Da Israel Peopo Win Ova Og, Da King Fo Bashan
31Afta dat we turn go nort side by da road dat go Bashan. Og, da king fo da Bashan peopo an all his army guys come out fo fight us by Edrei. 2Yahweh tell me, “No come scared King Og, cuz I goin give you guys da powa fo take all his army guys an his land. Make jalike you guys wen make to Sihon, da king fo da Amor peopo, dat was king Heshbon town.”
3So, oua God Yahweh wen give us powa ova Og, da king fo da Bashan peopo, an all his army guys too. We wipe dem all out. No mo nobody stay alive dea. 4Dat time, we take ova all his big towns. From da sixty towns Argob side, all ova wea Og stay king inside Bashan, neva have one town dat us guy no take ova. 5All dose big towns get tall walls dat nobody can broke down, an gates wit bars on top um. An get plenny odda town dat no mo wall too. 6We wipe um all out, jalike we stay make one big sacrifice fo God. We do same ting fo Sihon, da king inside Heshbon: we wipe out guys, wahines, an kids. 7But all dea animals an stuffs we take um away fo ourself.
8Dat time, we take ova da land from da two Amor kings -- da land da east side da Jordan Riva from da Arnon Canyon to Mount Hermon. 9(Da Sidon peopo call Hermon ‘Sirion’, an da Amor peopo call um ‘Senir’.) 10We take all da towns up country an all Gilead, an all Bashan to Salekah, an Edrei, da towns wea Og wen stay king inside da Bashan land. 11(Ony Og, da king fo Bashan, stay dea from da odda Refa peopo, wen he mahke. Og get one iron pune`e thirteen feet long an six feet wide. Dat pune`e still yet stay dea inside Rabbah town wea da Ammon peopo live.)
Dey Split Up Da Land
12From da land we take ova dat time, I give da Reuben an da Gad ohanas da land on da nort side Aroer by da Arnon Canyon, an half da up country an da towns inside Gilead. 13Da odda land inside Gilead an all da land inside Bashan, wea Og was king befo time, I give um to half da Manasseh ohana. (You know, all da Argob land inside Bashan, befo time da peopo call um da Refa peopo's land. 14Ja`ir from da Manasseh ohana take da land inside Argob, all da way to wea da Geshur peopo an da Ma`acah peopo stay. Today da peopo still yet call Bashan ‘Ja`ir Towns’.) 15An I give Gilead to da peopo dat come from Makir, Manasseh boy. 16But I give da land from Gilead to da Arnon Canyon to da Reuben an Gad ohanas, from da middo a da Arnon Canyon to da Jabbok Riva, wea da Ammon peopo stay. 17On da west side get da Jordan Riva inside da Arabah Valley, from da Kinneret Lake to da big lake inside da Arabah Valley (az da Big Salt Lake), unda Mount Pisgah, da eas side.
18Dat time, I wen tell you Reuben, Gad, an Manasseh guys dat goin stay east a da Jordan Riva, wat you gotta do: ‘Yoa God Yahweh wen give you guys da land dis side fo come yoa property. So all yoa guys dat can fight, gotta take dea bows an arrows an swords, an go da odda side da Jordan Riva in front da odda Israel peopo fo help fight dem firs. 19But yoa wifes, yoa kids, an all da animals you get, can stay inside da towns I wen give you guys ova hea. (I know you guys get plenny animals.) 20Afta yoa brudda guys pau fight, an dey take ova da land dat yoa God Yahweh stay give dem da odda side da Jordan Riva too, Yahweh goin let dem res. Den all you guys can come back da land I wen awready give you guys ova hea.’
Moses No Can Go Da Odda Side Da Jordan Riva
21“Dat time, I tell Joshua wat he gotta do: ‘You awready wen see wit yoa own eyes wat you guys God Yahweh do to dose two kings. Yahweh goin do da same ting to all da places dat get king ova da odda side wea you guys going. 22You guys no need stay scared a dem. Cuz you guys God Yahweh, he da One goin fight fo you guys.’
23“Dat time I aks Yahweh plenny times fo please help me. I tell um: 24‘Yahweh, you da Boss, an I yoa worka guy. You wen start fo show me how big an how strong you stay. No mo odda god inside da sky o on top da earth dat can do stuff jalike da awesome kine tings you do. 25Please let me go da odda side da Jordan Riva fo see da good land ova dea, up country an Lebanon side.’
26“But cuz a you guys, Yahweh come real huhu wit me, an no like lissen me. Yahweh tell, ‘Az nuff awready! No talk to me no mo bout dat! 27Go up da top Mount Pisgah. Look da land on da wes side, da nort side, da sout side, an da eas side wit yoa own eyes. Cuz you no goin go da odda side da Jordan Riva. 28But put Joshua in charge. Give him good kine words, an make him mo strong an solid, cuz he da one goin go da odda side da Jordan Riva wit all dese peopo follow him. An he da one goin help dem take ova da land you goin see.’ 29So us guys stay inside da valley nea Bet-Peor.