Den Moses go out an tell dis to all da Israel peopo:
“Me, I one hundred twenty years ol now, an I no can go hea an dea no moa. Yahweh wen tell me, ‘You no goin go da odda side da Jordan Riva!’
Yoa God Yahweh, he da One goin go da odda side in front you guys. He goin wipe out da peopos in front you guys, an you guys goin take ova dea land. Joshua, he goin go ova in front you guys too, jalike Yahweh wen tell.
Yahweh goin make to dem guys jalike he wen do to Sihon an Og, da kings fo da Amor peopo. He wen wipe out da peopo an dea land.
Yahweh goin give dem to you guys, an you gotta make to dem eryting I wen tell you guys fo do.
Make strong an no bum out. No come scared an shaking cuz dey look tough, cuz yoa God Yahweh, he da One go wit you guys. He no goin let you guys go by yoaself, o bag from you!”
Den Moses tell Joshua fo come by him. He tell um in front all da Israel peopo, “Make strong an no bum out, cuz you goin go wit dis peopo inside da land dat Yahweh make one spesho promise to our ancesta guys dat he goin give dem da land. You da one goin tell da ohana wat land az deas, fo come dea property.
Yahweh, he da One goin go in front you guys, an he goin stay wit you guys. He no goin let you guys go by yoaself, o bag from you guys! No scared! No lose fight!”
So Moses wen write down dese rules an give um to da pries guys from da Levi ohana, dat [wen] carry da Box Fo Rememba Da Deal Wit Yahweh, an he give um to all da older leadas fo da Israel peopo.
Den Moses tell dem, “Afta ery seven years, erybody no need pay wat dey owe odda peopo. Same time, erybody make Da Spesho Religious Time Fo Live Inside Shacks.
Dass da time wen all da Israel peopo come fo stand in front oua God Yahweh, by da place he goin pick. Dat time, you goin read dese rules to dem so dey all can hear you.
Call all da peopo togedda -- da guys, da wahines, an da kids, an guys from odda place dat live inside yoa towns, so dey can lissen an learn so dey stay scared a oua God Yahweh, an so dey stay do eryting dese rules tell um fo do.
Dea kids who donno dese rules, dey gotta hear um an learn so dey stay scared a oua God Yahweh, all da time you guys stay live inside da land dat you guys goin go da odda side da Jordan Riva fo take ova.”
14Yahweh tell Moses, “Now, da time stay nea wen you goin mahke. Call Joshua, an go stand togedda inside da Tent Fo Come Togedda Wit Me. I goin make him da one in charge a da Israel peopo from now on.” So Moses an Joshua go Da Tent Fo Come Togedda Wit Yahweh.
Den Yahweh come inside da tent an dey can see him, inside one cloud dat go from da groun to da sky. Dat cloud stay ova da door fo da tent.
Yahweh tell Moses, “Litto bit mo time, an you goin go res wit yoa ancesta guys. But dese peopo, dey goin go down in front da odda gods dat da diffren peopos pray to ova dea inside da land dey goin go inside fo take ova. Dey goin do tings wit dose gods, jalike wen peopo go fool aroun behin dea husban o wife back. Dey goin leave me, an broke da deal I wen make wit dem.
Dat time wen dat happen, I goin come huhu wit dem, an leave dem behind. I goin hide my face from dem, an I goin wipe dem out. Plenny trouble an hard time goin happen to dem. Dat time, dey goin tell, ‘Fo shua, us guys get all dis bad kine stuff happen cuz oua God no stay wit us, yeah?’
Den I goin hide my face from dem dat time fo shua, cuz a all da bad kine stuff dey do wen dey bag from me an start fo pray to odda gods.
“Now you an Joshua, write down dis song fo yoaself. Den you, Moses, you teach um to da Israel peopo, so dey can sing um. Cuz dis song goin tell wat I wen see um do, fo judge dem.
Wen I bring dem inside da land wea get plenny milk an honey erytime, da land I wen make spesho promise to dea ancestas fo give dem, dey goin eat all dey like an come full, an eryting goin go good fo dem. Den dey goin turn away an go down in front odda gods, an work fo dem. Dey goin go agains me, an broke da deal I wen make wit dem.
Lata, wen plenny bad kine stuff an hard time come on top dem, dis song goin tell wat I wen see um do, fo judge dem, cuz dea kids no goin foget da song, an dey goin sing um. I know wat dey stay tink wat dey like do, even now befo I bring dem inside da land dat I wen make spesho promise fo give to dem.”
So Moses wen write dis song dat same day, an teach um to da Israel peopo.
Dis, how Yahweh wen tell Joshua, Nun's boy, wat he gotta do: “Stay real strong, wit plenny powa! Cuz you goin bring da Israel peopo inside da land I wen make spesho promise fo give dem. An me, I da One goin stay wit you.”
Afta Moses pau write inside one book wat dese rules tell, from da start to da end,
he tell dis rule to da Levi ohana guys dat carry da Box Fo Rememba Da Deal Wit Yahweh:
“Take dis book wit da rules inside, an put um by da side a da Box Fo Rememba Da Deal Wit Yahweh. Da book goin stay dea fo tell wat I wen see da Israel peopo do, fo judge dem.
Cuz I know how you guys wen go agains me, an dat you guys hard head. I know you guys wen go agains Yahweh wen I still yet stay hea wit you guys, an I know dat you guys goin go agains him even mo plenny afta I mahke!”
Bring togedda by me, all da older leadas from yoa ohanas, an da officer guys, so I can tell dem dis so dey hear. I goin call all da powers inside da sky an on top da earth fo tell wat dey wen see da peopo do, fo judge dem.
Cuz I know dat afta I mahke, you guys goin real mess up eryting an make um come pilau. You guys goin turn away from me an no do wat I tell you guys fo do. An lata, plenny bad kine stuff goin come on top you guys, cuz you guys goin do da kine stuff dass bad, da way Yahweh see you guys doing. You guys goin make him come huhu cuz a da tings you guys make wit yoa hands.”
30Den Moses tell wat dis song say from da start to da end so all da Israel peopo dat stay dea togedda 2chcan hear um.