(Matthew 5:33, 42, 19:19, 22:39; Mark 12:31-33; Luke 10:27; Rome 13:9; Galatia 5:14; James 2:8; 1 Peter 1:16)
191Yahweh tell Moses 2fo tell all da Israel peopo dis: “You guys gotta live spesho an good kine, cuz I yoa God Yahweh, an I stay spesho an good.
3“Erybody gotta show plenny respeck fo dea mudda an fadda. An ery Res Day, you guys gotta follow my Rules an res. I yoa God Yahweh.
4“No leave me fo make o follow idol kine gods, cuz dey no can do notting. An no pour hot metal fo make gods fo yoaself. I yoa God Yahweh, az why.
5“Wen you guys make sacrifice dat show dat you an me, Yahweh, stay tight wit each odda, make um good so I goin like take um from you. 6Gotta eat um da same day you make da sacrifice, o da nex day. If someting stay lefova till day numba three, you gotta burn um up. 7If day numba three, anybody eat um, az pilau, an I no goin take da sacrifice. 8Whoeva eat um goin get da blame fo do um, cuz dey make pilau wat stay spesho fo me, Yahweh. You gotta cut dem off so dey not yoa peopo no moa.
9“Wen you cut da food from yoa fields inside da land, no cut um all da way by da edge, o pick up da extra food dat da harvesta guys no pick up. 10No go ova yoa grape field one mo time fo make shua you get eryting, an no pick up da grapes dat wen fall down. Leave um dea fo da peopo dat no mo notting, an da peopo from odda place dat live wit you guys. I yoa God Yahweh.
12“No go make strong promise an tell az me, Yahweh, said um. Az how you give me bad name. I yoa God Yahweh.
“No hold back da pay fo yoa worka guy till da nex day.
14“No [put kahuna on top / talk stink bout] one guy dat no can hear [an tell he no matta]. No put someting in front one guy dat no can see so he trip an fall down. Stay scared an show respeck fo me, cuz I yoa God Yahweh.
15“Wen you guys judge peopo, make shua you do um da right way, an make um even. No make diffren to some guys dat stay mo betta den to odda guys, no matta dey no mo notting o dey rich. Judge odda peopo da right an same way.
“No jus stan dea, if somebody goin mahke an you do notting fo help. I Yahweh.
17“No hate yoa brudda inside yoa heart. Wen anodda guy do someting wrong, tell um az wrong strait out, so you no get da blame wit him.
18“If one a yoa peopo do someting bad to you, no go do someting bad to um too. No stay nuha wit um, but get love an aloha fo da odda guy, jalike you get love an aloha fo yoaself. I Yahweh, say dis.
“No make diffren kine animals breed wit each odda.
“No plant two diffren kine seeds inside yoa field.
“No wear da kine clotheses dat somebody weave from two diffren kine string, jalike wool an linen.
20“If one guy make sex wit one slave girl dat goin marry anodda guy, an da guy she goin marry no buy her yet an no pay da owna yet so she not one slave no moa, den da guy dat make sex wit her gotta pay da guy she going marry, cuz he jalike her husban. But you no goin kill da girl o da guy dat make sex wit her, cuz she still one slave girl. 21But da guy dat make sex wit da slave wahine, gotta bring one boy kine sheep by da place you go inside da yard fo da Tent wea da peopo come fo meet me, Yahweh, fo make da kine sacrifice dat take away da blame fo wat he wen do. 22Wen da pries guy kill da boy kine sheep fo da sacrifice fo take away da blame, da pries guy goin bring da guy da same side wit me, Yahweh, cuz a da bad kine ting da guy wen do. Den I goin hemo his shame an let him go.
23“Wen you guys go inside da land an plant any kine fruit trees, tink bout da fruit lidis: no can eat um yet, cuz jalike kapu. Fo three years, you no can eat um. 24Da year numba four, all da fruit goin be spesho fo me, Yahweh. Goin be jalike one sacrifice fo me fo tell how good I stay. 25Den, year numba five, you guys can eat da fruit. Az how you guys goin get even mo fruit. I yoa God Yahweh.
“No go find out from da gods wat happening. No go call da spirit from da mahke peopo fo come tell you wat goin happen bumbye.
27“Wen somebody mahke, no cut da hair on da sides a yoa head like da odda peopo fo show you stay sad. No cut off da edge a yoa beard. 28“No cut yoa body fo show you stay sore inside cuz a da mahke guys. No make tattoo on top yoa skin. I Yahweh.
29“No make yoa girl come pilau cuz you make her come one wahine dat fool aroun fo money. If you guys make lidat, erybody inside da land goin make lidat too, an den goin get plenny real bad kine stuff all ova da land.
31“No go look fo da wahines dat talk to da mahke peopo, an no go find da guys dat know how fo find out wat da mahke peopo spirits know. Cuz if you guys do dat, goin make you guys so you no can come in front me. I yoa God Yahweh.
32“Stand up wen ol peopo come nea you, an show respeck fo dem. Show respeck fo me, yoa God. I Yahweh.
33“Wen somebody from odda place come live wit you guys inside yoa land, no make any kine to dem. 34Somebody from odda place dat live wit you guys, you gotta make to dem jalike to one guy dat wen born same place by you guys. Get love an aloha fo da guy, jalike you get love an aloha fo yoaself. Cuz you guys wen stay Egypt side, an you guys not from dea. I yoa God Yahweh.
35“No use bulai kine measure wen you tell how long someting, o how heavy someting stay, o how much get. 36Use da kine scale an measure dat stay right an tell da truth. I yoa God Yahweh dat wen bring you guys outa Egypt.