“No make da kine no good idol kine gods fo yoaself. No put up idol statues o big kine stones dat odda peopos put up fo dem pray in front, an no put up one stone you cut fo make someting inside yoa land, fo you go down in front um. Cuz I yoa God, me, Yahweh.
Ery day I make one Res Day, res. Show respeck fo my spesho place. I Yahweh.
“If you guys do da way I tell you gotta live, an take care fo lissen wat I tell you fo do,
den I goin send rain da right times fo you guys, da groun goin grow food, an da trees inside da field goin give you dea kine fruits.
You guys goin stay shake da barley an wheat from da junk kine stuffs, till time fo cut grape. An den da grape plants goin stay give grapes, till time fo plant seed again. You guys goin eat all da food you like, an you goin stay shua you no need worry inside yoa land.
“I goin make eryting come good fo you guys inside da land. Wen you guys lay down, you no need stay scared a nobody. I goin take away da wild kine animals from da land, an no mo nobody goin go thru dea making war.
You guys goin go afta da guys dat stay agains you, an you goin kill um wit yoa swords.
Five a you guys goin chase one hundred a dea guys, an one hundred a you guys goin chase ten tousand a dea guys. Da guys dat stay agains you, you guys goin kill um wit yoa swords.
“I goin make good to you guys. I goin give you guys plenny kids so you goin come mo plenny peopo. I goin stick wit da deal I wen make wit you guys.
You guys wen grow so plenny food da year befo, dat you still yet eat dat food wen you guys gotta move out dat food fo make room fo da new food you guys cut.
I goin make my house by you guys, an I no goin make to you guys jalike you no good.
I goin live wit you guys, an come yoa God, an you guys goin come my peopo.
I yoa God Yahweh. I wen bring you guys outa Egypt, so you guys no gotta be slaves fo da Egypt peopo no moa. I wen broke da yoke dey wen put on top you guys neck, so dat you guys can walk wit yoa head strait up an no need get shame.
“But if you guys no lissen to me, an no do all da tings I tell you guys fo do,
an if you guys no like da tings I tell you gotta do, an if you guys get mad wen I make diffren to da good peopo an da bad peopo, an so you guys broke da deal I wen make wit you guys --
wen you guys make lidat, den fo shua I goin do dis to you guys: Right den an dea I goin make you guys come real scared. I goin give you guys da kine sick dat make you come poho, an wit fever. All dat goin make you guys eyes so you no can see, an make you guys weak, den you mahke. You guys goin plant seed fo notting, cuz da peopo dat stay agains you guys goin eat um.
I goin go agains you guys, so dat da guys dat stay agains you guys goin win ova you guys an come yoa boss. You guys goin run away, even wen no mo nobody stay chase you.
“Afta I make all dese kine tings to you guys, an you guys still yet no like lissen me, I goin punish you guys seven times mo fo da bad kine stuff you guys still yet do.
You guys get big head cuz you strong, but I goin bus up you guys an show dat you not strong. I goin take away da rain from da sky ova you guys jalike dat az iron, an I goin make da groun unda you guys hard jalike az bronze metal.
You guys goin work hard fo notting, cuz yoa land no goin grow notting, an da trees on top yoa land no goin give fruits.
“If you guys still yet goin stay agains me, an no like lissen me, I goin make mo trouble fo you guys, seven times mo worse, cuz a all da bad kine stuff you guys do.
I goin send wild kine animals agains you guys. Dey goin kill yoa kids, an wipe out yoa cows. Dey goin make you guys come ony litto bit peopo, den no mo nobody goin go walk on top da roads inside yoa land.
“But if still yet, you guys no lissen wen I punish you, an stay nuha wit me,
den fo shua I da one goin stay nuha wit you guys. I goin punish you guys seven times mo cuz a da bad kine stuff you guys do.
An I goin bring army guys wit swords agains you guys. Dass how I goin pay back you guys, cuz you guys wen broke da deal I wen make wit you guys. Wen you guys go back inside yoa big towns, I goin send bad kine sick on top you guys. An da guys dat stay agains you guys goin take ova.
Wen I take away da food from you guys, ony goin get one oven fo ten wahines bake litto bit bread fo dea ohana. Dey goin bring back da bread fo you guys an weigh um so erybody get same. You guys goin eat, but you no goin get nuff.
“An if you guys still yet no lissen me, but stay nuha wit me,
den I goin get real mad wit you guys. I goin punish you guys cuz a da bad kine stuff you guys stay do, seven times mo worsa.
You guys goin eat yoa own boys an yoa own girls.
I goin broke down yoa sacrifice places fo da idol kine gods on top da hills, an cut down da altars you guys make fo burn incense dea. I goin put big stack a yoa mahke bodies on top da wood blocks dat you call yoa idol kine gods, dat no stay alive. An I goin hate you guys.
I goin make yoa big towns come all bus up, an wipe out da places you make spesho fo yoa gods. I no goin feel good inside notting from da nice smell you guys make wit yoa sacrifices.
I goin bus up yoa land, so dat da guys dat stay agains you guys no goin feel good wen dey go dea fo take ova.
I goin make you guys go all ova da place wea all kine peopos stay. I goin take out my sword an go afta you guys. You guys land goin come good fo notting, an yoa big towns, all bus up.
Den da land goin stay good, cuz goin res jalike inside da Res Years. Goin res all da time stay good fo notting, all da time you guys stay inside da land a da guys dat stay agains you guys. Dass da time da land goin res, an goin stay good inside cuz now get da Res Years.
All da time da land stay good fo notting, da land stay res. Wen you guys wen stay dea, da land neva res.
“An fo all you peopo dat still yet stay alive dea, you guys goin stay inside da lands a da peopo dat stay agains you guys, an I goin make you guys stay scared ova dea. Wen da wind blow one leaf, an you guys hear um, goin make you guys so scared, you goin run away. You goin run jalike somebody chasing you wit one sword, an you goin fall down, even nobody stay chase you.
You goin fall down on top each odda, jalike you running away from guys wit swords, no matta nobody stay chase afta you. An you guys no get da powa fo even stand up in front da guys dat stay agains you guys.
You guys goin mahke inside da lands a da diffren peopos wea you stay. Da peopo dat stay agains you guys, jalike dea land goin eat you guys up.
You peopo dat still yet stay alive, I goin punish you an make you come sick an weak inside da lands a da guys dat stay agains you guys. Cuz a da bad kine stuff you guys an yoa ancesta guys wen do, az why you guys goin come lidat!
“But if dey tell dat was wrong, all da bad kine stuff dem an dea ancesta guys wen do, an if dey tell az was wrong fo broke my rules an no stay tight wit me, an if dey tell az wrong fo dem stay nuha wit me,
an me, fo shua all dat wen make me stay nuha wit dem too. Az why I wen send dem inside da land a da peopo dat stay agains dem. Dey neva like lissen me. But wen dey start fo tink dey notting, an dey can tell az okay fo me punish dem cuz a da bad kine stuff dey wen do,
den I no goin foget da deal I wen make wit dea ancesta guys Jacob, an Isaac, an Abraham, an I no goin foget da promise I wen make bout da land.
No mo nobody goin stay dea on da land, cuz dey all go way from dea. Now, jalike da land goin feel good inside, cuz get da Res Years he suppose to get. Dey goin tell, az okay fo me punish dem cuz a da bad kine stuff dey wen do, cuz dey no like wen I make diffren kine to da good peopo an da bad peopo, an cuz dey no like wen I tell um wat dey suppose to do.
But no matta all dat. Wen dey stay inside da land a da peopo dat stay agains dem, I no goin make like dey no good, fo wipe um out all da way. I no goin broke da deal I wen make wit dem. Cuz I Yahweh dea God.
Cuz a dem I no goin foget da deal I wen make befo time wit dea ancesta guys. I wen bring dem outa Egypt fo be dea God, in front all da diffren peopos. I Yahweh.”
Dis da rules, an how fo make to da good peopo an da bad peopo, an how fo teach, dat Yahweh tell Moses on top Mount Sinai, fo tell da Israel peopo.