Ahijah Tell Jeroboam Wat God Say
141Dat time, King Jeroboam boy Abijah come sick. 2Jeroboam tell his wife, “Us gotta do someting! Go put on diffren kine clothes, so nobody know you my wife. Den go Shiloh side. Get one talka fo God ova dea. His name, Ahijah. He da one wen tell me I goin come king fo dis peopo. 3Take ten flat kine breads, some sweet kine cake, an one small bottle honey. Go by him an give him da present. He goin tell you wat goin happen wit da boy.”
4So dass wat Jeroboam wife wen do. She start fo go Shiloh side, to Ahijah house. Ahijah, he no can see cuz he real ol. 5Befo she reach Shiloh, Yahweh tell Ahijah awready, “Jeroboam wife goin come hea fo aks you fo tell her one ting. She goin aks you bout her boy, cuz he stay sick. An you goin tell her some stuff. Wen she come, she goin get diffren kine clotheses on, so nobody know az her.”
6Ahijah hear her coming by da door. He tell her, “Come inside! You Jeroboam wife, yeah? So, how come you put on diffren kine clotheses so nobody know az you?! God wen tell me awready, fo tell you some stuff dat goin make you bum out. 7Wen you go home, tell Jeroboam, dis wat Yahweh, da God fo da Israel peopo, tell: ‘Was me wen make you come mo importan den all da peopo aroun you, an I wen make you da leada fo my peopo, da Israel peopo. 8David was da king, an da odda kings was goin come from his ohana. But I wen take away da right fo da David ohana guys come king, an give you da right fo be king. But you, you no ack like David, cuz he wen work fo me, an you, you no do notting fo me. Wen I tell him he gotta do someting, he do um. He wen stay tight wit me wit one good heart. He ony do da kine stuff dat I see stay right. 9You wen do mo plenny bad kine stuff den all da peopo dat wen come befo time. You go make idol kine gods dat not fo you, dat you melt metal fo make. You make me come mad and walk away from me.
10“ ‘Cuz you do all dat, dis wat I goin do. I goin make bad kine stuff happen to all da Jeroboam ohana. I goin wipe out ery man from da Jeroboam ohana inside da Israel land, no matta dey slaves o dey not slaves. I goin burn up all da Jeroboam ohana peopo, jalike peopo burn up all da rubbish, till no mo nobody [dea]. 11Anybody from da Jeroboam ohana dat mahke inside da towns, da dogs goin eat um. Any a dem mahke outside da country side, da birds goin eat dem. I, Yahweh, an I telling you dis!’
12“An fo you, Mrs. Jeroboam, go home now. Wen you go inside yoa town, yoa boy goin mahke. 13All da Israel peopo going cry plenny fo him an bury him. But him, he da ony one from da Jeroboam ohana dat goin get grave, cuz him da ony one from da Jeroboam ohana dat Yahweh, da God fo da Israel peopo, see dat he one good guy.
14“Yahweh goin make one nodda guy come king fo da Israel peopo, an do wat Yahweh like. Dat guy goin wipe out all da Jeroboam ohana. An you know wen he goin do dat? Goin be today! An wat Yahweh goin do afta dat? 15Yahweh goin smash all da Israel peopo so dey no goin stand up strait, jalike wen you smash one plant dat grow inside one riva. He goin pull out da Israel peopo from dis good land he wen give to dea ancesta guys, jalike wen you pull one plant outa da groun wit da roots. He goin throw dem all ova da place, da odda side da Eufrates Riva. Az cuz dey wen put up pos fo pray to da wahine god Asherah, an dat make Yahweh come plenny huhu. 16Yahweh goin give up on da Israel peopo, cuz a all da bad kine stuff Jeroboam wen do, an cuz Jeroboam wen make da Israel peopo do bad kine stuff too!”
17So Jeroboam wife get up an go home Tirzah side. Da same time she step inside her door, her boy mahke. 18Da peopo bury da boy, an all da Israel peopo cry plenny fo him, jalike wat Yahweh wen tell his worka guy Ahijah dat talk fo him, fo tell.
19All da odda stuff Jeroboam wen do, how he make war an how he lead da peopo, all dat stay write down inside da Record Book Fo Da Kings Fo Israel. 20Jeroboam was king 22 year. Den he mahke an go sleep wit his ancesta guys. Jeroboam boy Nadab come king afta him.
Rehoboam Stay King Judah Side
21Ova dea Judah side, Solomon boy Rehoboam stay king dat time. Wen he 41 year ol, he come king, an he stay king 17 year Jerusalem side. (Rehoboam mudda name Naamah, from da Ammon peopo.) Jerusalem, az da big town Yahweh wen pick from all da Israel ohanas, fo build da Temple so da peopo can come fo find out wat kine God him.
22But da Judah peopo, dey do da stuff Yahweh say az bad. Da bad kine stuff dey wen do, was mo bad den da stuff dea ancesta guys wen do. Cuz a dat, dey make Yahweh come real huhu an jealous, cuz dey suppose to live fo him an [dey] no make lidat. 23Dem guys make spesho kine place on top da high part a da hills fo make sacrifice, an dey stand up big stone fo make place for pray, an put pos fo pray to da wahine god Asherah, on top da high part a ery hill an unda ery big tree dat get plenny leaf. 24Dey even get guys inside da land dat stay spesho fo da odda gods. Dey go take da wahines fo do bad kine stuff, an da wahines pay dem, an all da pay dey get, go to da places wea da peopo pray to da odda gods. Da peopo stay do all kine pilau kine stuff jalike how da odda peopos wen do, da same peopos dat Yahweh wen get um outa da land wen da Israel peopo come dea.
25Afta Rehoboam was king five year, Shishak da king fo da Egypt peopo wen come attack Jerusalem. 26He take all da stuff from inside da Temple Fo Yahweh an inside King Rehoboam palace. He take eryting, even da gold shields da Solomon guys make. 27So King Rehoboam tell his guys fo go make shields outa bronze metal, fo put um wea da gold shields stay befo time. He make da officer guys, da ones dat guard da door fo da king's palace, [put on / take care] da bronze shields. 28Erytime da king go inside da Temple Fo Yahweh, da guard guys carry da shields. Afta he leave, dey take um back to da room wea dey stay.
29Odda stuff dat wen happen wen Rehoboam stay king, all da tings he wen do, stay write inside da Record Book Fo Da Kings Fo Judah. 30An all da time, Rehoboam an Jeroboam make war wit each odda. 31Den Rehoboam mahke jalike his ancesta guys. Dey bury him wit dem inside David Town, az Jerusalem. (Rehoboam's mudda name was Naamah, from da Ammon peopo.) Den Rehoboam boy Abijam come da nex king.