Da Year Fo Foget Bout Wat Somebody Owe You
151Afta ery seven years, wateva peopo owe you, you guys gotta let um go an no make dem pay you back. 2Dis how you goin do um. Erybody gotta foget [bout] wat dey wen lend to anodda Israel guy. Dey no goin aks da odda Israel guy fo pay um back, cuz az jalike dea brudda, you know, an az da time wen Yahweh tell erybody fo no need pay um back. 3You guys can aks one guy from odda place pay you back, but you gotta foget wateva yoa Israel brudda owe you.
4“No goin get peopo dat no mo notting wit you guys. Cuz inside da land dat yoa God Yahweh stay give you guys cuz you his kids, he goin do plenny good kine stuff fo you guys. 5But yoa God Yahweh goin do dis, ony if you guys take care plenny fo do all dis stuff he wen tell you guys fo do, an I stay tell you guys today. 6Cuz yoa God Yahweh goin do plenny good kine stuff fo you guys, jalike he wen make promise fo do. You guys goin let plenny peopos borrow stuff from you, but you guys no need borrow stuff from nobody. You guys goin stay in charge a plenny peopos, but nobody goin stay in charge a you guys.
7“If get bruddas o sistas dat no mo notting inside yoa towns, inside da land dat yoa God Yahweh stay give you guys, no come hard head an come stingy bout dem. 8Mo betta fo open yoa heart an let um borrow wateva dey need. 9Take care you guys no tink dis kine no good kine ting, ‘Da year numba seven stay come nea, wen we gotta foget wateva somebody owe us an let um go!’ No good you tink lidat an come mean an no give yoa brudda guys notting wen dey no mo notting. If you make lidat, dey can aks Yahweh fo help dem agains you, an you goin get da blame fo do wass bad. 10Make shua you give yoa brudda wat he need, an no tink stingy kine bout wat you give him. Den, cuz you give to him, yoa God Yahweh goin do plenny good kine stuff fo you guys erytime, wateva you guys stay do. 11Erytime, goin get some peopo dat no mo notting inside da land. Az why I tell you guys fo open yoa heart fo give stuff to yoa brudda guys wen dey no mo powa an dey need plenny inside yoa land.
Hemo Yoa Slave Guys
12“If one Hebrew guy o wahine sell demself to you, an work fo you fo six year, you gotta let um go wen da numba seven year start. 13An wen you let dem go, no send dem away wit notting. 14Give um plenny from yoa animals, yoa wheat an barley, an yoa wine. Give um, jalike yoa God Yahweh wen give plenny to you guys. 15Rememba, you guys was slaves too Egypt side, an yoa God Yahweh wen do wat he gotta do fo get you guys outa dea. Az why I tell you guys today, fo make lidat fo da slave guys wen you let um go.
16“But if yoa slave guy tell you, ‘I no like go way from you! Cuz I get love an aloha fo you an yoa ohana, an eryting stay good fo me hea wit you!’ 17Den take one spike an push um thru da bottom a his ear lobe in one door an take um out. He goin come yoa slave guy all da time he stay alive. An do da same ting fo yoa slave if az one wahine. 18No tink az too hard fo let yoa slave guy go, cuz wat he do fo you fo six years was two times mo den wat one guy dat you pay do. Den Yahweh goin make wateva you do come good fo you guys.
Da Animals Dat Born Firs
19“Ery year put on da side fo yoa God Yahweh, ery boy kine animal dat born firs from yoa cows an sheeps an goats. No make da firs boy kine cow dat born work fo you, an no cut da wool from da firs boy kine sheep dat wen born too. 20Ery year you an yoa ohana goin eat um in front yoa God Yahweh by da place he goin pick. 21If da animal get someting wrong wit um, if no can walk good, o no can see, o some odda bad kine ting, no kill um fo make sacrifice fo yoa God Yahweh. 22You can eat um inside yoa own towns. Even da peopo dat no can come in front God can eat um, an da peopo dat can come in front God too, jalike dey stay eat one deer. 23But you guys no can eat da blood. Pour um on top da groun jalike watta.