Da Rules Fo Live Inside Canaan
(Rules Secon Time 12:2-26:15)
121Dis wat yoa God Yahweh tell you guys you gotta do, bout his rules an wass right. All da time you guys stay live inside da land, you guys gotta take care fo do all dat. You guys gotta do um inside da land dat Yahweh give you guys awready, fo you guys make um yoa property. He da same God yoa ancestas stay pray to. 2Broke down all da sacrifice place on top da high mountains an hills, an unda ery tree dat get plenny green leaf. Dis da kine place wea da peopo dat stay dea, go down in front dea gods. But you guys goin take ova dea land. 3Broke down dea altars fo dea idol kine gods, smash dea kapu stones, an burn up dea kapu Asherah poses wit fire. Cut down da idols dat look like dea gods. Broke down eryting bout dea gods, so nobody even rememba dea names in da places wea da gods stay befo time.
4No do da kine stuff fo pray to yoa God Yahweh, da same way dose peopo stay do fo pray to dea gods.
Show Love An Respeck Fo God One Place Ony
5But you guys gotta find da place yoa God Yahweh goin pick from all da places wea yoa ohana peopo goin live. He goin put his name dea an stay dea, an you goin go dea fo show love an respeck fo him. 6Ova dea, you guys goin bring yoa animal fo make yoa burn up kine sacrifices an odda sacrifices wea you kill animals. You goin bring God's ten percent a eryting you grow an odda spesho presents you like give too. Give wateva you guys wen make promise fo give Yahweh, an da presents you guys give um cuz you like give um, an da firs cow, sheep, o goat dat born -- bring um all da place Yahweh goin pick. 7Ova dea, da place yoa God Yahweh stay, you guys an yoa ohana peopo goin eat da sacrifice food, an stay good inside cuz a eryting you guys start fo do, cuz yoa God Yahweh stay do good tings fo you guys.
8“Erybody hea stay doing wateva dey like today, but you guys no goin make lidat bumbye. 9You make lidat, cuz you guys still yet no stay inside yoa place fo res an da property dat yoa God Yahweh goin give you guys cuz you his kids. 10But you guys goin go da odda side da Jordan Riva an live inside da land dat yoa God Yahweh stay give you guys cuz you his kids. Ova dea, Yahweh goin let you guys res from fight da peopo all aroun you guys dat stay agains you. You guys goin live ova dea, an no need worry somebody goin hurt you guys. 11Da place yoa God Yahweh goin pick fo his name stay dea -- dass da place you guys goin bring eryting I tell you, da burn up kine sacrifices an odda animal sacrifices, yoa ten percent presents, an spesho presents, an all da spesho stuff you wen promise fo give me, Yahweh. 12Ova dea you guys goin stay good inside in front yoa God Yahweh, you, an yoa boys an girls, yoa worka guys an wahines, an da Levi ohana guys from yoa town, cuz dey no mo land fo dea own.
13Make shua you no make yoa burn up kine sacrifice jus any place you guys like. 14Make da burn up kine sacrifice ony inside da place Yahweh goin pick inside da land dat one a yoa main ohanas own. An all da odda tings I tell you guys fo do, do um ova dea too.
15“But fo you guys kill yoa animals jus fo eat an not fo make sacrifice, you can do dat inside wateva town. You can eat all da meat you guys like, jalike was wild meat o deer meat. Dass one a da good kine tings Yahweh stay give you guys. Da peopo dat can come in front me an da peopo dat no can come in front me, dey all can eat um. 16But you guys no can eat da blood. Pour um out on top da groun jalike watta.
17Inside yoa own towns, you guys betta not eat God's ten percent a yoa wheat o barley o new wine o olive oil, o kill an eat da firs one fo born from yoa cows o sheeps o goats, o wateva you wen make promise fo give Yahweh, o da stuff you like give him, o da spesho presents. 18Cuz all dat stuff, you guys gotta eat um in front yoa God Yahweh, inside da place he goin pick fo you, yoa boys an girls, yoa worka guys an wahines, an da Levi ohana guys dat live inside yoa towns. Dass how you goin stay good inside in front yoa God Yahweh, bout eryting you guys start fo do. 19Make shua you guys no foget fo take care da Levi ohana guys, all da time you guys live on top yoa land.
20“Yoa God Yahweh wen make promise fo give you guys mo big land bumbye. Wen he do dat, an you say ‘I like eat meat’ cuz dass how you feel, den you can eat how plenny you like. 21If da place yoa God Yahweh pick fo put his name, stay too far from you, you can kill animals from da cows an sheeps an goats Yahweh stay give you guys, jalike I wen tell you. An you guys can eat plenny how much you like inside yoa own towns. 22Eat dem jalike you guys eat wild meat o deer meat. Da peopo dat can come in front God an da peopo dat no can come in front God, dey all can eat um. 23But make shua you no eat da blood, cuz da blood, az wat give da animal life, an you betta not eat da life wit da meat. 24You betta not eat da blood. You gotta pour um out on top da groun, jalike watta. 25No eat um, so dat eryting goin go good fo you guys an yoa kids dat goin come from you guys afta. Cuz you guys stay do wat stay right da way Yahweh see um.
26“But take da stuff you make spesho fo Yahweh, an da stuff you wen make strong promise fo give Yahweh, to da place he goin pick. 27Make yoa burn up kine sacrifice on top da altar fo yoa God Yahweh, both da meat an da blood. Da blood fo yoa odda kine sacrifices, you gotta pour um on da side a da altar fo yoa God Yahweh, but you can eat da meat. 28Take care fo lissen an do all da stuff I stay tell you guys fo do, so dat eryting goin go good fo you guys an yoa kids afta you, cuz you guys do wat stay good an right da way yoa God Yahweh see um.
29Yoa God Yahweh goin cut off da diffren peopos in front you guys, da guys dat you goin go afta fo take ova dea land. But afta you guys throw dem out, an start fo live on top dea land, 30an afta you guys wipe dem out, make shua you no fall down inside dea trap. No even aks bout dea gods, an say, ‘How dese peopos make wen dey go down in front dea gods? We goin like do da same ting.’ 31You guys make shua you no go down an pray to yoa God Yahweh da same way dey go down an pray to dea gods, cuz dey do all kine pilau kine stuff dat Yahweh hate. Dey even burn up wit fire dea own boys an girls, fo make sacrifice fo dea gods.
32“Make shua you guys do eryting I stay tell you guys. No add notting to um, an no take notting away.