Da Song
(Rome 10:19; 12:19; 15:10; 1 Corint 10:20,22; Hebrews 1:6; 10:30)
321Lissen, peopo on top da earth an in da sky,
Lissen wat I goin tell.
2I like wat I teach fall down jalike da rain.
An wat I tell come jalike wen get plenny dew,
Jalike small kine rain on top da new grass,
Jalike plenny rain on top young plants.
3I goin tell wat kine God Yahweh.
I goin tell good stuff bout how big oua God stay!

4God, he jalike one big stone.
Wateva he do, erytime stay perfeck.
Eryting he do stay right.
He da God dat do wat he say.
He no do notting wrong.
He ony do tings wat stay good an right.
5But you Israel peopo,
You do pilau kine stuff dat he no like.
You not his kids no moa
Cuz you all mess up inside.
You all crooked an kapakahi kine peopo. 6You guys tink, az how you goin pay back Yahweh
Doing pilau kine stuff, o wat?!
You guys, stupid!
You guys donno wat fo do!
God, he yoa Fadda,
He da One dat wen make you guys, so he own you,
He wen make you guys come one solid nation.

7Tink bout da time long time ago.
Tink bout all yoa ancesta guys dat wen stay alive befo.
Aks yoa fadda, an he can tell you wat wen happen.
Aks da older peopo, an dey can tell you too. 8Da God Dass Mo Importan Den All Da Odda Gods,
Wen he split up all da diffren peopos
An give ery one dea own land,
He make one place fo ery peopo,
An fo da Israel peopo, he give nuff land fo how plenny peopo dem.
9Yahweh wen pick his peopo,
Fo come dea God.
Da peopo dat come from Jacob,
Dey his property.

10Yahweh wen find da Israel peopo inside da dry boonies,
One place wea no mo notting
Ony get wild animals making big noise.
But Yahweh stay all aroun da Israel peopo so notting hurt dem
An take care dem.
He make shua notting hurt dem,
Jalike one guy make shua nobody hurt his eye.
11Jalike one eagle dat move stuff inside da nest,
An move aroun ova dea bebes.
Jalike Yahweh wen he wen put out his wings fo catch his peopo,
An carry dem jalike wit his feathers.
12Yahweh, he da ony One wen lead his peopo,
No mo odda god from odda place wen help him.
13Yahweh, he put da Israel peopo wea dey stay
In da up country inside da Canaan land.
He let um eat stuff dat grow inside da fields,
An honey from da bees inside da cliffs,
An oil from da olive trees dat grow wea get hard rocks.
14He give um soft cheese from dea cows
An milk from dea sheeps an goats,
An da bestes kine meats from da bebe sheeps an goats,
An meat from da big kine sheeps dat stay Bashan side, an goats,
An wheat dat get big seed.
He let um drink da juice from da grapes, da red wine.

15But Jeshurun, az da Israel peopo dat stay do wass right,
Dey wen come fat an do dea own ting.
Eh, I talking bout you Israel peopo!
You guys eat too much an come fat.
You wen bag from da God dat wen make you.
Da One dat stay solid jalike one big stone
Da One get you guys outa trouble,
But you guys tink he stupid, an bag from him.
16You guys make him come jealous
Cuz you go pray to da gods fo da odda peopos.
You guys make him come real mad
Cuz you like da pilau idol kine gods.
17You make sacrifice to da aumakua kine spirits.
But dat kine spirits, dey not real gods!
You guys neva know dose spirits befo.
Dey ony new kine fo you peopo.
Befo time, yoa ancesta guys neva stay scared a dem
O show respeck fo dem.
18You guys wen bag, an go way from da real God
Jalike da Rock fo you guys,
An da One dat stay jalike yoa Fadda.
You guys foget da God dat wen bring you guys inside dis world.

19Yahweh see wat his peopo stay do,
So he throw um out
An no like dem be his peopo no moa,
Cuz he no take wat his own boys an girls stay do.
20Yahweh tell, ‘I goin hide my face from dem,
An see wat goin happen to dem.
Cuz dey one crooked kine peopo.
Dey kids dat I no can trus.
21Dey make me come jealous
Cuz dey pray to da kine gods dat not gods fo real.
Dey make me come huhu
Cuz a dea idol kine gods dat good fo notting.
Me, I goin make dem come jealous
Cuz I goin do good tings fo some no good peopo, not dem.
I goin make dem come huhu
Cuz I goin do good tings fo one nation dat donno notting, not dem.
22I stay huhu jalike one fire dat stay burn.
Da fire dat burn all da way
To da bottom a da Mahke Peopo's Place,
Goin burn up da earth an da food dat grow on top um.
Goin burn up da foundations fo da mountains.

23I goin pile up plenny bad kine tings
I goin do to da Israel peopo,
Jalike I goin shoot all my arrows by dem.
24I goin make dem come skinny
Cuz dey no goin get food.
Dey goin get real bad kine sick
Dat make dem feel like da sick stay eat um up.
I goin make um feel real bad
Befo I wipe um out!
I goin tell da wild kine animals fo bite dem,
An send da poison kine snake
Dat crawl aroun on top da dirt.
25Outside on da street,
Goin get war dat goin wipe out dea kids.
An even inside dea houses,
Dey goin come real scared.
Same ting fo da young guys an young wahines,
Da bebes an da ol guys,
Dey goin mahke too.
26I wen tell dat I goin put dem all ova da place,
An all da peopo in da world goin foget who dem.
27But bodda me plenny, dat maybe
Da peopo dat stay agains da Israel peopo
Goin talk stink
Cuz dey no undastan,
An cuz a dat, dey goin tell,
‘Us guys strong!
Az why we wen win ova dem!
Yahweh neva do all dis!’

28“Da Israel peopo,
Dey da kine peopo dat no can tink.
Dey no undastan notting.
29I like dem know wat fo do erytime,
An know how come all dis ting happen,
An know wat goin come in da end.
But az not how dey tink!
30Dey no tink how come one army guy
Make one tousand Israel army guys run away!
O how come two a dea army guys
Make ten tousand Israel army guys run away!
Ony one way dat can happen!
Gotta be, Yahweh wen leave dem!
Da One dat befo time stay strong
Jalike one Rock fo dem,
But now, he give up on dem!
31Cuz dea gods dat stay strong jalike one rock
Fo da guys dat stay agains us guys,
Dey not strong like oua Rock!
Even da guys dat stay agains us know dat!
32Da guys dat stay agains us,
Jalike da grape plant dat come from da Sodom peopo,
An from da fields Gomorrah side.
Dea grapes taste sour
An can kill you!
33Da wine dey make,
Jalike az poison from snakes,
Da kine can kill peopo.

34Me, eryting I make plan fo do,
I keep um good place wit me
An lock um up wea I put all my rich stuffs.
35Wen dat time come, I da One goin pay back an punish da peopo.
Wen da right time come, jalike dea feets goin slip.
Da time fo wipe dem out, coming pretty soon.
An dey goin mahke real quick.
36Yahweh goin be da judge
Dat goin tell his peopo dey no mo blame.
He goin show love an pity fo his worka guys
Wen he see dat dey no mo powa
An no mo da Israel guys dea,
No matta dey slave guys o not slave guys.
37Yahweh goin tell his peopo,
‘Eh, da odda peopo gods, dey no mo o wat?!
Dey suppose to be jalike one rock fo you guys go hide by dem!
Now, wat happen to dem?!
38Wea da gods dat wen eat da fat from yoa sacrifice?
Da ones dat wen drink da wine from yoa drink sacrifice?
Let dose gods stand up fo help you guys!
Let dem give you guys one place fo hide!

39Now see, dis me, I God fo real kine!
No mo odda god but me!
I canmake peopo mahke, an I can give dem life.
I can hurt dem an I can make dem come good.
An no mo nobody can get dem outa da kine trouble I give um.

40I put up my hand to da sky
Fo make one spesho promise.
I tell:
‘Fo shua I stay foeva!
41Wen I make my sword sharp an shiny,
I goin use um cuz I da judge,
I goin punish da peopo dat stay agains me
An pay back da peopo dat hate me.
42Wen I fight, goin be
Jalike my arrows stay drunk from da blood,
An my sword goin eat da bodies a da ones I goin kill
A da prisonas bodies too,
An da heads a da army guys dat stay agains me,
An no cut hair, fo show dey serious fo fight.’
43All you peopos, Yell plenny
Cuz you stay good inside bout Yahweh's peopo!
Cuz he goin pay back da ones dat wen kill his worka guys.
He goin pay back da peopo dat stay agains him.
He goin bring his peopo an land back da same side wit him.”
44Moses wen come wit Joshua, Nun's boy, an tell eryting dis song say so da peopo can hear um. 45Wen Moses pau tell da Israel peopo eryting bout dis song, 46den he tell dem, “Tink plenny bout all dis importan stuff dat I wen tell you guys today, so you guys goin tell yoa kids dey gotta lissen an do eryting dese rules tell. 47Dis, az not stuff dat no mean notting fo you. Dis, az yoa life! If you lissen dis stuff I tell you, you guys goin live long time inside da land da odda side da Jordan Riva dat you going take ova.”
Moses Goin Mahke On Top Mount Nebo
48Dat same day, Yahweh tell Moses, 49“Go up inside da Abarim mountains to Mount Nebo inside da Moab land, dat stay across Jericho, an den look all ova Canaan, da land I goin give da Israel peopo fo come dea property. 50Afta you climb up da top a dat mountain, you goin mahke an go back to yoa peopo, jalike yoa brudda Aaron wen mahke on top Mount Hor. 51Dis cuz you two guys neva do wat I wen tell you guys fo do, in front da Israel peopo by da Meribah watta place nea Kadesh town, inside da Zin boonies, da time you neva show respeck fo me in front dem. You neva show dat I da God dat stay good an spesho, dat time. 52Az why you ony goin see da land from dis side da riva. You no goin go inside da land dat I stay give da Israel peopo.”