361So now, time fo Bezalel fo do eryting Yahweh wen tell um dey gotta do -- him, an Oholiab, an all da odda peopo dat Yahweh make um know how fo make da tings dat stay spesho fo God, dat he wen tell um fo make.”
Da Peopo Bring Mo Den Plenny Stuffs Fo Da Tent
2Den Moses tell Bezalel an Oholiab fo come by him. Same ting fo all da odda peopo dat know how fo do um from Yahweh. Erybody dat like do da job, he tell um fo start da work. 3Da worka guys wen get from Moses, all da tings dey need, from da gifs dat da Israel peopo wen bring, fo do da work fo make da Tent. Ery morning, had peopo dat still yet bring to Moses mo an mo plenny stuffs dat dey like give.
4Da guys dat know real good how fo make da tings fo da Tent, dey all wen leave da tings dey making 5fo go tell Moses, “Nuff awready! No need fo da peopo bring mo plenny stuffs den wat us guys need fo do da work Yahweh say we gotta do.”
6So Moses tell peopo fo go all ova da camp fo tell erybody. “Nuff awready! No need anybody stay bring mo gifs fo da Spesho Tent now!” Dass why da peopo wen pau bring stuff, 7cuz dey wen bring mo plenny fo all da tings da worka guys need fo make da stuff.
Dey Put Togedda Da Tent
Da Inside Tent
8Da peopo dat know how fo make stuff, dey wen make da inside tent. Dey weave da fancy kine linen cloth, ten long piece. Wen dey weave um, dey put da blue an purple an red wool string fo make picha dat look like God's awesome angel watcha guys. 9Ery piece cloth, 42 feet by six feet, same same. 10Dey put togedda five piece cloth, long side to long side, fo make da piece fo da front side a da tent, an da odda five piece cloth fo make da piece fo da back side. 11Dey take da blue kine wool string an make loops all down one side a da piece fo da front side wea dey come togedda, an same ting fo one side a da piece fo da back side. 12Dey make 50 loop fo da piece on da front side, an 50 loop fo da piece on da back side, so ery loop fo da one piece come togedda wit da loop on da odda piece, fo make da whole tent come one piece. 13Den dey make 50 gold hook fo hold da two parts togedda, fo make da whole tent come one piece.
Da Tent Cova
14Da worka guys wen make cloth outa goat hair fo make one tent dat go ova da inside tent. Dey wen make 11 long piece cloth fo dat one. 15Ery piece 45 feet long by six feet, same same. 16Fo make da back side a da outside tent, dey put togedda five piece, an fo da front side, six piece. 17Dey make 50 loops all down one side wea da back side come togedda, an same ting fo da piece fo da front side. 18Den dey make 50 bronze hook fo hold da two parts togedda, fo make da whole outside tent come one piece. 19Fo da cova ova da whole Tent, dey make da inside one outa red ledda from da sheep skins, an dey make da outside one outa dolphin skins.
Da Boards Fo Da Tent
20Da boards dat stand up fo hold up da Tent, dey make um outa koa wood. 21Ery board 15 feet high an 27 inch wide. 22Da bottom side wea ery board fo da Tent stand up, dey make two piece dat stick out nex to each odda, fo go inside da metal piers. 23Fo da sout side a da Tent dey make 20 boards 24an 40 silva piers fo go unda da 20 boards, two piers fo one board, wit holes fo da two piece dat stick out from da board, an same ting fo all da boards. 25Fo da odda side, da nort side, dey make 20 boards 26an 40 silva piers fo go unda da 20 boards, two piers fo one board, an same ting fo all da boards. 27Fo da back side, dass da wes side, dey make six boards. 28Fo da two back cornas a da Tent, dey make two boards wit cornas. 29Da corna boards, jalike was two side boards dat come togedda, same same, but dey make um one piece from da bottom side to da top. Da top side, get ring dea fo make da corner boards stay togedda wit da odda boards, da two sides. 30So fo da back side, get eight boards wit 16 silva piers, two piers unda ery board.
Da Odda Pieces Fo Da Tent
31Dey make koa wood poles dat go across fo make da odda boards stay togedda. Dey make five fo hold togedda da boards one side a da Tent, 32five fo hold togedda da boards da odda side a da Tent, an five fo hold togedda da boards da back side a da Tent, da wes side. 33Da main pole across da middle, stay long so can go across all da boards dat stand up, from one end to da odda. 34Dey cova da boards dat stand up wit gold, an make gold metal piece on top dem fo hold da five poles dat go across, an dey cova da pole dat go across wit gold too.
35Dey weave fancy kine linen curtain fo make two rooms inside da Tent. Dey weave um, an put da blue an purple an red wool string wit da linen fo make picha dat look like God's awesome angel watcha guys. 36Fo hold up da thick cloth inside da middo, dey make four poses outa koa wood an cova dem wit gold. Dey make gold hooks fo da poses, an dey melt silva fo make four piers fo undaneat.
37Dey make one nodda curtain so no can look inside da Tent from outside. Dey make um outa da fancy kine linen cloth, an weave um fancy kine with da blue an purple an red wool string. 38Dey make five poses fo dat curtain, wit hooks. Da top part a da poses, an da straps around dem, dey wen cova wit gold, but da five piers undaneat, dey make dem outa bronze.