Da Peopo Dat No Can Go Inside Da Tent Yard
231“Wen da peopo come togedda fo Yahweh, nobody can come wit dem if dea privates stay hurt cuz somebody wen smash o cut um.
2“An whoeva born wen da fadda an mudda no stay marry, dea kids an grankids no can come one a Yahweh's peopo fo ten generation.
3“Nobody from Ammon o Moab o dea kids an grankids can come one a Yahweh's peopo, even if dey wait ten generation. 4Cuz wen you guys was coming outa Egypt, da Ammon peopo neva come out fo meet you guys wit bread an watta. An da Moab guys wen pay Baalam, Beor's boy from Petor inside Aram Naharaim fo put kahuna on top you guys. 5But yoa God Yahweh get love an aloha fo you guys. Az why he no lissen Balaam. He change da kahuna kine stuff fo come good stuff fo you guys.
(Census 22:4-24:25)
6No make deal fo come friends wit da Ammon o da Moab peopo, fo do good tings fo dem, all da time you guys stay alive.
7“No ack to da Edom peopo jalike dey pilau, cuz dey da Esau ohana, yoa bruddas. No ack to da Egypt peopo jalike dey pilau, cuz you guys wen live inside dea land, no matta you guys come from odda place. 8Da Edom an da Egypt peopo's grankids can come Yahweh's peopo wen you Israel peopo come togedda.
Peopo Dat No Can Come In Front Da Boss
9“Wen you guys make camp fo go fight da peopo dat stay agains you, no go nea notting pilau. 10If one guy no can go in front Yahweh cuz nite time he get wet dream o make shishi, he gotta go outside da camp an stay dea all day. 11But wen da sun almos go down, he gotta wash himself wit watta. Den wen da sun go down, he can go back inside da camp.
12“Make one place outside da camp an put sign fo one place wea you guys can go fo make shishi an kukae. 13Take someting so you can dig one puka, an wen you pau make kukae inside da puka, cova um up afta wit dirt. 14Cuz yoa God Yahweh move aroun inside yoa camp fo take care you guys, so you guys can win agains da peopo dat stay agains you. Yoa camp gotta stay spesho fo Yahweh, so he no see notting dat not okay ova dea, an turn away from you guys.
Odda Rules
15“If one slave guy run away from anodda country an come by you, no give him back to his owna. 16Let him live wit you guys inside wateva place he like inside one a yoa towns he like. No give him hard time.
17“Da guys an wahines from da Israel peopo no can fool aroun fo pay inside da temple fo one idol kine god, jalike da Canaan peopo do cuz dey tink az goin make da land grow plenny an da animals get plenny bebe. 18You guys betta not bring da pay dat one guy o wahine get, dat fool aroun fo pay inside one Canaan kine temple, an bring um inside yoa God Yahweh's house, fo pay fo one strong promise you wen make to him, cuz all dat stay pilau, da way yoa God Yahweh see um.
19“No make yoa brudda pay interes wen you let him borrow silva o food, o wateva odda ting peopo pay interes fo. 20You can make one guy from odda country pay interes, but not one brudda from Israel. Cuz you like yoa God Yahweh do good stuff fo you guys, wateva you do, inside da land he stay give you guys fo take ova.
21“If you make one strong promise to yoa God Yahweh, no be slow fo do um, cuz he goin make shua you do um. An if you no do um, you goin get da blame fo do bad ting. 22But if you neva make promise, you no goin get blame. 23Wateva you tell, you gotta make shua fo do, cuz you wen make one strong promise to yoa God Yahweh wit yoa own mout, an nobody wen give you presha fo do dat.
24“If you go inside da grape farm dat anodda guy own, you can eat all da grapes you like, but you no can put um inside yoa basket. 25If you go inside da field dat get wheat o barley dat anodda guy own, you can pick litto bit wheat o barley wit yoa hands, but you no can use one sickle fo cut da wheat o barley.