Buying Back Yahweh's Stuff
271Yahweh tell Moses 2fo tell da Israel peopo dis: “If somebody make one spesho strong promise to me, Yahweh, fo give somebody to me, den you, Moses, you gotta figga da right pound silva fo dem pay da pries guys so dey no gotta come one slave, cuz ony da Levi ohana guys can work fo me. 3You figga fifty piece silva, da way da pries guys weigh silva, fo pay fo one guy twenty to sixty years ol. 4But if az one wahine twenty to sixty years ol, you ony pay thirty piece silva, da way da pries guys weigh silva. 5If az one guy five to twenty years ol, pay twenty piece silva. If az one girl five to twenty years old, you ony pay ten piece silva. 6If one bebe boy ony one month to five years ol, you ony pay five piece silva. If one girl ony one month to five years ol, pay three piece silva. 7If az one guy sixty years ol o moa, pay ony fifteen piece silva. But if one wahine, pay ony ten piece silva. 8If anybody dat stay make one strong promise, but dey ony get litto bit fo pay, den dey goin bring da one dey wen promise fo give to God in front da pries guy. Da pries guy goin figga how plenny da guy gotta pay, from wat he get fo pay.
9“If somebody make one strong promise fo give one animal, an az da right kine fo one sacrifice, dat animal come spesho fo me, Yahweh. 10Da guy no can change um o give one good animal fo one bad animal, o one bad animal fo one good animal. If he make lidat, da animal he say he goin give, an da odda one he give fo um, dey goin come spesho fo me, Yahweh. 11If somebody make one strong promise fo give one animal, da kine dey no can use fo make sacrifice, cuz me, Yahweh, I no take dat kine animal, dey gotta give da animal to da pries guy. 12Da pries goin tell if da animal stay good o no good. Wateva da pries guy figga fo um, dass wat da guy gotta pay. 13If da guy goin like buy back da animal, he gotta pay twenty percent mo fo buy um back.
14“If somebody make dea house spesho fo me, Yahweh, da pries guy goin tell if da house good o bad. Wateva da pries guys tell da house stay worth, den az how much dat goin be. 15If somebody make dea house spesho fo me, Yahweh, an den like buy um back, dey gotta pay twenty percent mo. Den da house goin come his again.
16“If somebody like make some a da ohana land dat he own, spesho fo me, Yahweh, dey gotta figga how much bag seed dey need fo plant dea, fifty silva piece fo one piece land dat need two gunny bag barley seed fo plant. 17If dey make dea land spesho fo me, Yahweh, inside da spesho Year Fo Give Back numba fifty, dey still gotta pay da fifty piece silva. 18But if dey make dea land spesho fo me, Yahweh, afta da spesho Year Fo Give Back come, da pries guy goin figga how plenny dey suppose to pay fo buy back da land, from how plenny years still stay till da nex spesho Year Fo Give Back come, so dey no need pay so plenny silva fo get um back. 19If da guy wen make da land spesho fo me, Yahweh, an like buy um back again, he gotta pay twenty percent moa, an da land come his property again. 20But if da one dat make his land spesho fo me an no like buy um back, o if he wen sell um to anodda guy, den he no can buy um back eva. 21An wen time fo da land go back to da owna inside da spesho Year Fo Give Back numba fifty, from dat time, da field goin be fo me, Yahweh. Den no mo nobody can buy um, eva. Da pries guys goin own um.
22“If somebody make one field he wen buy spesho fo me, Yahweh, an da field az not part a his ohana land, 23da pries guy goin figga how plenny da owna gotta pay fo buy back da land till da spesho Year Fo Give Back, an da guy gotta pay wateva da land cost dat same day, cuz az spesho fo me, Yahweh. 24Wen da spesho Year Fo Give Back come, da land no goin go back fo da guy dat wen buy da land and make um spesho fo me. Goin go back fo da guy dat wen own um befo, cuz az his ohana land, but he wen sell um. 25Dey goin figga how plenny gotta pay fo buy back da land, da way da pries guys weigh da silva. (Twenny gerah, az one piece silva.)
26“If get one firs animal fo born from da mudda, no mo nobody can make um spesho fo me, Yahweh. Az cuz da firs animal born, awready stay spesho fo me, no matta az one cow o one sheep. Az awready fo me, Yahweh. 27But if da animal dat born firs, da kine dey no can use fo make sacrifice, da guy can buy um back fo wat da pries guy figga, an pay twenty percent mo fo um. If da guy no like buy um back, da pries guys can sell um fo wat dat kine animal cost.
28“But wateva somebody own dat stay foeva ony fo me, Yahweh, no matta az one guy, o one animal, o da ohana land, no can sell um o buy um back. Da whole ting stay foeva ony fo me, Yahweh.
29“No mo nobody can buy back somebody dat stay foeva ony fo me, Yahweh. Gotta kill um.
30“Ten percent from eryting dat grow up from da land, no matta da wheat o barley from da dirt o da fruits from da trees, az fo me, Yahweh. All dat stay stay spesho fo me. 31If somebody like buy back some a da ten percent a da wheat o barley o fruits he wen give me, dey gotta pay da pries guys twenty percent mo den wat goin cost him fo um. 32From ery ten animals from da cows an sheeps an goats, wen da farma guy count um, da numba ten one he count stay spesho fo me, Yahweh. 33He he no can pick out da good one from da bad one, an no change one animal fo anodda animal. If he change one fo da odda, den da two animals goin come spesho fo me, Yahweh, an nobody can buy um back.”
34Dese all da rules Yahweh wen tell Moses on top Mount Sinai, fo him tell da Israel peopo.