Moses tell: “Lissen, you Israel peopo, wat Yahweh tell you guys dat you suppose to do, an da rules he give you. Me, Moses, I goin teach you guys fo do all dat. So lissen, so you guys can stay alive an go inside da land. You guys goin take ova da land dat Yahweh, da God fo oua ancesta guys, stay give you guys.
No put notting mo to wat I tell you guys fo do, an no take away notting from um. But jus make shua you do wat oua God Yahweh tell you guys fo do, jalike I stay tell you guys fo do now.
“You guys see wit yoa own eyes wat Yahweh wen do, da time us guys stay Ba`al-Peor side. Yoa God Yahweh wen wipe out from you guys all da peopo dat wen stay tight wit da idol kine god Ba`al, ova dea Mount Peor side.
But all you guys dat stay tight wit yoa God Yahweh, you still stay alive yet.
“Look! I wen teach you guys wat my God Yahweh tell you gotta do, an his rules, jalike he wen tell me fo teach you guys, so you can stay tight wit um inside da land wea you guys going fo take ova.
Take care fo do eryting I tell, cuz dat goin show da odda peopos dat you guys know wat fo do erytime, an you undastan plenny stuff. Dey goin hear all dis stuff dat Yahweh tell you guys you gotta do, an dey goin tell, ‘Fo shua dis az one importan peopo -- dey know wat fo do erytime, an dey undastan plenny stuff!’
Den Moses tell: “Az right! Cuz no mo odda peopo dat stay mo importan dat get dea gods nea dem, jalike oua God Yahweh stay nea us guys weneva we pray to him.
No mo odda peopo stay mo importan, dat wat dea God tell um fo do, stay good an right, jalike dese rules dat I stay teach you guys today!
“Ony watch out dat you guys no foget da stuff you guys wen see Yahweh do! No foget bout um all da time you guys stay alive. Teach yoa kids all dis too, dem an dea kids afta dem.
Rememba da time you guys wen stand in front oua God Yahweh Mount Sinai side, wen he tell me, ‘Bring hea all da peopo togedda in front me fo me tell um wat I like tell dem. Dat way, dey goin learn fo get plenny respeck fo me, all da time dey stay alive inside da land. An I like dey teach wat I tell dem to da kids too.’
You guys wen come nea an stand down side a da mountain, an all dat time da mountain stay burning wit fire an go all da way up to da sky. Get black clouds an stay real dark.
Den Yahweh talk to you guys from inside da fire. You guys can hear wat he say, but you guys no see nobody, cuz you guys ony hear one voice.
Yahweh tell you guys wat you gotta do cuz a da deal he stay making wit you guys, da Ten Commandments. Den he write um on top two flat stone.
Dat time, Yahweh tell me I gotta teach you guys wat you gotta do, an his rules. He like you guys stick wit wat he tell, all da time you guys stay inside da land wea you stay go da odda side da Jordan Riva, so you guys can take ova dat land.
“You guys neva see wat Yahweh look like, dat time he talk to you guys from inside da fire Mount Sinai side. Az why you guys gotta watch out,
dat you no make fo you guys, idol kine god dat look like one guy o one wahine, cuz den you goin mess up an make yoaself come pilau.
No make anyting dat look like one animal dat stay on top da earth, o any kine bird dat stay fly inside da sky,
o anyting dat move on top da groun, o any kine fish dat stay inside da big watta.
An wen you guys look up inside da sky an see da sun, da moon, an da stars -- all da tings dat get inside da sky -- no tink you gotta go down pray to dem an do stuff fo dem, notting. Yoa God Yahweh wen make all dose tings! He give um to all da peopos inside da world.
But fo you guys, Yahweh wen take you guys outa Egypt, wea you guys work plenny, jalike you guys stay inside one real hot furnace dat can melt iron. He get you guys outa dea fo come his peopo, his own kids, an az wat you guys stay now.
“But Yahweh come huhu wit me cuz a you guys. He make one strong promise dat I not goin go da odda side da Jordan Riva an go inside da good land dat yoa God Yahweh stay give you guys cuz you his kids.
Me, I goin mahke inside dis land. I not goin go da odda side da Jordan Riva. But you guys, you almos goin go ova dea, an take ova dat good land fo make um yoa property.
Take care dat you guys no foget da deal yoa God Yahweh wen make wit you. No make any idol kine god dat look like anyting yoa God Yahweh wen tell you guys fo no make.
Cuz yoa God Yahweh, he stay jalike one fire dat burn up eryting. He no like you guys go down in front da idol kine gods. He one jealous God.
Moses tell: “Afta you guys get kids an grankids, an live inside da land long time, if you guys come pilau inside, an make idol kine gods dat look like animals o odda tings, az real bad kine stuff you stay do, da way yoa God Yahweh see um. You guys goin make him come real huhu wit you!
Jalike I goin call da sky an da earth fo see wat you guys do today, so dey can talk agains you guys if you no do wat I stay tell you guys. Cuz if you guys no do um, you goin mahke real quick inside da land wea you guys stay cross da Jordan Riva fo take charge. Den you guys no goin live ova dea long time, but you guys goin be wipe out fo shua.
Den Yahweh goin make you guys go all ova inside odda peopos land, an ony litto bit a you guys goin stay alive ova dea wit da odda peopos, wea Yahweh goin make you guys go.
Ova dea you guys goin come slave fo da kine idol gods dat peopo make from wood an stone. Dose gods, dey no can see o hear o eat o smell notting.
But wen you guys stay ova dea, if you really like go all out fo know yoa God Yahweh wit all yoa heart, an wit eryting inside you, you goin find him.
Wen all dis kine trouble happen to you guys, an you guys feel bum out, bumbye you guys goin come back by yoa God Yahweh an lissen wat he tell you fo do.
Cuz yoa God Yahweh, he give chance. He no goin leave you guys, o wipe you out, o foget da deal he wen make wit yoa ancesta guys, cuz he wen make promise to dem dat fo shua he goin do wat he tell he goin do.
“Aks now bout wat wen happen long time ago wen eryting wen start, da time God wen make peopo on top da earth. Aks from one side da sky to da odda side. No mo notting dat awesome eva happen befo! No mo notting dat awesome eva happen dat anybody wen hear bout!
No mo anybody eva hear God talking from inside da fire jalike you guys wen hear, an still yet dey stay alive!
No mo odda god eva, who wen take his peopo outa da land wea odda peopo stay! God wen make da Egypt peopo suffa fo test um. He show how strong him wen he make dem come sick. He do unreal tings, an make war, an show his powa an do plenny real scary kine stuff. Dass wat yoa God Yahweh wen do fo you guys Egypt side, an you guys see um happen, wit yoa own eyes!
“Yahweh wen show you guys all dis tings, so you guys goin know dat Yahweh, he da God fo real kine! No mo any odda God, ony him!
He make you guys hear his voice from da sky, fo teach you guys how you gotta do wat he tell. On top da earth he show you guys his awesome fire, an you guys hear him talk from inside da fire.
He get plenny love an aloha fo yoa ancesta guys, an he pick da kids afta dem too. Az why he wen stay wit you guys an make strong fo bring you guys outa Egypt.
He wen make you guys take ova da land wea odda peopos stay dat mo big an mo strong den you guys. He da One bring you guys inside dea land an give um to you guys, cuz you his kids. An dass how stay today.
“Today you gotta know dis, an tink bout um plenny -- dat Yahweh da God inside da sky up dea, an he da God fo da earth down hea too! No mo no odda God!
Make shua you guys do wat Yahweh tell you gotta do, an do wat his rules tell dat I stay give you guys today. If you do dat, eryting goin go good fo you guys an yoa kids afta you, an you goin live long time inside da land oua God Yahweh give you guys foeva.
Den Moses wen pick three big town on da east side da Jordan Riva
wea somebody can run dea an stay, if dey kill somebody, but befo dat happen, dey no hate da guy an neva make plan fo kill um. Dey can run to dose towns an stay alive.
Da towns dat side Moses wen choose: Bezer inside da up country boonies fo da Reuben ohana, Ramot inside Gilead fo da Gad ohana, and Golan inside Bashan fo da Manasseh ohana.
Dese da rules dat Moses wen teach da Israel peopo.
Dis all da stuff dat God tell, an da tings da peopo gotta do, an da rules dat Moses give da Israel peopo wen dey come outa Egypt.
Dat time, dey stay inside da valley nea Bet-Peor on da east side da Jordan Riva. (Az was inside da land wea befo time Sihon wen stay king fo da Amor peopo inside Heshbon. Az was wen Moses an da Israel peopo win ova him, wen dey come outa Egypt.
Dey take ova dat land, an da land fo Og, da king fo Bashan. Az was da two Amor kings fo da east side da Jordan Riva.
Dat land go from Aroer on da side da Arnon Canyon to Mount Siyon, dat odda peopo call Mount Hermon.
Dey take ova all da land inside da Arabah Valley too, on da east side da Jordan Riva, to da Big Salt Lake south side, unda Mount Pisgah.