211Yahweh tell Moses fo tell da pries guys, Aaron's boys, dis: “Wen somebody mahke from one pries guy ohana, da pries guy no can make so he no can come in front me. 2Ony if one close ohana mahke, his mudda o fadda, his boy o his girl, his brudda, den he can make himself so he no can come in front me. 3An if one sista dat neva marry still yet, an he stay take care her cuz she no mo husban, an she mahke, he can make himself lidat fo her. 4He no can make himself so he no can come in front me, wen somebody from his wife ohana mahke. Az pilau fo him.
5“Wen somebody mahke, da pries guys betta not shave part a da hair from dea head, o shave off da edge a dea beard, o cut dea bodies fo show dey stay sore inside. 6Dey gotta stay spesho ony fo me, dea God. Dey betta not make dirty my good an spesho name lidat. Cuz dey da ones make da sacrifice fo me, Yahweh, wit fire, an az jalike dey give food to me, dea God. Az why dey gotta stay spesho fo me.
7“Dey no can marry wahine dat make herself pilau cuz she fool aroun fo money, o dat her husban wen throw her out, cuz da prieses stay spesho fo me, dea God. 8Tink bout da pries guys jalike dey real spesho fo me, cuz dey make sacrifice an give food to me, yoa God. Tink bout dem like spesho guys, cuz I, Yahweh, stay spesho, an I make you guys spesho.
9“If one pries's girl make herself pilau cuz she fool aroun fo money, she make her fadda shame so he no can make sacrifice. Gotta burn her up fo kill her wit fire.
10“Da main pries, da one dat goin get da olive oil on top his head fo show dat I wen pick him. He get da right fo wear da pries kine clotheses. He no can let his hair come mess up, o broke his clotheses, wen somebody mahke. 11Da main pries no can go inside one place wea get one mahke body. He no can let himself come so he no can go in front me, not even fo his fadda o mudda. 12He no can go way from my spesho place fo go funeral, cuz den he goin make my spesho place come pilau. He get da olive oil on top his head fo show dat I wen pick him. I Yahweh.
13“Da wahine dat he marry, she gotta be da kine dat neva sleep wit one guy befo. 14He no can marry one widow, one wahine dat get divorce, o one wahine dat stay pilau cuz she wen fool aroun fo money. He ony can marry one wahine from his own pries kine ohana dat neva sleep wit one man. 15Dat way, he know his kids not pilau, cuz dey come from his peopo. I Yahweh dat make him spesho fo me.”
16Yahweh tell Moses fo tell Aaron dis: 17“Fo yoa kids an dea kids dat come afta dem, no mo nobody dat get someting wrong wit dem can come nea me, dea God, fo make sacrifice fo me wit food. 18No mo nobody dat get someting wrong wit dem can come nea -- anybody dat no can see, o dat no can walk good, o dat get his face o his body mess up, no can make sacrifice fo me. 19No mo nobody dat get one feet o hand dat stay all any kine, 20o get crooked back, o one guy dat no can grow tall, o dat get someting wrong wit dea eye, o dat get da kine sore dat da pus stay run out, o dat get da privates hurt. 21No mo nobody dat come from Aaron dat get someting wrong wit dem can come nea me fo make da kine sacrifice dey make wit fire. Dey no can come nea fo give food to me, dea God. 22But any pries guys dat get someting wrong wit dea body, dey can eat da mos spesho food fo me, dea God, an da spesho food dass fo da pries guys. 23But cuz dey get someting wrong wit dem, dey no can go inside da room wit da thick curtain, an dey no can go by da altar, cuz den dey make my spesho place pilau. I Yahweh, dat make da pries guys come spesho fo me.”