Da Day Fo Bring Back Erybody Da Same Side Wit God
(Prieses 23: 26-32; Census 29:7-11; Hebrews 6:19, 13:11)
161Yahweh talk to Moses afta two a Aaron's boys mahke. Dey wen mahke, cuz dey wen go in front Yahweh wen dey not suppose to. 2Yahweh tell Moses dis: “Tell yoa brudda Aaron, he no can come weneva he like inside da Real Real Spesho Place behind da thick curtain in front da place on top da Box Fo Rememba Da Deal. Dass wea da pries guy sprinkle da blood from da sacrifice fo bring back da peopo da same side wit me, Yahweh. If he jus come inside cuz he like, he goin mahke. Az cuz I stay inside da cloud dat stay ova da place wea da pries guy sprinkle da blood.
3“Dis how Aaron can come inside da Spesho Place: befo he go dea, he gotta bring one boy kine cow fo make sacrifice cuz a da bad kine stuff da peopo wen do, an one boy kine sheep fo da burn up kine sacrifice. 4An he gotta bafe firs wit watta, cuz he goin put on da pries kine clotheses dat stay spesho fo me. Den he goin put on da spesho long kine linen shirt, wit linen shorts unda um, den tie da linen sash aroun himself, an put on da pries kine hat. 5Same time, da Israel peopo goin bring two boy kine goats fo da sacrifice cuz a da bad kine stuff dey wen do, an one boy kine sheep fo da burn up kine sacrifice.
6“Den Aaron goin bring in da boy kine cow dat goin be da sacrifice fo da bad kine stuff he wen do, fo bring back him an his ohana da same side wit me, Yahweh. 7Den he goin take da two goats an bring dem in front me, Yahweh, by da place wea peopo go inside da yard fo da Tent wea da peopo come fo meet me. 8He goin pull straw fo da two goats. One goin be fo me, Yahweh. Da odda, lata he goin let um go way inside da boonies wea he no can come back. 9Aaron goin bring da goat dat goin be fo me, Yahweh, dat goin be da sacrifice fo da bad kine stuff da peopo wen do. 10But da goat dat he goin let um go way inside da boonies, he goin bring dat one alive in front me, Yahweh. Dat goat, fo bring back da peopo da same side wit me, lata da pries guy goin send um way inside da boonies wea he no can come back.
Da Sacrifices Dey Make Fo Bring Erybody Da Same Side Wit God
11“Den Aaron goin bring da boy kine cow fo make sacrifice fo da bad kine stuff he wen do, an kill um, fo bring him an his ohana da same side wit me. 12He goin take one bowl full a da burning coals from da altar in front me an two hands full a da incense dat dey grind up small an smell real nice, an take um behind da curtain. 13Da pries guy goin put da incense on top da burning coals in front me, Yahweh, so da smoke from da incense goin hide da place wea he goin sprinkle da blood ova da cova fo da Box Fo Rememba Da Deal, fo bring da peopo back same side wit me. He make da smoke so he no mahke. 14Den he goin take some a da boy kine cow's blood wit his finga, an sprinkle um on top da front a da cova fo da Box Fo Rememba Da Deal, fo bring back da peopo da same side wit me, Yahweh, an den he goin sprinkle um seven times in front da cova fo da Box.
15“Den da pries guy goin kill da goat fo make da sacrifice fo da bad kine stuff da peopo wen do. He goin take da blood behind da curtain, an make da same ting jalike he wen do wit da boy kine cow's blood. He goin sprinkle um on top da front a da cova fo da Box Fo Rememba Da Deal, fo bring back da peopo da same side wit me, Yahweh, an den in front da Box. 16Az how da pries guy goin make shua da Real Real Spesho Place stay da same side wit me, Yahweh, cuz da Israel ohana peopo do da kine stuff dat make um so dey no can come in front me, an dey go agains me weneva dey do bad kine stuff. Den he do da same ting fo da Tent wea da peopo come fo meet me, Yahweh. Dat Tent stay inside da middo a dea camp, even wen dey do bad kine stuff dat make um so dey no can come in front me. 17Nobody can go inside da Tent wea da peopo come fo meet me, from da time Aaron go inside da Real Real Spesho Place fo bring da peopo back da same side wit me, till he come outside. Az how he goin bring back himself, his ohana, an all da Israel peopo togedda, da same side wit me.
18“Den da pries guy goin come outside by da altar dat stay in front me, Yahweh, an make shua da altar stay okay fo make sacrifice on top um, an stay da same side wit me. He goin take some a da blood from da boy kine cow, an some a da blood from da goat, an put um on top all da tings like horns dat stick out from da altar. 19He goin sprinkle some a da blood on top da altar wit his finga seven times, fo make um come clean fo da sacrifices da way I see um. Dat way, he make um spesho fo me, cuz befo he sprinkle da blood, da Israel peopo no can come in front me.
20“Wen Aaron pau make shua da Real Real Spesho Place stay okay fo use cuz stay da same side wit me, an same ting fo da Tent an da altar, den he goin bring da odda goat dat still stay alive in front me, Yahweh. 21Aaron goin put his two hands on top da goat's head, an tell all da bad kine stuff da Israel peopo wen do, an dat dey go agains me, Yahweh, an jalike put da blame fo all dat bad kine stuff on top da goat. Den he goin make da goat go way inside da boonies, wit one guy dat stay ready fo take da goat ova dea. 22Da goat goin take da blame fo all da bad kine stuff da peopo wen do, an take um one place wea da goat no can come back. Da guy goin let go da goat ova dea inside da boonies.
23“Afta da goat go way, Aaron goin go inside da Tent wea da peopo come fo meet me, Yahweh, an take off da linen clotheses dat he put on befo he wen go inside da Real Real Spesho Place, an he goin leave um inside dea. 24He goin bafe wit watta inside da place dat stay spesho fo me, an put on his regula clotheses. Den he goin come out an make da burn up kine sacrifice fo himself, an anodda one fo da peopo, fo bring him an da peopo back da same side wit me, Yahweh. 25An he goin burn da fat from da sacrifice fo da bad kine stuff da peopo do, on top da altar too.
26“Da guy dat let da goat go dat wen take da blame, he gotta wash his clotheses, an bafe wit watta. Den he can go back inside da camp. 27Da boy kine cow an da goat fo da sacrifices fo da bad kine stuff Aaron an da peopo wen do, dat Aaron wen bring dea blood inside da Real Real Spesho Place fo bring um back da same side wit me, Yahweh, dey gotta take um outside da camp fo burn um. Dey gotta burn up da skin, da meat, da kukae, eryting. 28Da guy dat wen take um fo burn gotta wash his clotheses, an bafe wit watta. Den he can go back inside da camp.
29“Dis rules you guys goin do foeva. Da month numba seven fo yoa kine year, da day numba ten, all you guys no can eat, so you can pray. An no can work, anybody dat wen born one Jew, o anybody from odda place dat stay with you guys. 30Az cuz dat day, da pries guy goin do all dis stuff fo bring back you guys da same side wit me, Yahweh, so you guys can come in front me. Den you guys goin stay clean from all da bad kine tings you wen do, da way I Yahweh see you. 31Az one day fo res, jalike da Res Day, an you guys no can eat, so you can pray. Dis one rule dat goin stay foeva. 32Da pries guy dat God pick fo be da main pries, an get da right fo do um afta his fadda, he goin bring back da peopo da same side wit me, Yahweh. He goin put on da linen kine clotheses dat stay spesho fo me, 33an make da sacrifices fo make shua dat da Real Real Spesho Place, da Tent wea da peopo come fo meet me, an da altar, da pries guys, an da peopo all stay da same side wit me.
34“Dis, da rule fo you guys foeva. One time ery year, da main pries guy goin bring back you Israel guys da same side wit me, cuz a all da bad kine stuff you guys do.”
An Aaron wen do um all jalike Yahweh tell Moses fo do um.