Yahweh tell Moses fo go by da Pharaoh guy an tell um, “You betta lissen! Dis wat Yahweh say, da one dass da God fo us Hebrew peopo. He say, ‘Let my peopo go way fo do religious kine stuff fo me.’
Cuz if you no let da peopo go way, an you still yet hold um hea,
den Yahweh goin use his powa fo make yoa animals inside da fields come real sick - da horses, an da donkeys, an da camels, an da cows, an da sheeps an goats.
But Yahweh goin make diffren kine to da animals dat us Israel peopo get, an to da animals dat you Egypt peopo get. All da animals dat us Israel peopo get, no goin get even one dat goin mahke.
“Yahweh wen tell wat time goin happen. He tell, ‘Tomorrow, I goin do dis all ova da land.’-”
An da nex day, dass wat Yahweh wen do. All da animals dat da Egypt peopo get, mahke. But da animals dat da Israel peopo get, no mo even one dat mahke.
Da Pharaoh guy, he send his peopo fo check out wat wen happen. He find out dat da animal da Israel peopo get, not even one mahke. Stay bodda da Pharaoh guy plenny. Still yet, da Pharaoh guy stay hard head. He still no like let da peopo go way.
Den Yahweh tell Moses an Aaron, “You guys, go da place wea dey melt da metal. Get da black ashes from inside dea. Moses, you throw da black ashes up in da sky. Do um wea da Pharaoh guy see you.
Da black ashes goin come real fine kine dust all ova da Egypt land. Goin make dea skin hurt an boils come out, on all da peopo an all da animals all ova da Egypt land.”
So Moses an Aaron wen go get da black ashes from da place wea dey melt da metal. Dey go by da Pharaoh guy. Moses throw da black ashes up in da air. An da peopo an da animals skin hurt an boils come out all ova dem.
Da Egypt pries guys no even can stand up in front Moses cuz a da boils, cuz da boils come out all ova da Egypt pries guys an all ova all da odda Egypt peopo.
But Yahweh still yet make da Pharaoh guy hard head. He no lissen to dem, jalike Yahweh wen tell Moses befo time.
Yahweh tell Moses, “Tomorrow, get up early. Go stand wea da Pharaoh guy goin come. Tell um: ‘You betta lissen! Dis wat Yahweh say, da God fo da Hebrew peopo: Let my peopo go way fo do religious kine stuff fo me.
Fo dis time, I goin make mo big kine trouble fo yoa body, fo you, an yoa palace peopo, an yoa odda peopo. Cuz a all dis, you goin know dat in all da world, no mo nobody can do wat I can do.
If I wen like befo now, I ony can use my powa fo make you an yoa peopo come sick, an wipe out all you Egypt guys from dis world. But I neva.
So, how come I stay let you live, aah? So I can make you see dat I get all da powa, az why! Cuz I like make da peopo all ova da world know who me fo real kine, az why.
But you still yet ova an ova ack jalike my peopo ony junk, an you no let um go way!
‘Kay den. Tomorrow, same time, dis wat I goin do. I goin make one real heavy ice storm come down from da sky. From da time da Egypt land wen come till now, neva have dat kine heavy ice storm.
Now, tell yoa peopo fo put all dea animals wea get roof. Same ting fo all da stuffs you get inside da fields, go put um wea get roof. Any guy o animal dat stay outside an no come inside da house wit da oddas, wen da big ice storm come down on top dem, dey goin mahke!’-”
Had peopo from da Pharaoh guy palace dat stay scared cuz a wat Yahweh say. Dey bring dea slave peopo an dea animals inside dea houses so notting happen to dem.
Da odda guys dat no like lissen wat Yahweh say, dey leave dea slave peopo an dea animals outside in da fields.
Den Yahweh tell Moses, “Put yoa hand up to da sky, so get da big kine ice come down all ova da Egypt land, on top da peopo an da animals, an on top eryting growing inside da field, all ova Egypt.”
Wen Moses put up his walking stick to da sky Yahweh wen send thunder, an big kine ice. Had fire dat come down on top da groun too, dat time Yahweh wen make da big ice come down jalike rain on top da Egypt land.
Da ice rain real heavy, an had fire dat stay flash one side an da odda side inside da middle a da ice rain. From da time da Egypt land wen come one nation, neva have dat kine ice rain fall down on top dea land.
All ova da Egypt land, da ice rain wen hit eryting dat stay outside, peopo an animals. Da ice rain bus up all da plants inside da fields, an smash all da trees inside da fields too.
Ony Goshen side, wea da Israel peopo stay, neva have ice rain.
Cuz a dat, da Pharaoh guy send somebody fo tell Moses an Aaron fo come by him. He tell um, “Dis time, I da one dat do bad ting. Yahweh, he do da right ting. Me an my peopo, we da ones dat stay wrong.
Aks Yahweh, cuz nuff awready da thunda from God, an da ice rain. I goin let you guys go way, you guys no need stay hea moa long.”
Moses tell da Pharaoh guy, “Wen I go outside da town, I goin put up my hands an pray to Yahweh. Den da thunda goin pau, an no goin get mo plenny ice rain. Dat goin happen fo you know dat Yahweh, he own da whole world.
But I know you an yoa palace guys -- you guys no mo respeck fo God, Yahweh, still yet!”
Da flax plant an da barley plant all come poho cuz a da ice rain, cuz da barley ready fo cut, an da flax flowa had bud awready.
But had two kine wheat plant dat neva come poho from da ice rain, cuz dey not ready, dat time.
Afta Moses go way from da Pharaoh guy, he go outside da town. He put up his hands fo pray to Yahweh. Da thunda an da ice rain pau, an da rain stop coming down strong on top da groun.
But da Pharaoh guy, wen he see dat no mo rain an ice rain an thunda, he come hard head again, an stay jalike befo time, an stay do bad kine stuff. His palace peopo, same ting.
Da Pharaoh guy still hard head, an he no let da Israel peopo go way from dea, jalike Yahweh wen tell Moses befo time fo tell da peopo.