Da Clotheses Fo Da Priest Guys
391Bezalel guys wen use da blue an purple an red wool string fo weave da spesho kine religious clotheses dat da pries guys wear inside da Place Dass Spesho Fo God. Dey make da spesho kine religious clotheses fo Aaron too, jalike Yahweh wen tell Moses fo make um.
2Da pries kine ves, dey make um outa gold an fancy kine linen cloth, wit blue an purple an red wool string. 3Dey pound gold fo make um real thin, den dey cut um skinny kine jalike string, and twist um togedda wit da blue an purple and red wool string an da linen string fo make pichas on top da fancy kine linen cloth. 4On top da two shouldas, dey put two piece fo hold togedda da two sides. 5Dey weave one nice looking waist band an sew um on da bottom part a da ves. Dey weave um wit gold, an wool string (blue, purple, an red), an fancy kine linen string, same ting jalike Yahweh wen tell Moses fo do. 6Dey take two blue lapis lazuli stone, an make gold frame fo um. Den dey cut da alphabets on top da stones fo da names a da twelve Israel boys. 7Den dey sew da stones on top da two shoulda pieces on top da ves. Dose two stones, fo make da peopo rememba bout da Israel peopo. Dass jalike Yahweh wen tell Moses fo do.
Da Ches Piece
(Outa Egypt 28:15-30)
8Dey weave da ches piece outa gold dat dey twis togedda wit da wool string (blue, purple, an red), an fancy kine linen string, da same style jalike da ves. 9Dey fold um an sew da sides fo make one small bag dass square, eight inch by eight inch.
10Den, on top da ches piece, one side, dey put twelve fancy jewelry kine stones wit frames, fo make four row, wit three stone ery row:
Firs row, red ruby, yellow chrysolite, an green emerald.
11Da secon row, light green turquoise, dark blue lapis lazuli, an white moonstone.
12Da third row, jacint, agate, amethyst.
13Da las row, beryl, onyx, jasper.
Ery stone get gold frame fo hold um. 14Ery stone, az fo one a da Israel ohanas. Dey cut dea names jalike fo make one seal, twelve name on top da twelve stone, fo da twelve Israel ohanas.
15On top da ches piece, dey make plenny small chains outa pure gold an twist um togedda jalike one thick string. 16Dey make two gold frames wit two gold rings fo da ches piece, an put da two rings on top da two top cornas, 17an dey hook da two chains to da two rings. 18Den dey hook da odda side a da two chains to da two gold frames on top da shoulda pieces fo da ves, fo let da ches piece hang down in front from da two shouldas.
19Dey make two moa gold rings, an put um da two sides a da ches piece, da bottom side wea da ches piece touch da ves. 20Den dey put two mo gold rings on top da ves, down from da shoulda pieces, front side, litto bit up by da place wea da waist band come togedda wit da ves. 21Dey tie da ches piece wit da blue wool string, from da ches piece rings to da rings on top da ves. Dey tie um so da ches piece stay right on top da fancy waist band, so no can come off, jalike Yahweh wen tell Moses fo do.
Da Odda Spesho Clotheses Fo Da Priest Guys
(Outa Egypt 28.31-43)
22Dey weave da whole robe dat go wit da ves outa da kine blue wool string dat cos plenny. 23Dey leave one puka open in front da middle a da robe fo da head, an weave extra stuff all aroun da puka, fo make um thick dea so no broke. (Jalike da metal ring shirt da army guys wear.) 24Dey take blue an purple an red wool string, an sew pichas dat look like pomegram fruit aroun da bottom a da robe nea da floor. 25-26In da middo a da pomegram fruits, dey put small kine bell made outa pure gold, so get bell, den pomegram, den bell, den pomegram, all aroun da bottom, jalike Yahweh wen tell Moses fo make. Aaron gotta wear dat wen he do his work.
27Fo Aaron an his boys dey weave da long shirt outa fancy kine linen cloth. 28Dey make da pries kine hat outa da linen cloth, an da pries guys undapants outa linen cloth too. 29Dey weave da sash outa fancy kine linen an blue an purple an red wool string, all kine colors, jalike Yahweh wen tell Moses fo do.
30Dey make one small piece pure gold fo Aaron forehead fo show dat he spesho fo Yahweh. Dey cut da alphabets on top da gold jalike fo one seal, fo say “Spesho Fo Yahweh.” 31Den dey tie one blue wool string on da gold ting an out um on da pries kine hat, jalike Yahweh wen tell Moses fo do.
Da Tent Pau
32All da work fo build da Tent Fo Come Togedda Wit God wen pau awready. Da Israel peopo wen make eryting jalike Yahweh wen tell Moses fo do.
33Da peopo wen bring da Tent to Moses
Da inside tent an all da stuffs fo go inside da tent: da hooks,
Da stand up boards, an da poles dat go across da boards,
Da poses an da piers,
34Da red leather cova from boy sheep skin fo da tent,
Da outside cova from da dolphin skins,
Da thick curtain dat cova da Real Spesho Place inside da Tent,
35Da Box Fo Rememba Da Deal, an da poles,
Da cova fo da Box dass fo show dat God goin take away da shame fo all da bad tings peopo do, so dey can come back da same side wit him.
36Da Table an all da tings dey use fo um,
Da breads dey put in front God,
37Da pure gold stand fo da lamps,
Da lamps an all da stuff dey use fo um,
Da olive oil fo da light,
38Da gold altar,
Da oil fo put on top da pries guys,
Da incense dat smell nice,
Da thick curtain so no can look inside da Tent from outside,
39Da bronze altar dat get da bronze grill inside, an da poles,
All da tings dey use fo make da sacrifices,
Da watta tub an da stand,
40Da cloth fo go aroun da yard,
Da poses an da piers,
Da curtain dat go in front da gate fo da yard,
Da ropes an da tent pegs,
All da tings dey use inside da Tent Fo Come Togedda Wit God,
41Da spesho kine religious clotheses da pries guys wear wen dey working inside da Place Dass Spesho Fo God,
Da spesho clotheses fo Aaron da main pries,
All da religious kine clotheses fo Aaron boys dat goin be da pries guys.
42Da Israel peopo, dey wen do all da work so eryting stay jalike Yahweh wen tell Moses fo make um. 43Moses wen check um out an see dat dey wen pau do all da tings dey gotta do, jalike Yahweh wen tell um fo do. So Moses aks God fo do plenny good tings fo da peopo.