Flat Stones Jalike Da First Ones
101“Afta da forty days pau, Yahweh tell me, ‘Moses, cut out two mo flat stones jalike da firs ones. Make one spesho wood box too. Den come up hea by me on top da mountain. 2I goin write on top da flat stones wat I wen write on top da firs ones dat you wen broke. Den you goin put da stones inside da box.’
3So I wen make da box from koa wood, an cut out da two flat stones jalike da firs ones. Den I go up da mountain an carry da two flat stones in my hands wit me. 4Yahweh write on top da flat stones da same ting he wen write da firs time, da Ten Commandments dat he wen tell you guys up da mountain, from inside da fire, wen you guys wen come togedda. An he give da stones to me. 5Den I come back down da mountain, an put da flat stones inside da box I wen make, jalike Yahweh wen tell me fo do. Dey still yet stay dea now, inside da box.”
6(Afta dat, da Israel peopo go from da Ja`akan ohana's pukas fo watta to Moserah. Aaron wen mahke ova dea dat time, an dey bury him ova dea, an Aaron's boy Eleazar come da main pries. 7From dea dey go to Gudgodah, an den to Jotbatah, one land dat get plenny stream wit watta. 8Dat time Yahweh wen make da Levi ohana guys spesho fo him, cuz dey goin carry da Box Fo Rememba Da Deal Wit Yahweh. He tell da Levi ohana guys fo stand in front him an make sacrifice fo him too, an fo pray to God cuz dey his guys, an he do good tings fo dem. An da Levi ohana guys still yet do all dat today. 9Az why da Levi ohana no mo land o property from Yahweh, jalike dea bruddas from da odda ohanas get. Cuz da Levi ohana get Yahweh, jalike he wen tell dem.)
10Den Moses tell, “Me, I wen stay on top da mountain dat time, forty days an forty nites, jalike da firs time. An dat time Yahweh lissen to me too, an tell az okay, he no goin wipe out you guys.” 11Yahweh tell me, ‘Go! Lead da peopo from hea, so dey can go inside da land an take ova, jalike I wen make strong promise to yoa ancesta guys fo give um to dem.’-”
Stay Scared A Yahweh
12Den Moses tell: “So now, you Israel peopo, wat you guys tink yoa God Yahweh like you guys fo do? Ony dis, he like:
Fo you guys stay scared a him an show respeck fo him,
Fo live da way he tell you guys fo do,
Fo get love an aloha fo him,
Fo work fo him wit all yoa heart, an wit eryting inside you, an
13Fo stick wit his rules, an do wat he tell you guys you gotta do.
Dass wat I stay tell you guys today fo do, so eryting goin go good fo you guys.
14“You know, oua God Yahweh own eryting inside da sky, even da mos high place inside da sky! He own da earth an eryting inside um! 15But still yet, Yahweh wen like yoa ancesta guys, an get love an aloha fo dem. An he pick you guys dat come from dem! He neva pick any odda peopos. An dass how stay today.What a heritage!! 16He tell, ‘So den, make shua erybody know you my peopo, jalike you get mark inside yoa heart fo show you like da deal I wen make fo you. Az jalike wen you cut skin yoa boys fo show dey my peopo. An no come hard head no moa.’ 17Cuz oua God Yahweh, he da real God mo den all da odda gods, an he da real Boss mo big den all da odda bosses. He da big God, strong, an you betta be scared a him. He no make to one guy mo betta den da odda guy, an you no can pay him fo make him do spesho stuff fo peopo. 18He back up da kids dat no mo fadda o mudda, an da wahines dat no mo husban. He get love an aloha fo peopo from odda place, an give um food an clotheses. 19An you guys gotta get love an aloha fo da peopo from odda place, cuz you guys wen come from odda place wen you wen stay inside Egypt. 20Stay scared a oua God Yahweh an work fo him. Stay tight wit him, an wen you make one strong promise, use ony his name fo back you up. 21He da One you guys talk good bout.Good translation of “He is your praise” He yoa God dat do all dose awesome an scary kine tings dat you guys wen see wit yoa own eyes. 22Wen all yoa ancesta guys wen go down Egypt side, dey ony was seventy peopo. But now, yoa God Yahweh make you guys real plenny peopo, jalike da stars inside da sky.