Da Sacrifice Wit Grain
21“Wen somebody bring wheat o barley fo make sacrifice fo me, Yahweh, gotta be da bestes kine flour. Da guy dat bring um goin pour olive oil on top da flour, an put incense on top um, 2an take um by Aaron's boys, da pries guys. Da pries guy goin take some a da bestes kine flour nuff fo fill up his hand, wit da oil, an all da incense, an burn um up on top da altar fo help peopo rememba dat da whole sacrifice stay fo me, Yahweh. An da smoke from da fire goin go up an make one real nice smell fo me. 3Da odda part from da wheat o barley sacrifice goin be ony fo Aaron an his boys. Az anodda part a da kine sacrifice dey make wit fire, an dat stay real spesho fo me, Yahweh, jalike da part dey burn.
4“If you bring wheat o barley dat you bake inside one oven fo make sacrifice, gotta be from da bestes kine flour too. You can bake roun breads dat no mo yeast an olive oil mix wit da flour. O you can bake crackas dat no mo yeast, an put olive oil on top um. 5If you cook da wheat o barley sacrifice on top one pan, gotta make um wit da bestes kine flour, mix wit olive oil, an no mo yeast. 6Broke um in small piece, an pour olive oil on top um. Az one wheat o barley kine sacrifice too. 7If you cook da wheat o barley sacrifice inside one pan, da flour gotta be da bestes kine mix wit olive oil. 8Den bring da wheat o barley sacrifice you make from dese tings fo me, Yahweh. Give um to da pries guy. He goin take um by da altar. 9Da pries guy goin take out da part from da wheat o barley sacrifice fo help peopo rememba dat da whole ting stay fo me, an burn dat part wit da fire on top da altar. An da smoke from da fire goin go up an make one real nice smell fo me, Yahweh. 10Da odda part from da wheat o barley sacrifice goin be ony fo Aaron an his boys. Az anodda part a da kine sacrifice dey make wit fire, an dat stay real spesho fo me, Yahweh, jalike da part dey burn.
11“All da wheat an barley kine sacrifices you guys bring fo me, Yahweh, no make um wit yeast. You guys not suppose to burn honey, o anyting dat make da bread come big, inside one sacrifice you guys make fo me wit da fire. 12You can bring da yeast o da honey fo me, Yahweh, ony wen you guys bring da firs food you cut fo make sacrifice. But yeast an honey, not suppose to bring um wit da kine sacrifice you burn on top da altar fo make one real nice smell fo me, Yahweh. 13Put salt wit all yoa wheat o barley sacrifice. Az fo rememba da deal I wen make wit you guys. No make yoa wheat o barley sacrifice dat no mo salt. Put salt wit all yoa sacrifices.
14“If you bring one wheat o barley sacrifice fo me from da firs wheat o barley you cut, smash da seeds a da new wheat o barley, an roast um on top da fire. 15Put olive oil an incense on top um. Az anodda kine wheat o barley sacrifice. 16Da pries guy goin burn one part a da wheat o barley. Az fo help peopo rememba dat da whole sacrifice stay fo me. Az da wheat o barley dey smash, an da oil wit da incense, one sacrifice dey make wit fire fo me, Yahweh.”