dat goin show us wea fo go! Cuz dat guy Moses, da one dat wen bring us guys outa da Egypt land, we donno wat happen to him.’ 24So, I tell um, ‘Anybody get gold kine stuff, take um off!’ Dey give um to me, an I throw um inside da fire, an dass how come get dis bebe cow kine ting.”
Dey Kill Da Peopo Dat Stick Wit Da Idol God
25Moses see dat da peopo, dey stay run wild, an Aaron da one wen let um, an Moses know dat all da peopo dat stay agains dem stay laugh at um. 26So Moses go stand by da camp gate, an yell, “Erybody dat stay stick wit Yahweh, come ova hea by me!” All da Levi ohana guys wen come togedda by Moses.
27Moses tell da Levi guys, “Dis wat Yahweh, da God fo da Israel ohana, say. Go get yoa swords an tie um on top yoa belt. Den go all ova da camp, one side to da odda side an back, all da way to da camp gates. Go kill da idol god guys, no matta dey yoa brudda guys, an yoa neighba guys, an yoa ohana guys!” 28Da Levi ohana guys do wat Moses tell um fo do. Dat day, bout 3,000 guys wen mahke.
29Den Moses tell da Levi ohana guys, “Da ting you guys do today, dat make you guys spesho fo Yahweh from now. Cuz all you guys even wen go agains yoa own boys an yoa own brudda guys. Cuz a wat you wen do today, God goin do good tings fo you.”
Moses Tell God Fo Let Go Da Peopo An Hemo Dea Shame
30Nex day, Moses tell da peopo, “Da stuff you guys wen do, was plenny bad. Still yet, I going back up dea by Yahweh. Maybe I can do someting so he go let you guys go fo da bad ting you wen do, an hemo yoa shame, an let you guys come back to him.”
31So Moses go back by Yahweh. He tell, “Please! Dese peopo, dey wen do plenny bad ting, cuz dey wen make one gold idol god fo demself! 32But now, if you like let um go fo da bad ting dey wen do, an hemo dea shame from dat, okay. If you no like let um go, mo betta you wipe my name out too from inside yoa book!”
33But Yahweh tell Moses, “Ony da peopo dat wen do bad kine stuff cuz dey stay agains me, dey da ones I goin wipe out dea names from inside my book. 34Now, you go. Take da peopo da place I wen tell you fo go. Goin get one angel messenja guy from me dat goin go in front a you. An wen da time come fo me fo punish peopo, I goin punish da ones dat wen do da bad kine stuff.”
35An, az wat Yahweh wen do. Yahweh make da real bad sick dat hit da peopo, cuz a wat dey wen do wit da idol god dat look jalike one bebe boy kine cow, da one Aaron wen make.