61Moses tell dis too: “Dis wat oua God Yahweh wen tell me fo teach you guys -- all da stuff you gotta do, an da rules bout wass right an wass wrong. Dass wat you guys gotta do inside da land wea you goin go fo take um ova, da odda side da Jordan Riva. 2Az cuz oua God Yahweh like fo you, an yoa kids, an dea kids afta dem, stay scared a him an get respeck fo him all da time you guys stay alive. He like you guys do wat he tell you guys you gotta do, an show respeck fo his rules bout wass right an wass wrong, jalike I stay tell you guys. So den, you guys can live long time. 3Lissen, you Israel peopo, an take care fo do wat Yahweh tell! An az how eryting goin go good fo you guys. You guys goin come plenny peopo inside da land dat ery place get plenny milk an honey, jalike Yahweh, da God fo oua ancesta guys, wen make promise to you guys.
10“Oua God Yahweh, he goin take you guys inside da land dat he wen make strong promise fo give yoa ancesta guys, Abraham, Isaac, an Jacob. Az one land dat get big, rich towns dat you guys neva build. 11Get plenny house dea wit all kine good tings you guys neva put dea, an big holes fo hold watta dat stay dea awready, an grape fields an plenny olive trees you guys neva plant. Wen you guys eat dat, an feel good inside, 12den take care you guys no foget Yahweh. He da One wen bring you guys outa Egypt, da place wea you guys was slaves.
13“Stay scared a oua God Yahweh an get respeck fo him. Work ony fo him. Wen you make strong promise fo anybody, tell ony him fo punish you if you no do um. 14No stay tight wit odda gods, da gods fo da peopos dat live aroun you guys. 15Cuz oua God Yahweh, he stay right hea wit you guys, an he one jealous God. No good he come real huhu wit you guys, cuz he goin wipe out you guys from da land if you guys pray to da odda gods. 16No give presha oua God Yahweh fo make him prove dat he Godnice, da way you guys wen make Massah side. 17Make shua you guys do wateva oua God Yahweh tell you fo do, an stick wit da tings he say you gotta do, an da rules he tell you guys. 18Do wass right an good, da way Yahweh see um, so dat eryting goin go good fo you guys. Den you guys can go inside da good land dat Yahweh wen make strong promise to oua ancesta guys fo give you, an take ova um. 19Yahweh wen tell you guys he goin throw out from da land, all da peopos dat stay agains you guys.
20“Bumbye, wen yoa kids aks you, ‘Wat all dese rules mean dat oua God Yahweh wen tell us we gotta do?’ 21you goin tell dem, ‘Us guys was slaves fo da Pharaoh guy Egypt side, but Yahweh wen bring us outa dea wit his strong powa. 22We wen see Yahweh do all awesome kine signs, good kine an bad kine, to da Egypt peopo an da Pharaoh guy an his ohana. 23But he wen bring us guys outa Egypt, an bring us dis place, an give us da land dat he make strong promise to oua ancesta guys dat he goin give. 24Oua God Yahweh tell us all dis stuff we gotta do, an tell us fo stay scared a him an get respeck fo him, so eryting goin go good fo us, an he make us stay alive, jalike we stay today. 25If we take care fo lissen an get respeck fo oua God Yahweh, an do all da stuff he tell us fo do in front him, den we goin get um right wit him, jalike he wen tell us guys.’