Da Nort Side Ohanas Dump Rehoboam
121Rehoboam go Shekem town, cuz az da place all da Israel peopo come togedda fo make um come king. 2Dat same time Jeroboam, Nebat boy, still stay Egypt side. He wen go dea cuz he was scared King Solomon goin kill um. But wen Jeroboam hear dat Rehoboam come king, he leave Egypt fo go home. 3Da Israel peopo send somebody fo tell Jeroboam fo go Shekem side, so he go ova dea. Den Jeroboam an all da odda Israel peopo dat wen come togedda, dey go talk to Rehoboam. Dey tell um, 4“Yoa fadda, he wen make us guys jalike cows an he put yoke on top us fo make us work real hard. But now, if you make da work we gotta do fo you mo easy, den we goin work fo you.”
5Rehoboam tell um, “Give me three days. Den come back by me.” So da peopo go way.
6Den King Rehoboam go meet wit da older leada guys dat work wit his fadda Solomon befo he mahke. He aks um, “Kay den. Wat you guys tink? Wat I goin tell dis peopo?”
7Dey tell um, “If you can be one worka guy dat help dis peopo today, an work fo dem, an be up an up wit dem, dey goin stay work fo you foeva.”
8But Rehoboam no lissen wat da older leada guys tell um fo do. He go talk to da young guys dat grow up wit him an dat stay by him. 9Rehoboam aks um, “Wat you guys tink I gotta do? How us guys goin answa dis peopo? Cuz dey stay tell me, ‘Try make da work we gotta do fo you mo easy! No give us da same heavy yoke yoa fadda put on us!’-”
10-11Da young guys dat grow up wit Rehoboam tell um, “Dose peopo dat say to you, ‘Yoa fadda, he wen make us jalike cows an put heavy yoke on top us fo make us work. But we like you fo make da work we gotta do fo you mo easy!’ -- go tell um, ‘[Yeah,] my fadda wen make you guys jalike cows an put heavy yoke on top you fo make you work. But you know wat?! I goin make da yoke mo heavy den dat! Jalike you goin tink my small finga, mo big den my fadda's waist! My fadda wen lick you guys wit regula kine whip, but I goin lick you guys wit scorpions!’ Dass wat we gotta tell um.”
12Day numba three, Jeroboam an all da odda peopo come back by King Rehoboam, jalike he wen tell um fo do. 13Da king talk real hard to da peopo. He no lissen to wat da older leadas tell um az good fo do. 14He talk to dem da way da young guys wen tell um fo talk. He tell, “My fadda wen put jalike one heavy yoke, da kine dey use fo da cow, on top you guys fo make you work. Me, I goin make da yoke mo heavy den dat! My fadda wen lick you guys wit regula kine whip, an I goin whip you guys wit scorpions!” 15An dass how was. Da king guy no lissen to da peopo. But was Yahweh wen make um happen lidat. Cuz az da ting Yahweh wen tell Ahijah da Shiloh guy fo tell Jeroboam, Nebat boy, long time befo.
16Wen all da Israel peopo see dat King Rehoboam no stay lissen to dem, dey talk back to him. Dey tell um,
“Eh! You king guys from da David ohana,
You good fo notting to us!
We no get notting from da Jesse ohana!
Us North Israel guys, we getting outa hea!
You David ohana guys
Take care yoa own peopo,
No bodda us!”
So da North Israel guys go home. 17Cuz a dis, Rehoboam ony stay da king fo da Israel peopo dat live inside da Judah towns.
18Den King Rehoboam send Adoniram to da country side for talk to da peopo. Adoniram da leada boss fo all da guys dat go work hard fo Rehoboam an no mo pay. But all da Israel peopo throw rock an kill Adoniram. But King Rehoboam, he strong nuff fo jump real quick inside his war wagon an run away from dea to Jerusalem. 19Az why still yet today, all da North Israel peopo stay fight agains da David ohana, an no let um come dea king.
20Wen all da odda North Israel peopo find out dat Jeroboam come back from Egypt, dey send somebody fo tell um, “Come meet wit us!” Dey make him da king fo all da North Israel peopo. Da Judah ohana was da ony ones dat stick wit da David kine king guys.
Shemaiah Talk Fo God To Rehoboam
21Wen Rehoboam come back Jerusalem, he tell all da guys from da Judah an Benjamin ohanas fo come by him fo make army. He get 180,000 guys from dem, ready fo make war wit da Israel ohanas, so Rehoboam, Solomon's boy, can come king again fo erybody.
22But had one message from God fo Shemaiah, one guy dat know God fo real kine, fo say dis: 23“Talk to Rehoboam, Solomon's boy, da king fo da Judah peopo, an to all da Judah an Benjamin peopo, an all da oddas too. 24Tell um dis: ‘Dis wat Yahweh tell. No go ova dea fight wit yoa brudda guys da Israel ohana peopo. Go home, all you guys! Cuz I da One dat stay make all dis happen right now!’-” Da peopo lissen to wat Yahweh tell um, an dey go back home, jalike Yahweh tell um fo do.
Jeroboam Make Idol Kine Gods Dat Look Like Bebe Cows
25Den, Jeroboam wen make strong da walls fo Shekem town, up country Efraim side. He go dea fo live. From dea, he go ova Peniel side an make strong da walls fo dat town too. 26Cuz Jeroboam tink, “If I no do notting, bumbye da David ohana peopo from da Judah ohana, an dea king, goin take ova again. 27Ery year, dis peopo go Jerusalem town fo make sacrifice inside da Temple Fo Yahweh. Bumbye, dey goin tink fo take da Judah king, Rehoboam, fo be dea boss one mo time. An if dey do dat, dey goin kill me an go back to him!”
28So King Jeroboam aks his helpa guys wat fo do. Den he tell his worka guys, “Make two idol kine gods outa gold, da kine dat look like bebe cows.”
Den he tell da peopo, “Eh, az too hard, fo you guys go all da way Jerusalem side fo make sacrifice! Look now! Right hea, da gods fo you Israel peopo! Dis, da ones wen bring you guys hea from da Egypt land!”
29Jeroboam put up one a da idol kine gods Bethel side nea da border wit Judah, an da odda one in da north, Dan ohana side. 30Cuz Jeroboam wen do dis, make plenny peopo do wat dey not suppose to do. Dey even wen go all da way Dan side fo pray to da idol kine god ova dea.
31Jeroboam wen build small kine house by da sacrifice places on top da hills fo pray. He take any kine peopo fo come prieses, even if dey not from da Levi ohana. 32Den Jeroboam tell da peopo dey gotta make one spesho religious time ery year Octoba, same time jalike da spesho time wen da Judah peopo go live inside shack. An Jeroboam make sacrifice on top da altar he wen build. He do dat Bethel side, fo make sacrifice fo da idol kine gods he wen make, dat look jalike bebe cows. He get da peopo fo come prieses fo all da small kine sacrifice house he wen build on top da hills fo pray to da odda gods too. 33Octoba was da time Jeroboam wen go pick fo be da spesho religious time. He neva get dat time from God. Dat time, Jeroboam go da altar he wen build Bethel side. Dass how he make his own spesho religious time fo da Israel peopo all come togedda, an he da one, not da pries guys, go to da altar an make da sacrifice.