Aaron An His Boys Come Prieses
(Outa Egypt 29:1-37)
81Yahweh tell Moses: 2“Bring Aaron an his boys, da place wea you go inside da Tent wea da peopo come fo meet me, Yahweh. Tell um fo bring dea pries kine clotheses, da spesho kine olive oil fo put on top dea head, one boy kine cow fo make sacrifice fo da bad tings dey wen do, two boy kine sheeps, an one basket wit bread dat no mo yeast inside. 3Tell all da peopo fo come togedda too, ova dea by wea you go inside da yard fo da Tent wea da peopo come fo meet me, Yahweh.” 4Moses do wat Yahweh tell him fo do. All da peopo come togedda, by da place wea dey go inside da yard fo da Tent wea da peopo come fo meet God.
5Moses tell da peopo: “Dis wat Yahweh tell us we gotta do.” 6Den Moses bring Aaron an his boys in front da peopo. Den he tell dem fo go wash demself wit watta. 7Firs he put da shirt on top Aaron, tie da wide cloth belt aroun his waist, put da robe on top him, an da spesho vest. He tie da vest wit da fancy kine band fo da waist dat dey weave. 8Moses put da chest piece on top Aaron an put da Urim an da Thummim inside da chest piece pocket. 9Den he put da pries kine hat on top Aaron's head, an put da gold piece dat say Aaron stay spesho fo Yahweh, on top da front, jalike Yahweh wen tell Moses fo do.
10Den Moses take da spesho kine olive oil an put um on top da Tent an eryting inside um, an all dat, he make spesho fo God. 11He sprinkle some a da oil on top da altar seven times, an on top all da stuffs dey use fo make sacrifice, da big watta tub, an da lamp stand, fo make um spesho fo God. 12He pour some a da spesho oil on top Aaron's head too, fo show dat God wen pick him, an fo make him spesho fo God. 13Den he bring Aaron's boys in front da peopo, put da shirts on top dem, tie da wide cloth belts aroun dem, an put da pries kine hats on top dea head, jalike Yahweh wen tell Moses fo do.
14Den Moses bring da boy kine cow fo make sacrifice cuz a da bad tings Aaron an his boys wen do befo time. Aaron an da boys put dea hands on top da boy kine cow's head fo show dey know dey wen do bad kine stuff. 15Moses kill da boy kine cow, an wit his finga he put some a da blood on top da tings jalike horns dat stick out from da altar, fo make da altar clean da way Yahweh see um. He pour out da res a da blood aroun da bottom a da altar. Az how he make da altar spesho fo Yahweh wit da same kine sacrifice he use fo bring somebody da same side wit Yahweh. 16Moses take out all da fat aroun da inside parts, da part a da liver dat stick out, both da kidneys an dea fat, an burn um on top da altar. 17But da res a da boy kine cow, da skin, an da meat, an da kukae, Moses burn um all up inside da fire outside da camp, jalike Yahweh tell um fo do.
18Den Moses bring da boy kine sheep fo da sacrifice dey burn up. Aaron an his boys put dea hands on top da head a da sheep. 19Den Moses kill da sheep, an sprinkle da blood on all da sides a da altar. 20-21He cut up da sheep in big pieces. He wash da inside parts an da legs wit watta. Den he burn da head, da piece he cut up, da fat, an da res a da sheep on top da altar fo make one burn up kine sacrifice. Az one real nice smell fo Yahweh, one sacrifice dey make fo Yahweh wit fire, jalike Yahweh tell Moses fo do.
22Den Moses bring da odda boy kine sheep, da one fo make Aaron an his boys come pries guys. Aaron an his boys put dea hands on top da head a da sheep. 23Moses kill da sheep. He take some a da blood an put um on top da bottom part a Aaron's right ear, on top da thumb a his right hand, an on top da big toe a his right feet. 24Moses bring Aaron's boys in front too, an put some a da blood on top da bottom part a dea right ear, on top da thumb a dea right hand, an on top da big toe a dea right feet. Den he sprinkle blood on all da sides a da altar. 25He take out da fat: da fat tail, all da fat aroun da inside parts, da part a da liver dat stick out, both kidneys an dea fat, an he cut off da right thigh. 26Den from da basket a breads dat stay in front Yahweh, dat no mo yeast, he take one flat bread dat no mo oil, one bread dat get oil, an one cracka. He put um on top da fat an on top da right thigh. 27He put all dat stuff inside Aaron an his boys hands, an dey lif um up in front Yahweh, fo show dass da present dey give Yahweh. 28Den Moses take dat stuff from dea hands, an burn um on top da altar, on top da burn up kine sacrifice. Az fo make Aaron an his boys come prieses. Az one real nice smell fo Yahweh, da kine sacrifice dey make wit fire. 29An Moses take da breast part a da meat. Dat stay fo him from da sacrifice fo make Aaron dem come da pries guys. He lif up da meat in front Yahweh, fo show dass da present he give Yahweh, jalike Yahweh tell Moses fo do.
30Den Moses take some a da spesho kine olive oil an some a da blood from da altar, an sprinkle um on top Aaron an his clotheses, an on top Aaron's boys an dea clotheses. Az how he make Aaron an his clotheses, an his boys an dea clotheses, spesho fo God.
31Den Moses tell Aaron an his boys: “Cook da res a da meat by da place wea peopo go inside da yard fo da Tent wea da peopo come fo meet God, an eat um dea wit da bread from da basket fo da sacrifice fo make you guys come prieses, jalike I wen tell, ‘Aaron an his boys goin eat dis.’ 32Den burn up all da res a da meat an da bread. 33No go outside da place wea peopo go inside da yard fo da Tent wea da peopo come fo meet God fo seven days, till all da stuff we do fo you guys come prieses pau, cuz dat stay fo seven days. 34Da stuff we do today, az wat Yahweh wen tell me fo do, fo bring you guys da same side wit him. 35You guys gotta stay wea peopo go inside da yard fo da Tent wea da peopo come fo meet God, day time an nite time fo seven days, an do wat Yahweh tell you fo do. If you guys no do dat, you goin mahke, cuz az wat Yahweh tell me.” 36So Aaron an his boys do eryting Yahweh tell Moses fo tell dem fo do.