Da Walking Stick Come One Snake
41Moses tell, “But eh! Wat if da leada guys no trus me, an no lissen wat I say, cuz dey tinking, ‘Nah! Yahweh, he neva let you see um!’ Den wat?”
2Den Yahweh tell, “Eh! Wat dat ting inside yoa hand?”
Moses tell, “One walking stick.” 3God tell, “Throw um down on top da groun.” Wen Moses throw um down, da stick come one snake. Moses come scared, an he run away from da snake.
4Den Yahweh tell um, “Reach ova dea an grab da tail.” Moses grab um, an da snake come one walking stick again, right dea inside his hand! 5Yahweh say, “You do dis fo help da Israel peopo believe dat me, Yahweh, I wen let you see me, an dat I da same God dat yoa ancesta guys wen pray to, da God fo Abraham an Isaac an Jacob.”
Moses Hand Get Sore All Ova
6Nex ting, Yahweh tell Moses, “Put yoa hand inside yoa shirt.” Moses put his hand inside his shirt, an wen he pull um out, eh! Get one bad kine sick all ova da skin dat odda guys can catch, an white jalike snow!
7Den God tell, “Now, put yoa hand inside yoa shirt one mo time.” Moses put his hand back inside da shirt. Wen he pull um out, da skin come back regula kine, jalike his regula skin. 8God tell um, “No matta dey no trus wat you say afta dey see you grab da snake, an he come one stick, fo shua dey goin trus you afta dey see yoa hand dat get da sores come out okay. 9If dey no trus you still yet, afta you show um da two spesho sign, an if dey no like lissen to you still yet, go get watta outa da Nile Riva, an pour um on top da dry groun. Dat watta dat you take outa da Nile Riva, wen you pour um on top da groun, goin come blood dea.”
Not Easy Fo Moses Talk
10Moses tell Yahweh, “Eh Yahweh, please! I not da kine guy know how fo talk real good. From small kid time till now, you stay tell stuff to me, yoa worka guy. But still yet, fo me, az hard fo talk, an I no can talk real good, you know wat I mean?”
11Yahweh tell Moses, “Tink! Who wen make peopo so dey can talk, o no can talk? Who wen make peopo so dey can see good, o dey no can see? Dass was me, Yahweh, wen do all dat! 12Go now. Do wat I wen tell you. Weneva you gotta talk, I goin help yoa mout. I goin teach you wat you gotta say.”
13But Moses tell, “Please, Boss! Send somebody you like fo do da work, but not me!”
14Den Yahweh wen come huhu wit Moses. He tell Moses, “Wat bout yoa brudda guy Aaron, da leada guy fo da Levi ohana? I know, easy fo him fo talk good. Right now he stay coming from Egypt awready fo meet you. Wen he see you, he going feel real good inside. 15You goin talk to yoa brudda an tell um wat he suppose to say. I goin help you an him talk good, an I goin teach you guys wat you goin do. 16Aaron goin be da talka guy fo you, fo talk to da peopo. He goin be jalike da mout fo you, an you goin talk to him jalike you God, but az me. 17An no foget yoa walking stick. Make shua you carry um wit you, cuz you goin use um fo do awesome kine tings fo show you know God.”
Moses Go Back Egypt Side
18Moses, he go back by Jetro, his fadda in law. Moses tell Jetro, “Eh, I like go back by my ohana guys Egypt side, fo check um out how dey stay.”
Jetro, he tell Moses, “Go. I like eryting go good fo you.”
19Yahweh tell Moses, “Go from hea now. Go back Egypt side. Cuz all da guys dat wen like kill you befo time, dey mahke awready.” 20So Moses take his wife an his boys, an put um on top one donkey. Moses start fo go back Egypt side, an he carry da walking stick dat God wen use wit him.
21Den Yahweh tell Moses, “Wen you get back dea Egypt side, make shua you show um all da awesome proofs dat I wen give you da powa fo make. Do um in front da Pharaoh guy. But, I goin make him come hard head, so he no goin let go da peopo. 22Wen dat happen, you tell da Pharaoh guy, ‘Dis wat Yahweh da Boss say: Da Israel peopo, dey jalike dey my numba one boy. 23I tell you dis awready, “Let go da Israel peopo, cuz dey spesho jalike dey my numba one boy, so dey can pray to me.” But you saying, you no goin let um go. Kay den, yoa numba one boy, I goin kill um.’-”
Moses Wife Get Problem Wit Moses
24One nite, Moses an his ohana wen stop one place nite time fo go sleep. Yahweh meet dem ova dea, an he go by Moses an almos kill um. 25But Moses wife Zipporah, she take one knife, da kine made from flint kine rock, an right den an dea she cut skin her boy. She take da small piece skin she wen cut off, an put um on top Moses leg, an tell um, “If I neva cut skin jalike God wen tell Abraham, an get blood all ova, I no mo husban!” 26Afta dat, Yahweh wen leave Moses alone. From dat time, Moses wife tinking bout da cut skin. She tink, “Dis husban! He like make me get blood all ova!”
27Dat time, Yahweh tell Aaron, “Go da boonies fo meet Moses.” So Aaron wen go an he find Moses nea da Mountain Wea God Stay. An Aaron kiss Moses. 28Den Moses tell Aaron eryting bout all da stuff dat Yahweh wen send Moses fo say, an all da awesome proofs dat God tell um he gotta make.
Da Older Leadas Believe Wat Moses Say
29From dea, Moses an Aaron wen hele on togedda back to Egypt. Wen dey get dea, dey tell all da older leada guys fo da Israel peopo fo come togedda. 30Aaron tell da leada guys eryting Yahweh wen tell Moses. An Moses, he show all da peopo da proof dat God wen give um, so dey can see. 31Wen da peopo see dat, dey trus Moses. Now dey know dat Yahweh see how plenny dey suffa, an dat he start fo do good tings fo da Israel peopo. Right den an dea dey go down on dea knees fo show God love and respeck.